ನಟನಾ ಪಯಣದಲ್ಲಿ ಕಾರ್ತಿಕ್‌ ಸಮಗ್‌

ಸಿನಿಮಾ ನಾಯಕನಾಗಬೇಕೆಂದು ನಾಲ್ಕನೇ ತರಗತಿಯಲ್ಲೇ ಗುಂಗು ಹತ್ತಿಸಿಕೊಂಡು ತನಗೆ ತಾನೇ ನಾಯಕನಂತೆಯೇ ‘ಬಿಲ್ಡಪ್’ ಕೊಟ್ಟುಕೊಳ್ಳುತ್ತ, ತರಗತಿಯಲ್ಲಿ ಸ್ನೇಹಿತರಿಗೆಲ್ಲ ತಾನು ಕರಾಟೆಯಲ್ಲಿ ಬ್ಲ್ಯಾಕ್ ಬೆಲ್ಟ್, ನನ್ನ ಸುದ್ದಿಗೆ ಬಂದರೆ ಚೆನ್ನಾಗಿರಲ್ಲ ಹಾಗೆ ಹೀಗೆ ಎಂದೆಲ್ಲ ಸುಳ್ಳೇ ಪೋಸ್ ಕೊಟ್ಟುಕೊಳ್ಳುತ್ತಿದ್ದ ಹುಡುಗ ಕಾರ್ತಿಕ್ ಸಮಗ್ ಆಗಲೇ ಹಲವಾರು ನಟರನ್ನು ಅನುಸರಿಸುವುದನ್ನು ರೂಢಿಸಿಕೊಂಡಿದ್ದರು.

ಸಿನಿಮಾ ಉದ್ಯಮಕ್ಕೆ ಬರಲೇಬೇಕೆಂಬ ಹಂಬಲ ಮತ್ತು ಇಲ್ಲಿಗೆ ಬಂದ ಮೇಲೆ ‘ಇವನಿಗೆ ಏನೂ ಗೊತ್ತಿಲ್ಲ’ ಎಂದು ಹಿನ್ನಡೆಯಾಗಬಾರದೆಂಬ ಕಾರಣಕ್ಕೆ ತಾನು ಮೊದಲು ಹೇಳಿದ್ದ ಎಲ್ಲ ಸುಳ್ಳುಗಳನ್ನು ಒಂದೊಂದಾಗಿ ನಿಜವಾಗಿಸಿಕೊಳ್ಳುತ್ತ ಬಂದರು ಕಾರ್ತಿಕ್. ಸಿನಿಮಾಕ್ಕೆ ಏನೆಲ್ಲ ಅವಶ್ಯವಿದೆ ಎಂಬುದನ್ನು ತಿಳಿವ ಆಸಕ್ತಿ ಮತ್ತು ಅದನ್ನು ಸಾಧಿಸಿಕೊಳ್ಳುವ ಪರಿಶ್ರಮವೇ ಇಂದು ಅವರಿಗೆ ನಾಯಕನ ಪಟ್ಟವನ್ನು ತಂದುಕೊಟ್ಟಿದೆ ಎಂದರೆ ಸುಳ್ಳಲ್ಲ.

ಕಿರುತೆರೆಯ ಅವಕಾಶ...
ಉಡುಪಿಯಲ್ಲಿ ಶಿಕ್ಷಣ ಮುಗಿಸಿದ ಕಾರ್ತಿಕ್ ಎಂ.ಕಾಂ ಪದವೀಧರರು. ಕಾಲೇಜಿನಲ್ಲಿದ್ದಾಗಲೇ ‘ಕಂಚಿಂದ ಬಾಲೆ’ ಎಂಬ ತುಳು ಚಿತ್ರಕ್ಕೆ ಕಲಾ ನಿರ್ದೇಶನ ಮಾಡಿದ್ದ ಕಾರ್ತಿಕ್ ಉದ್ಯಮದ ಸಂಪರ್ಕ ಬೆಳೆಸಿಕೊಂಡರು. ಅದರ ಫಲವಾಗಿ ಶಿವಧ್ವಜ್ ಶೆಟ್ಟಿ ಎಂಬುವವರ ಕೊಡವ ಚಿತ್ರವೊಂದಕ್ಕೆ ಆಯ್ಕೆಯಾದರು. ದುರಾದೃಷ್ಟವೆಂದರೆ ‘ಕಂಚಿಂದ ಬಾಲೆ’ಯಲ್ಲಿನ ಅಹೋರಾತ್ರಿ ಕೆಲಸದ ಪರಿಣಾಮವಾಗಿ ಒಂದೇ ತಿಂಗಳಲ್ಲಿ ಹತ್ತು ಕೆಜಿಯಷ್ಟು ತೂಕ ಇಳಿದುಹೋದ ಕಾರ್ತಿಕ್‌ಗೆ ಆ ಅವಕಾಶ ಕೈ ತಪ್ಪಿತು. ಕಲಾವಿದನಾಗಿ ಅಲ್ಲದಿದ್ದರೂ ಚಿತ್ರ ತಂಡದಲ್ಲಿ ಯಾವುದಾದರೂ ಕೆಲಸ ಸಿಕ್ಕರೆ ಸಾಕು ಎಂದುಕೊಂಡ ಅವರು ಅಲ್ಲಿಯೂ ಕಲಾ ನಿರ್ದೇಶಕನಾಗಿಯೇ ದುಡಿದರು. ಇವರ ಆಸಕ್ತಿಯನ್ನು ಕಂಡ ಶಿವಧ್ವಜ್ ಧಾರಾವಾಹಿ ನಿರ್ದೇಶಕ ರವಿ ಗರಣಿ ಅವರ ಬಳಿ ಕಳುಹಿಸಿಕೊಟ್ಟರು. ಗರಣಿ ಅವರ ‘ಕೃಷ್ಣ ರುಕ್ಮಿಣಿ’ ಧಾರಾವಾಹಿಗೆ ಕ್ಯಾಷಿಯರ್ ಆದ ಕಾರ್ತಿಕ್‌ಗೆ ಮುಂದೆ ಗರಣಿ ಅವರದೇ ‘ಅರಗಿಣಿ’ ಧಾರಾವಾಹಿಯಲ್ಲಿ ಅವಕಾಶ ಸಿಕ್ಕಿತು. ಈ ಬಿಡುವಿನಲ್ಲಿ ‘ಗುರುರಾಘವೇಂದ್ರ ವೈಭವ’, ‘ಪ್ರೀತಿಯಿಂದ’ ಧಾರಾವಾಹಿಗಳಲ್ಲೂ ಸಣ್ಣ ಪುಟ್ಟ ಪಾತ್ರಗಳಲ್ಲಿ ಅಭಿನಯಿಸಿದ್ದರು.
‘ಅರಗಿಣಿ’ಯ ಅಭಿನಯದಿಂದಾಗಿ ಸೀತಾರಾಂ ಭಟ್ ಅವರ ಪರಿಚಯವಾಗಿ ಅವರ ಮೊದಲ ನಿರ್ದೇಶನದ ‘ಡೈನಮಿಕ್’ ಚಿತ್ರಕ್ಕೆ ನಾಯಕನಾದರು.

ಖಳನಿಂದ ನಾಯಕನವರೆಗೆ...
‘ಅರಗಿಣಿ’ಯಲ್ಲಿ ನೆಗೆಟಿವ್ ಶೇಡ್ ಇರುವ ಪಾತ್ರ ಮಾಡಿದ್ದ ಕಾರ್ತಿಕ್‌ಗೆ, ಈ ಪಾತ್ರಕ್ಕೆ ತಾನು ಸರಿಹೊಂದುತ್ತೇನಾ ಎಂಬ ಪ್ರಶ್ನೆಯಿತ್ತು. ಆದರೆ ಅದು ಅಂಥ ಕಷ್ಟವೇನೂ ಆಗಲಿಲ್ಲವಂತೆ. ನೋಡೋಕೆ ಚಾಕಲೇಟ್ ಹೀರೊ ಥರ ಕಾಣುವ ಕಾರ್ತಿಕ್ ಮೊದಲ ಚಿತ್ರ ‘ಡೈನಾಮಿಕ್’ನಲ್ಲೂ ‘ರಫ್ ಅಂಡ್ ಟಫ್’ ಪಾತ್ರವೇ.

ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಬೇಕೆಂಬುದು ಕಾರ್ತಿಕ್ ಆಸೆ. ಆದರೆ ನಾಯಕನಿಗೆ ಸಿಕ್ಕಷ್ಟು ಪ್ರಚಾರ ಬೇರೆಯವರಿಗೆ ಸಿಗುವುದಿಲ್ಲ ಎಂಬ ಕಾರಣಕ್ಕೆ ನಾಯಕನೇ ಆಗಬೇಕು ಎಂದು ಹಂಬಲಿಸಿದರು. ವಿಲನ್ ಪಾತ್ರಕ್ಕೂ ಹೆಚ್ಚಿನ ಮಹತ್ವ ಇರುತ್ತದಾದ್ದರಿಂದ ಆ ಪಾತ್ರಕ್ಕೂ ಸೈ. ಮೊದಲ ಚಿತ್ರ ಬಿಡುಗಡೆ ಆಗುವ ಮುನ್ನವೇ ಮತ್ತೊಂದೆರಡು ಅವಕಾಶಗಳೂ ಬಂದಿದೆ. ಸದ್ಯ ‘ಅಕ್ಕ’ ಧಾರಾವಾಹಿಯಲ್ಲೂ ನಟಿಸುತ್ತಿರುವ ಕಾರ್ತಿಕ್, ಸಿನಿಮಾದಲ್ಲಿ ಒಂದು ಹಂತಕ್ಕೆ ಬೆಳೆದ ಮೇಲೆ ಅದೇ ಅವರ ಕರ್ಮಭೂಮಿಯಾಗಲಿದೆ.