ಪದ್ಮನಾಭ ರೆಡ್ಡಿ ಹೆಸರಿಗೆ ಆಯುಕ್ತರ ತಾಯಿ ಆಸ್ತಿ!

ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಒಳಗಿನ ಖಾತಾ ಮಾಫಿಯಾದ ಕರಾಮತ್ತು ಗುರುವಾರ ನಡೆದ ಕೌನ್ಸಿಲ್‌ ಸಭೆಯಲ್ಲಿ ಮತ್ತೆ ಬೆಳಕಿಗೆ ಬಂತು. ಸ್ವತಃ ಬಿಬಿಎಂಪಿ ಆಯುಕ್ತ ಎಂ. ಲಕ್ಷ್ಮೀನಾರಾಯಣ ಅವರ ತಾಯಿಗೆ ಸೇರಿದ ಆಸ್ತಿಯನ್ನು ಕಾಚರಕನಹಳ್ಳಿ ವಾರ್ಡ್‌ನ ಸದಸ್ಯ ಪದ್ಮನಾಭ ರೆಡ್ಡಿ ತಮ್ಮ ಹೆಸರಿಗೆ ವರ್ಗಾಯಿಸಿಕೊಂಡ ಖಾತಾ ದಾಖಲೆ ತಂದಿದ್ದರು!

‘ಬಾಣಸವಾಡಿ ವಿಭಾಗದ ಸುಬ್ಬಯ್ಯನಪಾಳ್ಯ­ದಲ್ಲಿರುವ ವೆಂಕಟಮ್ಮ ಅವರಿಗೆ ಸೇರಿದ 7,000 ಚದರ ಅಡಿ ನಿವೇಶನವನ್ನು (ಸಂಖ್ಯೆ 1085/2) ನನ್ನ ಹೆಸರಿಗೆ ವರ್ಗಾಯಿಸಿಕೊಂಡಿದ್ದೇನೆ’ ಎಂದು ಹೇಳಿದ ಅವರು, ಖಾತಾ ದಾಖಲೆಯನ್ನೂ ಪ್ರದರ್ಶಿಸಿದಾಗ ಸಭೆಯಲ್ಲಿದ್ದ ಸದಸ್ಯರೆಲ್ಲ ಸೋಜಿಗ ವ್ಯಕ್ತಪಡಿಸಿದರು. ಆದರೆ, ಬಿಬಿಎಂಪಿ ದಾಖಲೆಗಳಲ್ಲಿ ವೆಂಕಟಮ್ಮ ಅವರ ಹೆಸರೇ ಇತ್ತು.

‘ಸುಬ್ಬಯ್ಯನಪಾಳ್ಯದ ಆಸ್ತಿಗೆ ನಾನು ಕಳೆದ ಎಂಟು ವರ್ಷಗಳಿಂದ ತೆರಿಗೆ ತುಂಬುತ್ತಿದ್ದೇನೆ. ಬಿಬಿಎಂಪಿ ಆಯುಕ್ತರು ನನ್ನ ಆಸ್ತಿಯನ್ನು ಕಸಿದುಕೊಂಡಿದ್ದು, ಸದಸ್ಯರು ನೆರವಿಗೆ ಬರಬೇಕು’ ಎಂದು ಪದ್ಮನಾಭ ರೆಡ್ಡಿ ತಮಾಷೆಯಾಗಿ ಹೇಳಿದರು. ಆಯುಕ್ತರ ಸೂಚನೆಯಂತೆ ಆ ಆಸ್ತಿಗೆ ಸಂಬಂಧಿಸಿದ ದಾಖಲೆ ಪರಿಶೀಲಿಸಿದ ಅಧಿಕಾರಿಗಳು ಸದಸ್ಯರು  ತಂದಿರುವುದು ನಕಲಿ ಖಾತಾ ಪತ್ರ ಎಂಬುದನ್ನು ಪತ್ತೆ ಮಾಡಿದರು.

ಬಳಿಕ ಸ್ಪಷ್ಟನೆ ನೀಡಿದ ಆಯುಕ್ತರು, ‘ಪದ್ಮನಾಭ ರೆಡ್ಡಿ ಅವರು ತಂದಿರುವುದು ನಕಲಿ ಖಾತಾ ಪತ್ರ. ಬಿಬಿಎಂಪಿ ಖಾತಾ ಪತ್ರದಲ್ಲಿ ಒಂಬತ್ತು ಅಂಕಿಗಳು ಇರುತ್ತವೆ. ಆದರೆ, ಈ ನಕಲಿ ಪತ್ರದಲ್ಲಿ ಏಳು ಅಂಕಿಗಳು ಮಾತ್ರ ಇವೆ. ಬಿಬಿಎಂಪಿ ವಾಟರ್‌ ಮಾರ್ಕ್‌ ಸಹ ರೆಡ್ಡಿ ಅವರ ಖಾತಾ ಪತ್ರದಲ್ಲಿಲ್ಲ. ಈ ಆಸ್ತಿಗೆ ಸಂಬಂಧಿಸಿದ ಯಾವ ದಾಖಲೆಗಳೂ ಬದಲಾಗಿಲ್ಲ’ ಎಂದು ವಿವರಿಸಿದರು.

‘ನಾನು ಈ ಖಾತಾ ಪತ್ರ ಪಡೆಯಲು ₨ 5,000 ಲಂಚ ನೀಡಿದ್ದೇನೆ. ಲಂಚ ಕೊಟ್ಟರೆ ಯಾವ ದಾಖಲೆ ಬೇಕಾದರೂ ಬಿಬಿಎಂಪಿಯಲ್ಲಿ ಸಿಗುತ್ತದೆ ಎನ್ನುವುದಕ್ಕೆ ಇದೊಂದು ಉದಾಹರಣೆಯಷ್ಟೇ’ ಎಂದು ಪದ್ಮನಾಭ ರೆಡ್ಡಿ ಹೇಳಿದರು. ‘ನಕಲಿ ಖಾತೆಗಳ ಹಾವಳಿ ತಡೆಗಟ್ಟಲು ಕ್ರಮ ಕೈಗೊಳ್ಳಲಾಗುವುದು’ ಎಂದು ಆಯುಕ್ತರು ಭರವಸೆ ನೀಡಿದರು.

ಯಲಹಂಕ ವಲಯದ ಹೆಬ್ಬಾಳ ವಿಭಾಗದಲ್ಲಿ ಭೂಪರಿವರ್ತನೆ ಆಗದಿರುವ ಆಸ್ತಿಗಳಿಗೆ ಪ್ರತಿ ಚದರ ಮೀಟರ್‌ಗೆ ಕೇವಲ ₨ 100ರಂತೆ ಸುಧಾರಣಾ ವೆಚ್ಚ ಆಕರಿಸಿ ಖಾತೆ ಮಾಡಿಕೊಟ್ಟ ಹತ್ತು ಪ್ರಕರಣಗಳ ಮೇಲೂ ಅವರು ಬೆಳಕು ಚೆಲ್ಲಿದರು. ದಾಖಲೆಗಳನ್ನು ಪರಿಶೀಲಿಸಿದ ಕಂದಾಯ ವಿಭಾಗದ ಉಪ ಆಯುಕ್ತರು, ಹೆಬ್ಬಾಳ ವಿಭಾಗದ ಅಧಿಕಾರಿಗಳು ತಪ್ಪು ಮಾಡಿರುವುದು ಮೇಲ್ನೋಟಕ್ಕೆ ಸಾಬೀತಾಗಿದೆ ಎಂಬ ಮಾಹಿತಿಯನ್ನು ಆಯುಕ್ತರಿಗೆ ನೀಡಿದರು.

‘ಹೆಬ್ಬಾಳ ವಿಭಾಗದ ಕಂದಾಯ ಅಧಿಕಾರಿ, ಸಹಾಯಕ ಕಂದಾಯ ಅಧಿಕಾರಿ ಹಾಗೂ ಕಂದಾಯ ನಿರೀಕ್ಷಕ ಮೂವರನ್ನೂ ತಕ್ಷಣದಿಂದ ಜಾರಿಗೆ ಬರುವಂತೆ ಅಮಾನತು ಮಾಡಲಾಗಿದೆ’ ಎಂದು ಆಯುಕ್ತರು ಪ್ರಕಟಿಸಿದರು. ಮೂವರೂ ಅಧಿಕಾರಿಗಳ ವಿರುದ್ಧ ಇಲಾಖಾ ವಿಚಾರಣೆಗೆ ಆದೇಶವನ್ನೂ ನೀಡಿದರು.