ಪರಿಸರ ಸ್ನೇಹಿ ರಂಜಾನ್‌ ಆಚರಣೆ

ಮುಸ್ಲಿಮರಿಗೆ ಪವಿತ್ರ ಮಾಸ ‘ರಂಜಾನ್’. ಬೆಂಗಳೂರು ನಗರದಲ್ಲಿ ನೂರಾರು ಮಸೀದಿಗಳಿದ್ದು, ಸಂಜೆ ಇಫ್ತಾರ್‌ ಕೂಟದಲ್ಲಿ ಕನಿಷ್ಠ 100ರಿಂದ 2000ವರೆಗೆ ಜನರು ಒಟ್ಟು ಸೇರಿ ದಿನದ ಉಪವಾಸವನ್ನು ಅಂತ್ಯಗೊಳಿಸುತ್ತಾರೆ.

ಮಸೀದಿಯಲ್ಲಿ  ಇಫ್ತಾರ್‌ ಸಮಯಕ್ಕೆ ಹಣ್ಣು, ತಿಂಡಿ ಹಾಗೂ ಪಾನೀಯ ನೀಡುವುದು ಸಾಮಾನ್ಯ. ಇದಕ್ಕೆ ಬಳಸಿ ಬಿಸಾಕುವ ಪ್ಲಾಸ್ಟಿಕ್‌ ತಟ್ಟೆ, ಗ್ಲಾಸುಗಳನ್ನು ಬಳಸುತ್ತಾರೆ.  ಇದರಿಂದ  ಮಸೀದಿ ಆವರಣದಲ್ಲಿ ಕಸದ ರಾಶಿ ಹೆಚ್ಚುತ್ತಿರುವುದು ಸುಳ್ಳಲ್ಲ.

ರಂಜಾನ್‌ ಮಾಸವನ್ನು ‘ಪರಿಸರ ಸ್ನೇಹಿ’ಯನ್ನಾಗಿ ಆಚರಿಸಲು ಸಂಪಂಗಿರಾಮನಗರದ ನಾಲ್ವರು ಸ್ನೇಹಿತರು ಒಟ್ಟುಗೂಡಿ ತಮ್ಮ ಸ್ವಂತ ಹಣದಲ್ಲಿ ಶಿವಾಜಿನಗರದ ಸುತ್ತಮುತ್ತಲಿನ ಸುಮಾರು 46 ಮಸೀದಿಗಳಿಗೆ ಮರು ಬಳಕೆ ಮಾಡುವ ಪ್ಲಾಸ್ಟಿಕ್‌ ತಟ್ಟೆ, ಕಪ್‌ ಹಾಗೂ ಗ್ಲಾಸ್‌ ಸೆಟ್‌ಗಳನ್ನು ವಿತರಿಸಿದ್ದಾರೆ. 

ಎಂ.ಎಸ್‌. ಸುಫಿಯಾನ್‌,  ನವೀದ್‌ ಅಲಿ, ಶಬ್ಬೀರ್‌ ಅಹ್ಮದ್‌ ಹಾಗೂ ವಾಜೀದ್‌ ಅನ್ಸಾರಿ ದಾನಿಗಳು.

ತಂಡವು ಒಟ್ಟು ₹2 ಲಕ್ಷದ ಮೌಲ್ಯದ ಪ್ಲಾಸ್ಟಿಕ್‌ ಸೆಟ್‌ಗಳನ್ನು ಮಸೀದಿಗಳಿಗೆ ಹಂಚಿದೆ. ಈ  ನಾಲ್ವರು  ಬಾಲ್ಯ ಸ್ನೇಹಿತರಾಗಿದ್ದು, ನಗರದಲ್ಲಿ ಬೇರೆ ಬೇರೆ ಉದ್ಯಮ ನಡೆಸುತ್ತಿದ್ದಾರೆ.

‘ನಗರದಲ್ಲಿ ಪ್ಲಾಸ್ಟಿಕ್‌ ನಿಷೇಧ ಆಗಿದೆ. ಮಸೀದಿಯಲ್ಲಿ ಇಫ್ತಾರ್‌ ಕೂಟ ಸಮಯದಲ್ಲಿ ಪ್ಲಾಸ್ಟಿಕ್‌ ಉಪಯೋಗಿಸುವುದರಿಂದ ಕಸದ ಪ್ರಮಾಣ ಹೆಚ್ಚಾಗುವುದನ್ನು ನಾವು ಪ್ರತಿ ವರ್ಷ ನೋಡುತ್ತಿದ್ದೆವು.  ಇಫ್ತಾರ್‌  ಬಳಿಕ ಉಂಟಾದ ಕಸದ ರಾಶಿಯನ್ನು ಮರುದಿನ ಬಿಬಿಎಂಪಿ ಪೌರ ಕಾರ್ಮಿಕರು ಕೊಂಡೊಯ್ಯುತ್ತಿದ್ದರು. ಹಸಿ ತ್ಯಾಜ್ಯದಿಂದಾಗಿ ಸೊಳ್ಳೆ, ನಾಯಿಗಳ ಕಾಟ ಹೆಚ್ಚಾಗುತ್ತಿತ್ತು. ಹೀಗಾಗಿ ಮಸೀದಿಗಳಲ್ಲಿ ಇಫ್ತಾರ್‌ ನಂತರ ಮರು ಬಳಕೆ ಸಾಧ್ಯವಾಗುವಂತಹ ತಟ್ಟೆ, ಗ್ಲಾಸು, ಕಪ್‌ಗಳ ಸೆಟ್‌ ನೀಡಲು ಯೋಚಿಸಿದೆವು’ ಎಂದು ಸುಫಿಯಾನ್‌ ವಿವರಿಸುತ್ತಾರೆ. 

‘ಶಿವಾಜಿನಗರದ ಒಂದು ಮಸೀದಿಯಲ್ಲಿ ಕನಿಷ್ಠವೆಂದರೂ  200 ಜನ ಇಫ್ತಾರ್‌ ಕೂಟಕ್ಕೆ ಸೇರುತ್ತಾರೆ. ಒಬ್ಬರಿಗೆ ಒಂದು ತಟ್ಟೆ, ಗ್ಲಾಸು, ಕಪ್‌ ಎಂದು ಲೆಕ್ಕ ಹಾಕಿದರೆ ನೂರು ಜನರಿಗೆ 600 ಪ್ಲಾಸ್ಟಿಕ್‌ ತ್ಯಾಜ್ಯ ಕಸದ ರಾಶಿಗೆ ಸೇರುತ್ತವೆ. ಇಲ್ಲಿನ 6 ಮಸೀದಿಗಳಲ್ಲಿ 200 ಜನರು, ಉಳಿದ ದೊಡ್ಡ ಮಸೀದಿಗಳಲ್ಲಿ 2000ದಷ್ಟು ಜನರು ಸೇರುತ್ತಾರೆ.  ನಾವು  ತಟ್ಟೆಗಳನ್ನು ವಿತರಿಸಿದ ಬಳಿಕ ಕಸದ ಪ್ರಮಾಣದಲ್ಲಿ ಭಾರಿ ಕಡಿಮೆಯಾಗಿದೆ’ ಎಂದು ತಂಡದ ಮತ್ತೊಬ್ಬ ಸದಸ್ಯ ಶಬ್ಬೀರ್‌ ಅಹ್ಮದ್‌ ಹೇಳುತ್ತಾರೆ.

ಆರಂಭದಲ್ಲಿ ವಿರೋಧ
ಪರಿಸರ ಸ್ನೇಹಿ ರಂಜಾನ್‌ ಆಚರಣೆ ಮಾಡಬೇಕೆಂಬ ತಂಡದ ಪ್ರಯತ್ನಕ್ಕೆ ಮೊದಲು ಕೊಂಚ ಮಟ್ಟಿಗೆ ವಿರೋಧ ವ್ಯಕ್ತವಾಗಿತ್ತು.  ‘ಮಸೀದಿ ಆಡಳಿತ ಮಂಡಳಿಯವರು ‘ಇದೆಲ್ಲಾ ಬೇಕಾ?’ ಎಂದು ಪ್ರಶ್ನಿಸಿದ್ದರು. 

‘ಬಳಸಿ ಬಿಸಾಕುವ ತಟ್ಟೆಗಳಿಗೆ ಮಸೀದಿ  ಸಾವಿರಾರು ರೂಪಾಯಿ ಖರ್ಚು ಮಾಡುತ್ತದೆ. ಆದರ ಬದಲಾಗಿ ಮರುಬಳಸಲು ಸಾಧ್ಯವಾಗುವ ತಟ್ಟೆ ಬಳಸಿ ಎಂದು ಮನವೊಲಿಸಲಾಯಿತು’ ಎಂದು ಸುಫಿಯಾನ್‌ ತಿಳಿಸಿದರು.

ತಂಡದ ಈ ಕಾರ್ಯಕ್ಕೆ ಬೆಂಗಳೂರು ಪೂರ್ವದ ಜಂಟಿ ಕಮಿಷನರ್‌ ಯತೀಶ್‌ ಕುಮಾರ್‌ ಹಾಗೂ ಸರ್ಫಾರಾಜ್‌ ಅವರು  ಬೆಂಬಲ ನೀಡಿದರು. ಅವರು ಎಲ್ಲಾ ಮಸೀದಿಗಳಿಗೆ ಪ್ಲಾಸ್ಟಿಕ್‌ ನಿಷೇಧಿಸುವಂತೆ ಸೂಚಿಸಿ, ಸುಫಿಯಾನ್‌ ಅವರ ತಂಡ ನೀಡುವ ತಟ್ಟೆ, ಕಪ್‌ಗಳನ್ನು ಉಪಯೋಗಿಸುವಂತೆ ಸೂಚಿಸಿದರು.

ಸಂಜೆಯೇ ಕಸ ವಿಲೇವಾರಿ
ಇಫ್ತಾರ್‌ ಕೂಟ ಆದ ಬಳಿಕ ಸಂಜೆ ಸುಮಾರು 7.30ಕ್ಕೆ ಮಸೀದಿಗಳ ಆವರಣದಿಂದ ಕಸ ವಿಲೇವಾರಿ ನಡೆಯುತ್ತದೆ.
ಬಿಬಿಎಂಪಿ ಕಸದ ಆಟೊಗಳು ಮಸೀದಿಗೆ ಬಂದು ಇಫ್ತಾರ್ ಕೂಟದ ಕಸವನ್ನು ತೆಗೆದುಕೊಂಡು ಹೋಗುತ್ತವೆ. ಈ ಆಲೋಚನೆ ಸಹ ಸುಫಿಯಾನ್ ಮತ್ತು ಅವರ ಸ್ನೇಹಿತರದು. ಅವರೇ ಬಿಬಿಎಂಪಿ ಅಧಿಕಾರಿಗಳಿಗೆ ಮನವಿ ಮಾಡಿ, ಸಂಜೆಯೇ ಕಸ ಸಾಗಿಸುವಂತೆ ವಿನಂತಿಸಿದ್ದರು.

ಸಂಜೆಯೇ ಕಸ ಸಾಗಿಸುವುದರಿಂದ ‘ಇದರಿಂದ ಆ ಪ್ರದೇಶದಲ್ಲಿ ಸೊಳ್ಳೆ, ಬೀದಿ ನಾಯಿ ಕಾಟ ಇರುವುದಿಲ್ಲ. ಮಸೀದಿ ಆವರಣವೂ ಶುಚಿಯಾಗಿರುತ್ತದೆ’ ಎಂದು ಸುಫಿಯಾನ್‌ ಹೇಳುತ್ತಾರೆ.

‘ಈಗ ಶಿವಾಜಿನಗರದ ಮಸೀದಿ ಸುತ್ತಮುತ್ತ ಕಳೆದ ವರ್ಷಕ್ಕಿಂತ ಶೇ 40–50ರಷ್ಟು ಕಸದ ಪ್ರಮಾಣ ಕಡಿಮೆಯಾಗಿದೆ’ ಎಂಬುದು ಅವರ ಸಂತಸ.
ಪ್ಲಾಸ್ಟಿಕ್‌ ಸೆಟ್‌ ಹಂಚಿದ 46 ಮಸೀದಿಗಳಿಗೆ ತಂಡದ ಸದಸ್ಯರು ಭೇಟಿ ನೀಡಿ ಪರಿಸರ ಸ್ನೇಹಿ ಹಬ್ಬ ಆಚರಣೆ ಬಗ್ಗೆ ಜಾಗೃತಿ ಮೂಡಿಸಲು ಪ್ರಯತ್ನಿಸುತ್ತಾರೆ.