ನಗರದಲ್ಲಿ ಎಲ್ಲಾ ವಿಧದ ಜಾಹೀರಾತು ನಿಷೇಧ

ಬೆಂಗಳೂರು: ನಗರ ವ್ಯಾಪ್ತಿಯಲ್ಲಿ ತಕ್ಷಣ­ದಿಂ­ದಲೇ ಜಾರಿಗೆ ಬರುವಂತೆ ಎಲ್ಲ ವಿಧದ ಜಾಹೀರಾತು ಫಲಕಗಳ ಮೇಲೆ ನಿಷೇಧ ವಿಧಿಸಲು ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಕೌನ್ಸಿಲ್‌ ಸಭೆಯಲ್ಲಿ ಬುಧವಾರ ನಿರ್ಣಯ ಕೈಗೊಳ್ಳಲಾಗಿದೆ. ಆಡಳಿತ ಪಕ್ಷದ ನಾಯಕ ಎನ್‌.ಆರ್‌. ರಮೇಶ್‌ ನಿರ್ಣಯವನ್ನು ಮಂಡಿಸಿದರು. ಅದಕ್ಕೆ ಸಭೆ ಸರ್ವಾನುಮತದ ಒಪ್ಪಿಗೆ ಸೂಚಿಸಿತು.

‘ನಗರದ ಸೌಂದರ್ಯ, ವಾಹನ ಚಾಲಕರ ಸುರಕ್ಷತೆ, ಆಡಳಿತಾತ್ಮಕ ಶಿಸ್ತು ಹಾಗೂ ಪರಿಸರಮಾಲಿನ್ಯ ನಿಯಂತ್ರಣದ ದೃಷ್ಟಿಯಿಂದ ಈ ತೀರ್ಮಾನ ಕೈಗೊಳ್ಳಲಾಗಿದ್ದು, ನಗರವನ್ನು ಜಾಹೀರಾತು ಮುಕ್ತ ಮಾಡಲಾಗುವುದು’ ಎಂದು ನಿರ್ಣಯದಲ್ಲಿ ತಿಳಿಸಲಾಗಿದೆ.

‘ಖಾಸಗಿ ವಲಯವೂ ಸೇರಿದಂತೆ ಎಲ್ಲ ಪ್ರದೇಶ­ಗಳಲ್ಲೂ ಜಾಹೀರಾತು ಫಲಕಗಳ ಪ್ರದರ್ಶನದ ಮೇಲೆ ನಿಷೇಧ ವಿಧಿಸಲಾಗಿದ್ದು, ಅವುಗಳನ್ನು ತೆಗೆದು ಹಾಕಲಾಗುವುದು. ಹೈಕೋರ್ಟ್‌ ಮತ್ತು ಲೋಕಾಯುಕ್ತದಿಂದ ಮೇಲಿಂದ ಮೇಲೆ ಬಿಬಿ­ಎಂಪಿ ಆಯುಕ್ತರು, ಸದಸ್ಯರು ಹಾಗೂ ಶಾಸಕರು ಛೀಮಾರಿ ಹಾಕಿಸಿಕೊಳ್ಳುವುದು ಇದರಿಂದ ತಪ್ಪಲಿದೆ’ ಎನ್ನಲಾಗಿದೆ.

‘ಜಾಹೀರಾತು ಮೂಲದಿಂದ ಬಿಬಿಎಂಪಿಗೆ ಕಡಿಮೆ ಆದಾಯ ಬರುತ್ತಿದ್ದು, ನ್ಯಾಯಾಲಯ ವೆಚ್ಚ, ಸಿಬ್ಬಂದಿ ವೇತನ ಮೊದಲಾದ ಉದ್ದೇಶಗಳಿಗೆ ಬಹುಪಾಲು ವ್ಯಯವಾಗುತ್ತಿದೆ. ಈ ವಿಭಾಗದ ಸಿಬ್ಬಂದಿಯನ್ನು ಕಂದಾಯ ವಿಭಾಗಕ್ಕೆ ಬಳಸಿಕೊಂಡರೆ ಹೆಚ್ಚಿನ ಆಸ್ತಿ ತೆರಿಗೆಯನ್ನು ಸಂಗ್ರಹಿಸಲು ಅನುಕೂಲವಾಗಲಿದೆ. ಅಲ್ಲದೆ, ಫಲಕಗಳ ಪ್ರದರ್ಶನಕ್ಕಾಗಿ ಮರ ಕಡಿಯುವುದೂ ನಿಲ್ಲಲಿದೆ’ ಎಂದು ವಿವರಿಸಲಾಗಿದೆ.

‘ವಾಣಿಜ್ಯ ವ್ಯವಹಾರಗಳಿಗೆ ಅವುಗಳ ಹೆಸರು, ವಿಳಾಸ ನಮೂದಿಸಲು ಪ್ರತಿ ಸಂಸ್ಥೆಗೆ ನಿಗದಿತ ಉದ್ದ ಹಾಗೂ ಅಗಲದ ಒಂದು ಫಲಕವನ್ನು ಹಾಕಿಕೊಳ್ಳಲು ಮಾತ್ರ ಉಚಿತವಾಗಿ ಅನುಮತಿ ನೀಡಲಾಗುತ್ತದೆ. ಉಳಿದಂತೆ ಸ್ವಂತ ಫಲಕದ ಹೆಸರಿನಲ್ಲಿ ಯಾವುದೇ ಜಾಹೀರಾತು ಫಲಕ ಅಳವಡಿಸಲು ಅವಕಾಶ ಇಲ್ಲ. ಇದುವರೆಗೆ ಜಾರಿ­ಯಲ್ಲಿದ್ದ ಡೀಮ್ಡ್‌ ಅನುಮತಿಯನ್ನು  ಸಹ ರದ್ದು­ಗೊಳಿಸಲಾಗಿದೆ’ ಎಂದು ನಿರ್ಣಯದಲ್ಲಿ ತಿಳಿಸಲಾಗಿದೆ.

‘ಬಿಬಿಎಂಪಿ ವ್ಯಾಪ್ತಿಯಲ್ಲಿ ಯಾವುದೇ ಜಾಹೀರಾತು ಪ್ರದರ್ಶನ ಮಾಡಿದಲ್ಲಿ ಅಂತಹ ಸಂಸ್ಥೆ ಇಲ್ಲವೆ ಏಜೆನ್ಸಿ ವಿರುದ್ಧ ಕ್ರಿಮಿನಲ್‌ ಮೊಕದ್ದಮೆ ದಾಖಲು ಮಾಡಲಾಗುವುದು. ಖಾಸಗಿ ಸ್ವತ್ತುಗಳು, ಮನೆಯ ಮೇಲ್ಛಾವಣಿ, ವಾಣಿಜ್ಯ ಕೇಂದ್ರ ಹಾಗೂ ಮಾಲ್‌ಗಳಲ್ಲೂ ಜಾಹೀರಾತು ಹಾಕುವಂತಿಲ್ಲ. ತಕ್ಷಣದಿಂದಲೇ ಜಾರಿಗೆ ಬರುವಂತೆ ಅವುಗಳನ್ನು ತೆಗೆದು ಹಾಕಲಾಗುವುದು’ ಎಂದು ವಿವರಿಸಲಾಗಿದೆ.

‘ಆಯಾ ವಲಯಗಳಲ್ಲಿ ಜಂಟಿ ಆಯುಕ್ತರ ನೇತೃತ್ವದಲ್ಲಿ ಜಾಹೀರಾತು ಫಲಕಗಳ ತೆರವು ಕಾರ್ಯಾಚರಣೆ ನಡೆಯಲಿದ್ದು, ಫಲಕಗಳನ್ನು ಉಳಿಸಲು ಅವಕಾಶ ಮಾಡಿಕೊಟ್ಟಲ್ಲಿ ಜಂಟಿ ಆಯುಕ್ತರನ್ನೇ ಹೊಣೆಗಾರರನ್ನಾಗಿ ಮಾಡಲಾಗುತ್ತದೆ’ ಎಂದು ತಿಳಿಸಲಾಗಿದೆ.

ತೆರಿಗೆ ಮತ್ತು ಆರ್ಥಿಕ ಸ್ಥಾಯಿ ಸಮಿತಿ ಜನವರಿ 19ರಂದೇ ಈ ಕುರಿತಂತೆ ನಿರ್ಣಯ ಕೈಗೊಂಡಿತ್ತು. ಈಗ ಅದಕ್ಕೆ ಕೌನ್ಸಿಲ್‌ ಸಭೆಯ ಒಪ್ಪಿಗೆ ಮುದ್ರೆಯೂ ಬಿದ್ದಿದೆ. ರಾಜ್ಯ ನಗರಾಭಿವೃದ್ಧಿ ಇಲಾಖೆಯಿಂದ ಸಹ ಈ ನಿರ್ಣಯಕ್ಕೆ ಒಪ್ಪಿಗೆ ಸಿಗಲಿದೆ ಎಂದು ಸ್ಥಾಯಿ ಸಮಿತಿ ಸದಸ್ಯರು ಭರವಸೆ ವ್ಯಕ್ತಪಡಿಸಿದರು.