ಪೊಲೀಸ್ ಸಂಘ ಕಟ್ಟಿ ಕೆಲಸ ಕಳೆದುಕೊಂಡರು!

ತೋವಿನಕೆರೆ (ತುಮಕೂರು ಜಿಲ್ಲೆ): ‘ಪೊಲೀಸರೆ ಆತುರಪಡಬೇಡಿ, ಪ್ರಚೋ ದನೆಗೆ ಒಳಗಾಗಬೇಡಿ. ಮಾತುಕತೆ ಮೂಲಕ ಸಮಸ್ಯೆಗಳನ್ನು ಬಗೆಹರಿಸಿ ಕೊಳ್ಳಿ’ ಎಂದು ಮಾತು ಮುಗಿಸುವ ಮುನ್ನವೇ ಟಿ.ಕೆ. ವೀರನಾಗಯ್ಯ ಗದ್ಗದಿತರಾದರು. 

38 ವರ್ಷಗಳ ಹಿಂದೆ ಪೊಲೀಸರ ಸಂಘ ಕಟ್ಟಿದ ಆರೋಪದ ಮೇಲೆ ಕೆಲಸದಿಂದ ವಜಾಗೊಂಡವರು ವೀರನಾಗಯ್ಯ. ಮೂಲತಃ ಮಧುಗಿರಿ ತಾಲ್ಲೂಕಿನ ತಿಮ್ಲಾಪುರದ 82 ವರ್ಷದ ವೀರನಾಗಯ್ಯ ಈಗ ತುಮಕೂರಿನ ಮಗಳ ಮನೆಯಲ್ಲಿ ವಾಸಿಸುತ್ತಿದ್ದಾರೆ.

ವೀರನಾಗಯ್ಯ 1958ರಲ್ಲಿ ಪೊಲೀಸ್ ಇಲಾಖೆಗೆ ಸೇರಿದ್ದರು. ಜಿಲ್ಲೆಯಲ್ಲಿ ಸಂಘ ಕಟ್ಟಲು ಪ್ರಯತ್ನಿಸಿದರು ಎಂಬ ಕಾರಣಕ್ಕೆ ಅವರನ್ನು 1979ರಲ್ಲಿ  ಸೇವೆಯಿಂದ ವಜಾ ಮಾಡಲಾಯಿತು.

ಅಂದು ಧರ್ಮವೀರ ಆಯೋಗ ನೀಡಿದ್ದ ವರದಿಯಲ್ಲಿ ಐಪಿಎಸ್‌ ಅಧಿಕಾರಿಗಳನ್ನು ಹೊರತುಪಡಿಸಿ  ಕಾನ್‌ಸ್ಟೆಬಲ್‌ ಹಾಗೂ ಇನ್ನಿತರ ಅಧಿಕಾರಿಗಳು ಸಂಘ ರಚಿಸಿಕೊಳ್ಳಬಹುದೆಂದು ಹೇಳಿತ್ತು. ಹೀಗಾಗಿ ಅವರು ಕಾನ್‌ಸ್ಟೆಬಲ್‌ಗಳ ಸಂಘ ಕಟ್ಟಲು ಹೋಗಿ ಸಂಕಷ್ಟಗಳನ್ನೇ ಮೈಮೇಲೆ ಎಳೆದುಕೊಂಡರು. ಸತತ 28 ವರ್ಷದ ಅವರ ಹೋರಾಟಕ್ಕೆ ಕೊನೆಗೂ ನ್ಯಾಯ ಸಿಗಲಿಲ್ಲ.

‘ಸಂಘ ಕಟ್ಟಲು ಅವಕಾಶ ಕೋರಿ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದೆವು. ಸರ್ಕಾರ ಇದಕ್ಕೆ ಅವಕಾಶ ನೀಡಲಿಲ್ಲ. ಸಂಘ ಕಟ್ಟಲು ನಿರ್ಧರಿಸಿದ್ದ ಕೇವಲ 15 ದಿನದಲ್ಲಿ ನಮ್ಮ ಕೈಗೆ ಸೇವೆಯಿಂದ ವಜಾ ಮಾಡಿದ್ದ ಆದೇಶ ಪತ್ರ ಬಂದಿತು. ಇದರಿಂದಾಗಿ ಹಲವು ಸಮಸ್ಯೆ ಎದುರಿ ಸಿದೆವು’ ಎಂದು ನೆನಪು ಬಿಚ್ಚಿಟ್ಟರು.

‘ಕೊಡಗಿನ ಕೆ.ಪಿ. ಕಾಳಪ್ಪ, ಶಿವಮೊಗ್ಗದ ಕೆ.ಬಿ.ಬಸವಂತಪ್ಪ,  ರೆಡ್ಡಿಹಳ್ಳಿ ಶೇಷಪ್ಪ, ಬೆಂಗಳೂರಿನ ಬಸವರಾಜಯ್ಯ, ಎನ್.ಎಸ್. ಕೃಷ್ಣಮೂರ್ತಿ, ಪಿ.ಎಚ್.ರಂಗನಾಥ ಮತ್ತು ನಾನು ಸೇರಿದಂತೆ ಏಳು ಮಂದಿ ಕೆಲಸದಿಂದ ವಜಾಗೊಂಡೆವು. ಅಂದು ಸರ್ಕಾರಿ ನೌಕರರ ಸಂಘ ನಮ್ಮ ಪರವಾಗಿತ್ತು. ಆದರೂ ಸರ್ಕಾರ ನಮ್ಮ ಪರ ನಿಲ್ಲಲಿಲ್ಲ’ ಎಂದರು.

‘ಅಂದಿನ ರಾಜ್ಯ ಪೊಲೀಸ್ ಮಹಾ ನಿರ್ದೇಶಕ ಬಿ.ಎನ್. ಗರುಡಾಚಾರ್ ನಮ್ಮ  ವಜಾದ ಪರವಾಗಿ ಇದ್ದರು. ಹೈಕೋರ್ಟ್‌ನಲ್ಲಿ ಈ ವಜಾ ಆದೇಶವನ್ನು ಪ್ರಶ್ನಿಸಿದೆವು. ರಾಜ್ಯಪಾಲರ ಗಮನಕ್ಕೆ ತರದೇ ಸರ್ಕಾರ ವಜಾ ಅದೇಶ ನೀಡಿರುವುದು ಸರಿಯಲ್ಲ.