ಬೆಂಗಳೂರು: ನಗರದಲ್ಲಿ ಬುಧವಾರ 4.06 ಮಿ. ಮೀ ಮಳೆಯಾಗಿದೆ. ಮೋಡ ಮುಸುಕಿದ ವಾತಾವರಣ ಹಾಗೂ ಸಾಧಾರಣ ಮಳೆಯು ದಿನವಿಡೀ ಮುಂದುವರೆದಿತ್ತು. ಇದರಿಂದ ಜನ ಜೀವನಕ್ಕೆ ಸ್ವಲ್ಪ ಮಟ್ಟಿಗೆ ಕಿರಿಕಿರಿಯಾಯಿತು. ‘ಜೂನ್ ತಿಂಗಳಲ್ಲಿ ಈತನಕ 187 ಮಿ. ಮೀ ಮಳೆಯಾಗಿದೆ. ಇದು ವಾಡಿಕೆಗಿಂತಲೂ ಹೆಚ್ಚು. ಕಳೆದ ವರ್ಷ ಜೂನ್ ತಿಂಗಳಲ್ಲಿ 85 ಮಿ.ಮೀ ಮಳೆಯಾಗಿತ್ತು. ನಗರದಲ್ಲಿ ಜೂನ್ ತಿಂಗಳಲ್ಲಿ 87 ಮಿ. ಮೀ ವಾಡಿಕೆ ಮಳೆ’ ಎಂದು ಭಾರತೀಯ ಹವಾಮಾನ ಇಲಾಖೆ ಬೆಂಗಳೂರು ಕೇಂದ್ರದ ನಿರ್ದೇಶಕ ಸುಂದರ್ ಎಂ. ಮೇತ್ರಿ ‘ಪ್ರಜಾವಾಣಿ’ಗೆ ತಿಳಿಸಿದರು.
ಮರ ಧರೆಗೆ: ಮಳೆಯಿಂದಾಗಿ ನಗರ ಪೊಲೀಸ್ ಆಯುಕ್ತರ ಕಚೇರಿ ಹಿಂಭಾಗದ ಅಲಿ ಅಸ್ಗರ್ ರಸ್ತೆಯಲ್ಲಿ ಬೃಹತ್ ಮರವೊಂದು ಬಿದ್ದು, ಕಾರುಗಳು ಜಖಂಗೊಂಡಿವೆ. ಎಂ.ಎಸ್.ರಾಮಯ್ಯ ಆಸ್ಪತ್ರೆ ಸಮೀಪ ಮರದ ಕೊಂಬೆಯೊಂದು ಮುರಿದು ಕೇಬಲ್ ಮೇಲೆ ಬಿದ್ದಿದೆ. ಆದರೆ,ಯಾವುದೇ ಹಾನಿ ಸಂಭವಿಸಿಲ್ಲ.