ನ್ಯೂಯಾರ್ಕ್‌ (ಪಿಟಿಐ): ‘ನಾನು ಸಲಿಂಗಕಾಮಿ ಎಂದು ಹೇಳಿಕೊಳ್ಳಲು ನನಗೆ ಹೆಮ್ಮೆ ಎನಿಸುತ್ತದೆ . ದೇವರು ನನಗೆ ನೀಡಿರುವ ವರ ಎಂದು ಭಾವಿಸುತ್ತೇನೆ’ ಎಂದು ಆ್ಯಪಲ್‌ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಟಿಮ್‌ ಕುಕ್‌ ಗುರುವಾರ ಬಹಿರಂಗ ಹೇಳಿಕೆ ನೀಡಿದರು.
ಬ್ಲೂಮ್‌ಬರ್ಗ್‌ ಪತ್ರಿಕೆಗೆ ಬರೆದ ಲೇಖನದಲ್ಲಿ ಕುಕ್‌ ಈ ರೀತಿ ಹೇಳಿಕೊಂಡಿದ್ದಾರೆ.
‘ನಾನು ಸಲಿಂಗಕಾಮಿ ಎನ್ನುವ ಸತ್ಯವನ್ನು ಬಹಿರಂಗಪಡಿಸುವುದು ಅಷ್ಟು ಸುಲಭವಲ್ಲ. ಆದರೆ ಆ್ಯಪಲ್‌ನಂತಹ ಪ್ರತಿಷ್ಠಿತ ಕಂಪೆನಿಯ ಸಿಇಒ ಒಬ್ಬ ಸಲಿಂಗಕಾಮಿ ಎನ್ನುವುದು ಬಹಿರಂಗವಾದರೆ, ಸಲಿಂಗಕಾಮಿಯಾಗಿದ್ದೂ ಬೇರೆಯವರೊಂದಿಗೆ ಹೇಳಿಕೊಳ್ಳಲಾಗದೆ ಒಂಟಿತನ ಅನುಭವಿಸುತ್ತಿರುವವರಿಗೆ ತುಸು ಧೈರ್ಯ ಬರುತ್ತದೆ ಎನ್ನುವುದಷ್ಟೇ ನನ್ನ ಉದ್ದೇಶ’ ಎಂದಿದ್ದಾರೆ.
