ಪತಿ ಒಳಿತಿಗೆ ಜಶೋದಾಬೆನ್ ಧ್ಯಾನ
ಮೆಹ್ಸಾನಾ, ಗುಜರಾತ್‌ (ಪಿಟಿಐ): ರಾಜಕೀಯ ವಿರೋಧಿಗಳು, ನರೇಂದ್ರ ಮೋದಿ ಅವರನ್ನು ರಾಜಕೀಯವಾಗಿ ಹಣಿಯಲು ಅವರ ಪತ್ನಿಯ ಹೆಸರನ್ನು ಬಳಸಿಕೊಳ್ಳುತ್ತಿದ್ದರೂ, ಹಲವು ದಶಕಗಳ ಹಿಂದೆಯೇ ಗಂಡನಿಂದ ಪ್ರತ್ಯೇಕವಾಗಿರುವ ಜಶೋದಾಬೆನ್ ಮಾತ್ರ ತಮ್ಮ ಪತಿ ಪ್ರಧಾನಿಯಾಗಬೇಕೆಂದು ಹಗಲುರಾತ್ರಿ ಉಪವಾಸ ಮತ್ತು ಪ್ರಾರ್ಥನೆಯಲ್ಲಿ ತೊಡಗಿದ್ದಾರೆ.
62 ವರ್ಷದ ಈ ನಿವೃತ್ತ ಶಿಕ್ಷಕಿಯು ಏಕಾಂತದಲ್ಲಿದ್ದುಕೊಂಡು, ಅನ್ನವನ್ನೂ ಸೇವಿಸದೆ, ಪತಿ ಮೋದಿ ಪ್ರಧಾನಿ ಪಟ್ಟ ಏರುವ ತನಕವೂ ಧ್ಯಾನದಲ್ಲಿ ಮಗ್ನರಾಗಿರುವುದಾಗಿ ಜಶೋದಾಬೆನ್ ಸಹೋದರ ಕಮಲೇಶ್‌ ತಿಳಿಸಿದ್ದಾರೆ. ತನ್ನ ಪತಿ ಮುಖ್ಯಮಂತ್ರಿ ಹುದ್ದೆಯಿಂದ ಪ್ರಧಾನಿ ಸ್ಥಾನಕ್ಕೆ ಏರಬೇಕೆಂದು ಜಶೋದಾಬೆನ್ ಹೃದಯಪೂರ್ವಕ ಪ್ರಾರ್ಥನೆ ಮಾಡುತ್ತಿದ್ದಾರೆ.
ಈ ಆಸೆ ಪೂರೈಕೆಗಾಗಿ ಅವರು ಬದರೀನಾಥ, ಗಂಗೋತ್ರಿ ಮತ್ತು ಯಮುನೋತ್ರಿಗೆ ‘ಚಾರ್‌ಧಾಮ್‌ ತೀರ್ಥಯಾತ್ರೆ’ ಕೈಗೊಂಡಿರುವುದಾಗಿಯೂ ಸಹೋದರ ಹೇಳಿದ್ದಾರೆ. ಉತ್ತರ ಗುಜರಾತ್‌ನ ಮೆಹ್ಸಾನಾ ಜಿಲ್ಲೆಯ ಪುಟ್ಟ ಇಶ್ವಾರ್ವದಾ ಗ್ರಾಮದಲ್ಲಿ ಇಬ್ಬರು ಸಹೋದರರೊಂದಿಗೆ ಜಶೋದಾಬೆನ್ ನೆಲೆಸಿದ್ದಾರೆ. ಕುಟುಂಬದ ಪ್ರಕಾರ, ಅವರು ದೈವಭಕ್ತರಾಗಿದ್ದು ಸರಳ ಜೀವನ ಸಾಗಿಸುತ್ತಿದ್ದಾರೆ.
ಬೆಳಿಗ್ಗೆ ಎದ್ದು ಸ್ವಲ್ಪ ಹೊತ್ತು ನಡೆದು, ದೇವಸ್ಥಾನಕ್ಕೆ ಹೋಗಿ ಪೂಜೆ ಸಲ್ಲಿಸುತ್ತಾರೆ. ನಂತರ ಟಿವಿ ಸುದ್ದಿ ಚಾನೆಲ್‌ಗಳನ್ನು ನೋಡಿ ವೃತ್ತಪತ್ರಿಕೆ ವರದಿಗಳನ್ನು ಓದಿ, ಎಂದಿನ ಕೆಲಸ ಕಾರ್ಯಗಳಲ್ಲಿ ತೊಡಗುತ್ತಾರೆ.ಪತಿಯ ಬಗ್ಗೆ ಯಾರಾದರೂ ಕೆಟ್ಟದನ್ನು ಮಾತಾಡಿದರೆ ಜಶೋದಾಬೆನ್ ಸಹಿಸುವುದಿಲ್ಲ. ಸೌಮ್ಯ ಸ್ವಭಾವದವರಾದ ಅವರು ಯಾರ ವಿರುದ್ಧವೂ ಧ್ವನಿ ಎತ್ತುವುದಿಲ್ಲ. ಕುಟುಂಬದಲ್ಲಿ ಹಿರಿಯ ಮಗಳಾದ ಅವರು, ಮೋದಿ ಅವರನ್ನು 1968ರಲ್ಲಿ 17 ವರ್ಷದವರಿದ್ದಾಗ ವಿವಾಹವಾಗಿದ್ದರು.
ಗುಜರಾತ್‌ ವಾರಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ ಮೋದಿ ಅವರೊಂದಿಗೆ ಕೆಲಕಾಲ ಮಾತ್ರ ಬಾಳಿರುವುದಾಗಿ ಜಶೋದಾಬೆನ್ ಹೇಳಿದ್ದಾರೆ.ಮೋದಿ ವಿವಾಹವಾದ ಕೆಲವೇ ಸಮಯದಲ್ಲಿ ಆರ್ಎಸ್‌ಎಸ್‌ ಪ್ರಚಾರಕರಾಗಿ ತೆರಳಿದರು.ಪತಿಯ ಪ್ರೋತ್ಸಾಹದಿಂದ ಪ್ರಾಥಮಿಕ ಶಾಲೆ ಶಿಕ್ಷಕರ ತರಬೇತಿ ಕೋರ್ಸ್‌ ಮಾಡಿ ಸರ್ಕಾರಿ ಶಿಕ್ಷಕಿಯಾಗಿ ಉದ್ಯೋಗವನ್ನೂ ಪಡೆದಿದ್ದರು ಎನ್ನಲಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.