ಹಾಂಕಾಂಗ್ ಬೀದಿಗಳಲ್ಲಿ ಕಳೆದ ಕೆಲವು ದಿನಗಳಿಂದ ತೀವ್ರವಾಗಿ ನಡೆಯುತ್ತಿದ್ದ ಪ್ರಜಾಪ್ರಭುತ್ವ ಪರ ಪ್ರತಿಭಟನೆಗಳು ಸದ್ಯಕ್ಕೆ ಇಳಿಮುಖವಾಗಿವೆ. ಚಳವಳಿ ನಿರತರ ಜೊತೆ ಸರ್ಕಾರ ಮಾತುಕತೆಗೆ ಒಪ್ಪಿಕೊಂಡಿದೆ. 2017ರಲ್ಲಿ ಹಾಂಕಾಂಗ್ನ ಮುಖ್ಯ ಆಡಳಿತಾಧಿಕಾರಿಯ ಚುನಾವಣೆ ನಡೆಯಲಿದೆ. ‘ಈ ಚುನಾವಣೆಯಲ್ಲಿ ಮುಕ್ತತೆ ಇರಬೇಕು.
ಚುನಾವಣೆಯಲ್ಲಿ ಸ್ಪರ್ಧಿಸುವ ಅಭ್ಯರ್ಥಿಗಳು ಜನರ ಆಯ್ಕೆಯಾಗಿರಬೇಕು’ ಎಂಬುದು ಚಳವಳಿನಿರತರ ಬೇಡಿಕೆ. ಆದರೆ ಚುನಾವಣೆಗೆ ಸ್ಪರ್ಧಿಸುವ ಅಭ್ಯರ್ಥಿಗಳ ಆಯ್ಕೆ ಚೀನಾದ ಪರಿಶೀಲನೆ ಹಾಗೂ ಅನುಮೋದನೆಗೆ ಒಳಪಟ್ಟಿರಬೇಕು ಎಂಬಂಥ ನಿಲುವು, ಚೀನಾ ಪರ ಅಭ್ಯರ್ಥಿಗಳನ್ನಷ್ಟೇ ಚುನಾವಣಾ ಕಣದಲ್ಲಿ ಉಳಿಸುತ್ತದೆ ಎಂಬುದು ಚಳವಳಿನಿರತರ ಆರೋಪ. ಚೀನಾದ ಮೇಲಿನ ಅವಲಂಬನೆಯನ್ನು ಹಾಂಕಾಂಗ್ನ ಯುವಜನಾಂಗ ವಿರೋಧಿಸಿಕೊಂಡುಬರುತ್ತಿದೆ.
ತರಗತಿಗಳನ್ನು ಬಹಿಷ್ಕರಿಸಿ ಬೀದಿಗಿಳಿದ ಯುವ ವಿದ್ಯಾರ್ಥಿಗಳ ಪ್ರತಿಭಟನೆ ಕ್ರಮೇಣ ಪ್ರಜಾಪ್ರಭುತ್ವ ಪರ ಆಂದೋಲನವಾಗಿ ದೊಡ್ಡದಾಗಿ ಬೆಳೆಯಿತು. 1989ರಲ್ಲಿ ಬೀಜಿಂಗ್ನ ಟೈಯಾನಾನ್ ಮೆನ್ ಚೌಕದಲ್ಲಿ ನಡೆದ ಪ್ರಜಾತಂತ್ರ ಪರ ವಿದ್ಯಾರ್ಥಿ ಚಳವಳಿಯ ನಂತರ ಇದು ಚೀನಾ ಎದುರಿಸುತ್ತಿರುವ ದೊಡ್ಡ ರಾಜಕೀಯ ಸವಾಲಾಗಿದೆ. 155 ವರ್ಷಗಳ ಕಾಲ ಬ್ರಿಟಿಷ್ ವಸಾಹತಾಗಿದ್ದ ಹಾಂಕಾಂಗ್ 1997ರಲ್ಲಿ ಚೀನಾಗೆ ಮರಳಿ ಸೇರ್ಪಡೆಯಾಯಿತು. ಆಗ ಅಳವಡಿಸಿಕೊಂಡಿದ್ದು ‘ಒಂದು ದೇಶ, ಎರಡು ಆಡಳಿತ ವ್ಯವಸ್ಥೆ’ ಮಾದರಿಯನ್ನು. ಈ ವ್ಯವಸ್ಥೆ 50 ವರ್ಷಗಳ ಕಾಲ ಎಂದರೆ ಮುಂದಿನ 2047ರವರೆಗೂ ಮುಂದುವರಿಯಲಿದೆ.
ಈ ಪ್ರಕಾರ, ರಕ್ಷಣೆ ಮತ್ತು ವಿದೇಶಾಂಗ ವ್ಯವಹಾರ ಹೊರತುಪಡಿಸಿ ಉಳಿದೆಲ್ಲಾ ವಿಚಾರಗಳಲ್ಲಿ ಹಾಂಕಾಂಗ್ಗೆ ಸಂಪೂರ್ಣ ಸ್ವಾಯತ್ತತೆ ಇದೆ. ಹಾಂಕಾಂಗ್ನ ಬಹುತ್ವದ ಅನನ್ಯತೆಯನ್ನು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಉತ್ತೇಜಿಸಬೇಕು ಎಂಬುದು ಪ್ರಜಾಪ್ರಭುತ್ವಪರವಾದಿಗಳ ಅಭಿಮತ. ಹಾಂಕಾಂಗ್ನಲ್ಲಿ ಪ್ರಜಾತಂತ್ರ ವ್ಯವಸ್ಥೆ ಬಲಪಡಿಸುವ ಯಾವ ಕ್ರಮ-ವನ್ನೂ ಚೀನಾ ಕೈಗೊಂಡಿಲ್ಲ ಎಂಬಂಥ ಟೀಕೆಗಳನ್ನು ಪಾಶ್ಚಿಮಾತ್ಯ ರಾಷ್ಟ್ರಗಳು ಮಾಡುತ್ತಿವೆ. ಇವು ಆಷಾಢಭೂತಿತನದ ಮಾತುಗಳಾಗುತ್ತವೆ.
ವಾಸ್ತವವಾಗಿ ಹಾಂಕಾಂಗ್ನಲ್ಲಿ ಬ್ರಿಟಿಷ್ ವಸಾಹತುಶಾಹಿ ಆಡಳಿತ ಇದ್ದಾಗಲೂ ಪ್ರಜಾಸತ್ತೆಯ ಅಂಶ ಇರಲಿಲ್ಲ. ಆದರೆ ಈ ವಿಚಾರದಲ್ಲಿ ಚೀನಾ ಆತ್ಮಾವಲೋಕನ ಮಾಡಿಕೊಳ್ಳಬೇಕು ಎಂಬುದೂ ನಿಜ. ‘ಹೊರಗಿನ ಶಕ್ತಿಗಳು’ ಪ್ರಜಾತಂತ್ರಪರ ಪ್ರತಿಭಟನೆಗಳಿಗೆ ಪ್ರಚೋದನೆ ನೀಡುತ್ತಿವೆ ಎಂದು ಚೀನಾ ಪ್ರತಿಪಾದಿಸುತ್ತಿದೆ. ಇಂತಹ ಮಾತುಗಳನ್ನಾಡುತ್ತಾ ತನ್ನ ಜವಾಬ್ದಾರಿಯಿಂದ ಚೀನಾ ನುಣುಚಿಕೊಳ್ಳಲಾಗದು. 2017ರಲ್ಲಿ ನಡೆಯುತ್ತಿರುವ ಮತದಾನ, ಹಾಂಕಾಂಗ್ನ ಮೊದಲ ನೇರ ಚುನಾವಣೆಯಾಗಿದೆ.
ಇಂತಹ ಚುನಾವಣೆಯಲ್ಲಿ ವಿಭಿನ್ನ ವರ್ಗಗಳು ಹಾಗೂ ದೃಷ್ಟಿಕೋನಗಳನ್ನು ಪ್ರತಿನಿಧಿಸುವ ಅಭ್ಯರ್ಥಿಗಳ ಆಯ್ಕೆಗೆ ಅವಕಾಶವನ್ನು ಹಾಂಕಾಂಗ್ ಜನತೆಗೆ ನಿರಾಕರಿಸುವುದು ಸರಿಯಲ್ಲ. ಆ ಮೂಲಕ ಪ್ರಜಾಪ್ರಭುತ್ವದ ಮೂಲ ಆಶಯಕ್ಕೆ ಕೊಡಲಿಪೆಟ್ಟು ನೀಡುವುದು ಸಲ್ಲದು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.