ದೇವಯಾನಿಗೆ ಮತ್ತೆ ಕಂಟಕ

ನವದೆಹಲಿ (ಪಿಟಿಐ): ಮನೆಗೆಲಸದ ಸಹಾಯಕಿಗೆ  ವೀಸಾ ಪಡೆಯಲು ಸುಳ್ಳು ಮಾಹಿತಿ ನೀಡಿ ಅಮೆರಿಕದಲ್ಲಿ ಬಂಧನಕ್ಕೆ ಒಳಗಾಗಿದ್ದ ವಿವಾದಿತ ರಾಜತಾಂತ್ರಿಕ ಅಧಿಕಾರಿ ದೇವಯಾನಿ ಖೊಬ್ರಾಗಡೆ ಇದೀಗ ತಾಯ್ನಾಡಿನಲ್ಲಿಯೇ ಮತ್ತೊಂದು ಸಂಕಷ್ಟಕ್ಕೆ ಸಿಲುಕಿದ್ದಾರೆ. 
ಮುಂಬೈನ ಆದರ್ಶ ವಸತಿ ಸಮು­ಚ್ಚಯ­ದಲ್ಲಿ ಮನೆ (ಫ್ಲ್ಯಾಟ್‌) ಪಡೆ­ಯಲು ದೇವಯಾನಿ ಮತ್ತು ಅವರ ತಂದೆ ಸುಳ್ಳು ಪ್ರಮಾಣ ಪತ್ರ ಸಲ್ಲಿಸಿ­ದ್ದಾರೆ ಎಂಬ ಆರೋಪವಿದೆ.

ಇದಕ್ಕೆ ಸಂಬಂಧಿಸಿದಂತೆ ಸಾಕಷ್ಟು ಸಾಕ್ಷ್ಯಾಧಾರ ಹಾಗೂ ದಾಖಲೆ ಸಂಗ್ರಹಿಸಿದೆ ಎನ್ನಲಾದ ಸಿಬಿಐ, ತಂದೆ ಮತ್ತು ಮಗಳ ವಿರುದ್ಧ   ನ್ಯಾಯಾ­ಲಯ­ಕ್ಕೆ ಆರೋಪಪಟ್ಟಿ ಸಲ್ಲಿಸುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.  ಮನೆ ಖರೀದಿ ವೇಳೆ  ಸಲ್ಲಿಸಿದ ಪ್ರಮಾಣ ಪತ್ರದಲ್ಲಿ ಸರ್ಕಾರಿ ಕೋಟಾದ ಅಡಿ ರಿಯಾಯ್ತಿ ದರದಲ್ಲಿ ಈ ಮೊದಲೇ ಪಡೆ­ದಿದ್ದ ಮನೆ ಮತ್ತು ಭೂಮಿಯ ಬಗ್ಗೆ ಮಾಹಿತಿ
ನೀಡದೆ ಮುಚ್ಚಿಟ್ಟಿರುವುದು ಇಬ್ಬರಿಗೆ  ಉರುಳಾಗುವ ಸಾಧ್ಯತೆ ಇದೆ.

ಮಹಾರಾಷ್ಟ್ರ ಕೇಡರ್‌ ಐಎಎಸ್‌ ಅಧಿಕಾರಿಯಾಗಿದ್ದ ಉತ್ತಮ್‌ ಖೋಬ್ರಾಗಡೆ ಮಹಾರಾಷ್ಟ್ರ ವಸತಿ ಮತ್ತು ಪ್ರದೇ­ಶಾ­ಭಿ­ವೃದ್ಧಿ ಪ್ರಾಧಿಕಾರದ ಕಾರ್ಯನಿರ್ವಹಣಾ ಅಧಿಕಾರಿ­ಯಾಗಿ ಸೇವೆ ಸಲ್ಲಿಸಿದ್ದರು.

ಮನೆಗೆಲಸದ ಸಹಾಯಕಿಯ ವೀಸಾ ಪಡೆಯಲು ಸುಳ್ಳು ಮಾಹಿತಿ ನೀಡಿದ್ದ ಆರೋಪದ ಮೇಲೆ ರಾಜತಾಂತ್ರಿಕ ಅಧಿ­ಕಾರಿ ದೇವಯಾನಿ ಅವರನ್ನು ಅಮೆರಿಕ ಪೊಲೀಸರು ನಡು­­ರಸ್ತೆಯಲ್ಲಿ ಕೈಕೋಳ ತೊಡಿಸಿ ಬಂಧಿಸಿ ಕರೆದೊಯ್ದಿದ್ದರು.

ಈ ಘಟನೆ ಅಮೆರಿಕ ಮತ್ತು ಭಾರತದ ರಾಜತಾಂತ್ರಿಕ ಸಂಬಂಧ­ಗಳಲ್ಲಿ ಬಿಕ್ಕಟ್ಟು ಸೃಷ್ಟಿಗೆ ಕಾರಣ­ವಾಗಿತ್ತು. ದೇವ­ಯಾನಿ ಬಂಧನ ತಪ್ಪಿಸಲು ಅವರನ್ನು  ವಾಪಾಸ್‌ ಕರೆಸಿ­ಕೊಂಡ ಸರ್ಕಾರ ಇಲ್ಲಿಯೇ  ಕರ್ತವ್ಯಕ್ಕೆ ನಿಯೋಜಿಸಿದೆ.

ಆದರ್ಶ ಹಗರಣ ಅವ್ಯವಹಾರಗಳ ತನಿಖೆ ನಡೆಸಿದ್ದ ಮುಂಬೈ ಹೈಕೋರ್ಟ್‌ ನಿವೃತ್ತ ನ್ಯಾಯಮೂರ್ತಿ ಜೆ.ಎ. ಪಾಟೀಲ್ ಸಮಿತಿ 102 ಜನರ ಪೈಕಿ 25 ಅನರ್ಹ ಫಲಾನುಭವಿಗಳನ್ನು ಪತ್ತೆ ಮಾಡಿತ್ತು.