ಪೋಷಕರು, ಸಿಬ್ಬಂದಿ ಜತೆ ಕಮಿಷನರ್‌ ಚರ್ಚೆ

ಬೆಂಗಳೂರು: ನಗರ ಪೊಲೀಸ್‌ ಕಮಿ­ಷ­ನರ್‌ ಎಂ.ಎನ್‌.ರೆಡ್ಡಿ ಅವರು ವಿಬ್ಗ­ಯೊರ್‌ ಶಾಲೆಗೆ ಮಂಗಳವಾರ ಭೇಟಿ ನೀಡಿ ಪೋಷಕರು ಮತ್ತು ಸಿಬ್ಬಂದಿ­ಯೊಂ­ದಿಗೆ ಒಂದು ತಾಸಿಗೂ ಹೆಚ್ಚು ಕಾಲ ಚರ್ಚೆ ನಡೆಸಿದರು.

ಶಾಲೆಯ ಒಂದನೇ ತರಗತಿ ವಿದ್ಯಾ­ರ್ಥಿನಿ ಮೇಲೆ ನಡೆ­ದಿದ್ದ ಅತ್ಯಾ­ಚಾರ ಪ್ರಕ­ರಣ ಸಂಬಂಧ ರೆಡ್ಡಿ ಅವರು ಪೋಷಕರು ಹಾಗೂ ಸಿಬ್ಬಂದಿ­ಯಿಂದ ಮಾಹಿತಿ ಪಡೆದುಕೊಂಡರು.ಶಾಲೆಯನ್ನು ಬೇಗನೆ ಪುನರಾರಂಭ ಮಾಡಿಸ­ಬೇಕು. ಮಕ್ಕಳ ಸುರಕ್ಷತೆಗೆ ಸೂಕ್ತ ಕ್ರಮ ಕೈಗೊ­ಳ್ಳುವಂತೆ ಶಾಲಾ ಆಡಳಿತ ಮಂಡಳಿಗೆ ಸೂಚನೆ ನೀಡ­ಬೇಕು. ಅತ್ಯಾಚಾರ ಪ್ರಕರಣ ಸಂಬಂಧ ಆಡ­­ಳಿತ ಮಂಡಳಿ ವಿರುದ್ಧವೂ ಶಿಸ್ತು ಕ್ರಮ ಜರು­ಗಿಸ­ಬೇಕೆಂದು ಪೋಷಕರು, ರೆಡ್ಡಿ ಅವ­ರಿಗೆ ಮನವಿ ಮಾಡಿದರು.

ಪೋಷಕರ ಮನವಿಗೆ ಸ್ಪಂದಿಸಿದ ಕಮಿ­ಷನರ್‌, ‘ಈಗಾಗಲೇ ಆರೋಪಿ­ಯನ್ನು ಬಂಧಿ­ಸಲಾಗಿದೆ. ಸಿಬ್ಬಂದಿ ವಿಳಂಬ ಮಾಡದೆ ಸಾಧ್ಯವಾದಷ್ಟು ಬೇಗನೆ ಪ್ರಕರಣದ ತನಿಖೆ ಪೂರ್ಣಗೊಳಿಸಿ ವರದಿ ನೀಡಲಿದ್ದಾರೆ. ಆರೋಪಿಗೆ ಕಾನೂನು ಪ್ರಕಾರ ಶಿಕ್ಷೆ ಆಗುತ್ತದೆ. ಆ ಬಗ್ಗೆ ಯಾವುದೇ ಅನುಮಾನ ಬೇಡ’ ಎಂದರು.

‘ಇಂತಹ ಪ್ರಕರಣಗಳು ಮರು­ಕಳಿಸದಂತೆ ಎಚ್ಚರ ವಹಿಸಲು ಆಡ­­ಳಿತ ಮಂಡಳಿಗೆ ಸೂಚನೆ ನೀಡ­ಲಾಗಿದೆ. ಮಕ್ಕಳ ಹಿತದೃಷ್ಟಿ­ಯಿಂದ ಸುರ­ಕ್ಷತಾ ಕ್ರಮ­ಗಳನ್ನು  ಕೈಗೊಳ್ಳು­ವಂತೆಯೂ ಸೂಚಿ­ಸ­­­ಲಾ­ಗಿದೆ’ ಎಂದು ಭರವಸೆ ನೀಡಿದರು. ಬಳಿಕ ಅವರು ವಿಧಾನ­ಸೌಧಕ್ಕೆ ತೆರಳಿ ಮುಖ್ಯ­ಮಂತ್ರಿ ಸಿದ್ದರಾಮಯ್ಯ ಅವರನ್ನು ಭೇಟಿಯಾಗಿ ಪ್ರಕ­ರಣದ ಮಾಹಿತಿ ನೀಡಿದರು.

ವೈಟ್‌ಫೀಲ್ಡ್‌ ಶಾಲೆ ಮೇಲೂ ದೂರು ದಾಖಲಿಸಿ: ಆರೋಪಿ ಮುಸ್ತಫಾನ ದುಷ್ಕೃತ್ಯದ ಬಗ್ಗೆ ಪೊಲೀ­ಸರಿಗೆ ಈ ಹಿಂದೆ ಮಾಹಿತಿ ನೀಡದ ವೈಟ್‌ಫೀಲ್ಡ್‌ನ ಶಾಲೆಯ ವಿರುದ್ಧವೂ ಶಿಸ್ತು ಕ್ರಮ ಜರು­ಗಿಸುವಂತೆ ರಾಜ್ಯಸಭಾ ಸದಸ್ಯ ರಾಜೀವ್‌ ಚಂದ್ರಶೇಖರ್‌ ಒತ್ತಾಯಿಸಿ­ದ್ದಾರೆ.

ವಿದ್ಯಾರ್ಥಿನಿಯರೊಂದಿಗೆ ಅನುಚಿತ­ವಾಗಿ ವರ್ತಿಸಿದ ಮುಸ್ತಫಾ­­ನನ್ನು ವೈಟ್‌ಫೀಲ್ಡ್‌ನ ಶಾಲಾ ಆಡ­ಳಿತ ಮಂಡಳಿ ಸದ­ಸ್ಯರು ಸೇವೆ­ಯಿಂದ ವಜಾ­ಗೊಳಿಸಿ­ದ್ದರು. ಆದರೆ, ಅವರು ಪೊಲೀಸರಿಗೆ ದೂರು ನೀಡದೆ ಮುಸ್ತಫಾನ ಅಪ­ರಾಧ ಕೃತ್ಯಕ್ಕೆ ಪರೋಕ್ಷ­ವಾಗಿ ಕುಮ್ಮಕ್ಕು ನೀಡಿದಂತಾ­ಗಿದೆ. ಆದ್ದರಿಂದ ಅವರ ವಿರುದ್ಧವೂ ದೂರು ದಾಖಲಿಸಬೇಕು ಎಂದು ತಿಳಿಸಿದ್ದಾರೆ.