ಅಬುಜಾ (ಎಎಫ್ಪಿ): ನೈಜೀರಿಯಾ ಎಬೋಲಾ ಮುಕ್ತವಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್ಒ) ಘೋಷಿಸಿದೆ. ಕಳೆದ 42 ದಿನಗಳಲ್ಲಿ ಅಲ್ಲಿ ಯಾವುದೇ ಎಬೋಲಾ ಪ್ರಕರಣ ವರದಿಯಾಗಿಲ್ಲ. ಹಾಗಾಗಿ ನೈಜೀರಿಯಾದಲ್ಲಿ ಎಬೋಲಾ ಇಲ್ಲ ಎಂದು ಡಬ್ಲ್ಯುಎಚ್ಒ ಹೇಳಿದೆ.
‘ನೈಜೀರಿಯಾ ಎಬೋಲಾ ಸೋಂಕನ್ನು ಹಿಮ್ಮೆಟ್ಟಿಸಿದೆ. ಎಬೋಲಾ ವೈರಸನ್ನು ತಡೆಯುವುದಕ್ಕೆ ಸಾಧ್ಯ ಎಂಬುದನ್ನು ಜಗತ್ತಿಗೆ ತೋರಿಸಿದ ದೊಡ್ಡ ಯಶೋಗಾಥೆ ಇದು’ ಎಂದು ಡಬ್ಲ್ಯುಎಚ್ಒ ಪ್ರತಿನಿಧಿ ರುಯಿ ಗಾಮಾ ವಾಸ್ ಹೇಳಿದ್ದಾರೆ.
ಈ ವರ್ಷದ ಆರಂಭದಲ್ಲಿ ಕಾಣಿಸಿಕೊಂಡ ಮಾರಕ ಎಬೋಲಾ ಸೋಂಕಿನಿಂದಾಗಿ ಪಶ್ಚಿಮ ಆಫ್ರಿಕಾದ ದೇಶಗಳಲ್ಲಿ 4,500ಕ್ಕೂ ಹೆಚ್ಚು ಜನರು ಬಲಿಯಾಗಿದ್ದಾರೆ. 10 ಸಾವಿರಕ್ಕೂ ಹೆಚ್ಚು ಜನರಿಗೆ ಈ ಸೋಂಕು ತಗಲಿತ್ತು. ಎಬೋಲಾದಿಂದ ತತ್ತರಿಸಿದ್ದ ಸೆನೆಗಲ್ ದೇಶ ಕೂಡ ಈ ಸೋಂಕಿನಿಂದ ಮುಕ್ತವಾಗಿದೆ ಎಂದು ಶುಕ್ರವಾರ ಘೋಷಿಸಲಾಗಿದೆ.
ಸ್ಪೈನ್, ಅಮೆರಿಕ ಮುಂತಾದ ದೇಶಗಳಲ್ಲಿ ಕೂಡ ಎಬೋಲಾದ ಕೆಲವು ಪ್ರಕರಣಗಳು ವರದಿಯಾಗಿದ್ದವು. ಹಾಗಾಗಿ ಇಡೀ ಜಗತ್ತಿಗೆ ಸೋಂಕು ವ್ಯಾಪಿಸುವ ಭೀತಿಯೂ ಉಂಟಾಗಿತ್ತು.