ನ.10ಕ್ಕೆ ಮೊದಲ ಹೈಸ್ಪೀಡ್‌ ರೈಲು ಸಂಚಾರ
ಕಪುರ್ತಲಾ (ಪಂಜಾಬ್‌) (ಪಿಟಿಐ): ಗಂಟೆಗೆ 160 ಕಿ.ಮೀ. ವೇಗದಲ್ಲಿ ಸಾಗುವ ದೆಹಲಿ–ಆಗ್ರಾ ನಡುವಣ ಮೊದಲ ಹೈಸ್ಪೀಡ್‌ ರೈಲು ನ.10 ರಂದು ಪ್ರಯಾಣ ಆರಂಭಿಸುವ ಸಾಧ್ಯತೆ ಇದೆ. ಕಪುರ್ತಲಾದಲ್ಲಿನ ರೈಲು ಬೋಗಿಗಳ ಕಾರ್ಖಾನೆಯಲ್ಲಿ (ಆರ್‌ಸಿಎಫ್‌) ಈ ರೈಲಿನ ಬೋಗಿಗಳನ್ನು ತಯಾರಿಸುವ ಕೆಲಸ ನಡೆಯುತ್ತಿದೆ.
ಈಗಾಗಲೇ ಆರ್‌ಸಿಎಫ್‌ ನಾಲ್ಕು ಬೋಗಿಗಳನ್ನು ನಿರ್ಮಿಸಿದೆ. ಇನ್ನುಳಿದ 10 ಬೋಗಿಗಳನ್ನು ನಿರ್ಮಿಸುವ ಕಾರ್ಯ ಪ್ರಗತಿಯಲ್ಲಿದೆ ಎಂದು ಆರ್‌ಸಿಎಫ್‌ನ ಪ್ರಧಾನ ವ್ಯವಸ್ಥಾಪಕ ಪ್ರಮೋದ್‌ ಕುಮಾರ್‌ ಹೇಳಿದ್ದಾರೆ. ಆರ್‌ಸಿಎಫ್‌ ತಂತ್ರಜ್ಞರು ಈಗಾಗಲೇ ಸಂಶೋಧನೆ ಅಭಿವೃದ್ಧಿ ಮತ್ತು ಮಾನಕ ಸಂಸ್ಥೆ (ಆರ್‌ಡಿಎಸ್‌ಒ) ಜತೆ ಬೋಗಿ ನಿರ್ಮಾಣಕ್ಕೆ ಸಲಹೆ ಪಡೆದಿದ್ದು, ಶತಾಬ್ಧಿ ಮತ್ತು ರಾಜಧಾನಿ ರೈಲುಗಳಿಗಿಂತ ಹೆಚ್ಚಿನ ವೇಗದಲ್ಲಿ ಹೈಸ್ಪೀಡ್‌ ರೈಲು ಸಾಗುವಂತೆ ಎಂಜಿನ್‌ನಲ್ಲಿ ಬದಲಾವಣೆಗಳನ್ನು ಮಾಡಲಿದ್ದಾರೆ.
ಹೊಗೆ ಮತ್ತು ಬೆಂಕಿ ಕಾಣಿಸಿಕೊಂಡಾಗ ಕೈಗೊಳ್ಳಬೇಕಾದ ತುರ್ತು ಕ್ರಮ, ಒಳಭಾಗದ ಬಾಗಿಲುಗಳು ಸ್ವಯಂಚಾಲಿತವಾಗಿ ತೆರೆಯುವುದು ಮತ್ತು ಪ್ರಯಾಣಿಕರ ಮಾಹಿತಿ ವ್ಯವಸ್ಥೆಯನ್ನು ರೂಪಿಸಲು ಸಲಹೆ ಪಡೆದಿದ್ದಾರೆ. ಮೊದಲ ಹೈಸ್ಪೀಡ್‌ ರೈಲಿನ ನಿರ್ಮಾಣ ವೆಚ್ಚ ಅಂದಾಜು ₨2.25 ಕೋಟಿಯಷ್ಟಾಗಲಿದೆ ಎಂದು ಕುಮಾರ್‌ ಮಾಹಿತಿ ನೀಡಿದ್ದಾರೆ.
ರೈಲ್ವೆ ಸಚಿವರು ತಮ್ಮ ಮುಂಗಡ ಪತ್ರದಲ್ಲಿ ಪ್ರಸ್ತಾಪಿಸಿದಂತೆ ದೇಶದ 10 ಮಾರ್ಗಗಳನ್ನು ಹೈಸ್ಪೀಡ್‌ ರೈಲುಗಳ ಸಂಚಾರಕ್ಕೆ ಗುರುತಿಸಲಾಗಿದೆ. ಆರಂಭ ದಲ್ಲಿ ಈ ರೈಲಿನ ವೇಗ ಗಂಟೆಗೆ 160 ಕಿ.ಮೀ. ಇದ್ದು, ಸಿಗ್ನಲ್ ಮತ್ತಿತರ ವ್ಯವಸ್ಥೆಗಳನ್ನು ಮೇಲ್ದರ್ಜೆಗೇರಿಸಿದ ನಂತರ ಗಂಟೆಗೆ 200 ಕಿ.ಮೀ.ಗೆ ಹೆಚ್ಚಿಸ-ಲಾಗುತ್ತದೆ.
ರೈಲ್ವೆ ಇಲಾಖೆಯು ಈಗಾಗಲೇ ದೆಹಲಿ– ಆಗ್ರಾ ವಲಯದಲ್ಲಿ ಗಂಟೆಗೆ 160 ಕಿ.ಮೀ. ವೇಗದಲ್ಲಿ ರೈಲನ್ನು ಪ್ರಯೋಗಾರ್ಥವಾಗಿ ಓಡಿಸಿದೆ. ಈ ರೈಲು 200 ಕಿ.ಮೀ. ದೂರವನ್ನು 99 ನಿಮಿಷದಲ್ಲಿ ಕ್ರಮಿಸಿತ್ತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.