ಮುಂಬೈ (ಪಿಟಿಐ): ಟಿನಿಸ್ ಆಟಗಾರ ಲಿಯಾಂಡರ್ ಪೇಸ್ ವಿರುದ್ಧ ಅವರ ಮಾಜಿ ಪ್ರೇಯಸಿ ಹಾಗೂ ರೂಪದರ್ಶಿ ರಿಯಾ ಪಿಳ್ಳೈ ಸ್ಥಳೀಯ ನ್ಯಾಯಾಲಯದಲ್ಲಿ ಕೌಟುಂಬಿಕ ದೌರ್ಜನ್ಯ ಹಾಗೂ ಕಿರುಕುಳ ದೂರು ದಾಖಲಿಸಿದ್ದಾರೆ.
ಲಿಯಾಂಡರ್ ಪೇಸ್ ಹಾಗೂ ಅವರ ತಂದೆ ವೆೀಸ್ ಪೇಸ್ ವಿರುದ್ಧ ಇಲ್ಲಿಯ ಮೆಟ್ರೊಪಾಲಿಟನ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯದಲ್ಲಿ ಶನಿವಾರ ದೂರು ದಾಖಲಿಸಿರುವ ರಿಯಾ, ಪ್ರತಿ ತಿಂಗಳು ನಾಲ್ಕು ಲಕ್ಷ ರೂಪಾಯಿ ಜೀವನಾಂಶ ನೀಡುವಂತೆ ಕೋರಿದ್ದಾರೆ.
ಜೂನ್ 30 ರಂದು ನ್ಯಾಯಾಲಯ ಈ ಪ್ರಕರಣವನ್ನು ವಿಚಾರಣೆಗೆ ಕೈಗೆತ್ತಿಕೊಳ್ಳುವ ಸಾಧ್ಯತೆ ಇದೆ.
ಸಹಜೀವನ (ಲಿವ್ಇನ್ ಸಂಬಂಧ) ನಡೆಸುತ್ತಿದ್ದ ಪೇಸ್ ಮತ್ತು ರಿಯಾ ಸಂಬಂಧ ಮುರಿದು ಬಿದ್ದಿದ್ದು ಈಗ ಪ್ರತ್ಯೇಕವಾಗಿದ್ದಾರೆ. ಇವರಿಬ್ಬರಿಗೂ ಆಯಾನಾ ಎಂಬ ಎಂಟು ವರ್ಷದ ಮಗಳಿದ್ದಾಳೆ. ಮಗಳನ್ನು ತಮ್ಮ ಸುಪರ್ದಿಗೆ ತೆಗೆದುಕೊಳ್ಳಲು ಇಬ್ಬರೂ ಕಾನೂನು ಹೋರಾಟಕ್ಕೆ ಮುಂದಾಗಿದ್ದಾರೆ.
‘ನಾನು ಮತ್ತು ನನ್ನ ಮಗಳು ಕಾರ್ಟರ್ ರಸ್ತೆಯ ಬಂಗಲೆಗೆ ಪ್ರವೇಶಿಸದಂತೆ ಲಿಯಾಂಡರ್ ತಂದೆ ತಡೆಯುತ್ತಿದ್ದಾರೆ’ ಎಂದು ರಿಯಾ ದೂರಿನಲ್ಲಿ ಆರೋಪಿಸಿದ್ದಾರೆ. ಮೂರನೇ ವ್ಯಕ್ತಿಗೆ ಆಸ್ತಿ ಮಾರಾಟ ಮಾಡದಂತೆ ತಡೆಯಾಜ್ಞೆ ನೀಡುವಂತೆಯೂ ಕೋರಿದ್ದಾರೆ.
ರಿಯಾ ವಶದಲ್ಲಿರುವ ಮಗಳನ್ನು ಶಾಶ್ವತವಾಗಿ ತನ್ನ ಸುಪರ್ದಿಗೆ ಒಪ್ಪಿಸುವಂತೆ ಕೋರಿ ಕಳೆದ ತಿಂಗಳು ಪೇಸ್ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದರು.