ಅಬುಧಾಬಿ (ಪಿಟಿಐ/ಐಎಎನ್ಎಸ್): ಭಾರತೀಯರನ್ನು ಕೆಲಸಕ್ಕೆ ನೇಮಿಸಿಕೊಳ್ಳುವ ವ್ಯಕ್ತಿಗಳು ಅಥವಾ ಸಂಸ್ಥೆಗಳು ಆನ್ಲೈನ್ ಮೂಲಕ ತನ್ನ ವೆಬ್ಸೈಟ್ನಲ್ಲಿ ಕಡ್ಡಾಯವಾಗಿ ನೋಂದಣಿ ಮಾಡಿಕೊಳ್ಳಬೇಕು ಎಂದು ಯುಎಇಯಲ್ಲಿರುವ ಭಾರತ ರಾಯಭಾರ ಕಚೇರಿ ಸೂಚಿಸಿದೆ.
ಈ ಸಂಬಂಧ ಭಾರತ ರಾಯಭಾರ ಕಚೇರಿ ಪ್ರಕಟಣೆ ಹೊರಡಿಸಿದ್ದು, ತನ್ನ ವೆಬ್ಸೈಟ್ www.emigrate.gov.in ನಲ್ಲಿ ನೋಂದಣಿ ಮಾಡಿಕೊಂಡ ಆನಂತರವೇ ಕೆಲಸಗಾರರ ನೇರ ನೇಮಕಕ್ಕೆ ಇಲ್ಲವೇ ನೇಮಕಾತಿ ದಲ್ಲಾಳಿಗಳಿಗೆ ಅನುಮತಿ ನೀಡಲಾಗುವುದು ಎಂದಿದೆ.
ಈ ಹೊಸ ವ್ಯವಸ್ಥೆಯನ್ನು ವಿವಿಧ ಹಂತಗಳಲ್ಲಿ ಜಾರಿ ಮಾಡಲಾಗುವುದು. 50ರಿಂದ 150 ಭಾರತೀಯ ಕೆಲಸಗಾರರನ್ನು ನೇಮಿಸಿಕೊಳ್ಳುವವರು ಜೂನ್ 30ರ ಒಳಗೆ, 20ರಿಂದ 50 ಕೆಲಸಗಾರರನ್ನು ನೇಮಿಸಿಕೊಳ್ಳುವವರು ಜುಲೈ 31ರ ಒಳಗೆ ಹಾಗೂ 20ಕ್ಕಿಂತ ಕಡಿಮೆ ಕೆಲಸಗಾರರನ್ನು ನೇಮಿಸಿಕೊಳ್ಳುವವರು ಆಗಸ್ಟ್ 31ರ ಒಳಗೆ ನೋಂದಣಿ ಮಾಡಿಕೊಳ್ಳಬೇಕು ಎಂದು ಹೇಳಿದೆ. ನೋಂದಣಿ ಮಾಡುವಾಗ ಕೆಲಸದ ಅವಧಿ, ಷರತ್ತುಗಳು, ಇತರೆ ವಿವರ ದಾಖಲಿಸಬೇಕು ಎಂದು ಸೂಚಿಸಿದೆ.