ಪ್ರವಾಸಿಗರ ಶೌಚಬಾಧೆಗೆ ಸಿಗಲಿದೆ ಮುಕ್ತಿ

ಬೆಂಗಳೂರು: ನಗರದ ಕಬ್ಬನ್‌ ಉದ್ಯಾನಕ್ಕೆ ಭೇಟಿ ನೀಡುವ ಪ್ರವಾಸಿಗರ ಅನುಕೂಲಕ್ಕಾಗಿ ಉದ್ಯಾನದ ಮೂರು ಕಡೆ ನೂತನವಾಗಿ ಮೂರು ಶೌಚಾಲಯಗಳು ತಲೆ ಎತ್ತುತ್ತಿವೆ. ಶೌಚಾಲಯ ವ್ಯವಸ್ಥೆ ಇಲ್ಲದೆ ಉದ್ಯಾನಕ್ಕೆ ಭೇಟಿ ನೀಡುವ ಪ್ರವಾಸಿಗರು ಪರದಾಡುವಂತಾಗಿತ್ತು. ಇದೀಗ ಶೌಚಾಲಯಗಳ  ನಿರ್ಮಾಣದಿಂದ ಪ್ರವಾಸಿಗರಿಗೆ ಪ್ರಯೋಜನವಾಗಲಿದೆ. ಕಬ್ಬನ್‌ ಉದ್ಯಾನ ಸುಮಾರು 192 ಎಕರೆ ವಿಸ್ತೀರ್ಣವಿದ್ದು, ಇಲ್ಲಿಗೆ ಪ್ರತಿನಿತ್ಯ ಸಾವಿರಾರು ಪ್ರವಾಸಿ­ಗರು ಕುಟುಂಬ ಸಮೇತ ಭೇಟಿ ನೀಡು­ತ್ತಾರೆ.

ಉದ್ಯಾನದ ಹಡ್ಸನ್‌ ವೃತ್ತದ ಭಾಗದಲ್ಲಿ ಹಾಗೂ ಹೈಕೋರ್ಟ್‌ ಹಿಂಭಾಗದಲ್ಲಿ ಮಾತ್ರ ಶೌಚಾಲಯಗಳಿವೆ.  ಇತರೆ ಭಾಗಗಳಲ್ಲಿ ಶೌಚಾ­ಲಯ  ಇಲ್ಲ.  ಹೀಗಾಗಿ ಪ್ರವಾಸಿಗರು ಶೌಚಬಾಧೆ­ಯಿಂದ ಕಿರಿಕಿರಿ ಅನುಭವಿಸುತ್ತಿದ್ದಾರೆ. ಈ ಸಂಬಂಧ ಪ್ರವಾಸಿಗರು ತೋಟಗಾರಿಕೆ ಇಲಾಖೆಗೆ ಹಲವು ಬಾರಿ ದೂರು ನೀಡಿದ್ದರು. ಈ ಸಮಸ್ಯೆಯನ್ನು  ಸರ್ಕಾರದ ಗಮನಕ್ಕೆ ತಂದ ತೋಟ­ಗಾರಿಕೆ ಇಲಾಖೆ ಅಧಿಕಾರಿಗಳು, ಸಚಿವರ ಸಲಹೆ ಮೇರೆಗೆ ಉದ್ಯಾನದಲ್ಲಿ ಶೌಚಾಲಯಗಳನ್ನು ನಿರ್ಮಿಸಲು ಟೆಂಡರ್‌ ಕರೆಯಲು ನಿರ್ಧರಿಸಿದ್ದರು.

ಈ ನಡುವೆ ಫಿನಿಕ್ಸ್‌ ಕ್ಯಾಬಿನ್‌ ಪ್ರೈವೇಟ್‌ ಲಿಮಿಟೆಡ್‌ ಕಂಪೆನಿಯು ಉಚಿತವಾಗಿ ಉದ್ಯಾನದ ಮೂರು ಕಡೆ ಶೌಚಾಲಯಗಳನ್ನು ನಿರ್ಮಿಸಲು ಮುಂದಾಗಿದೆ. ‘ಕೆ.ಆರ್‌.ವೃತ್ತ, ಸಿದ್ದಲಿಂಗಯ್ಯ ವೃತ್ತ ಹಾಗೂ ಬಾಲಭವನ ಪ್ರವೇಶದ್ವಾರದ ಮುಂದೆ ಶೌಚಾ­ಲಯ ನಿರ್ಮಿಸಲು ಯೋಜನೆ ರೂಪಿಸಲಾಗಿದೆ. ಈಗಾಗಲೇ ಬಾಲಭವನ ಮುಂಭಾಗದಲ್ಲಿ ಶೌಚಾ­ಲಯ ನಿರ್ಮಾಣಗೊಂಡಿದ್ದು,  ಸಾರ್ವಜನಿಕರ ಸೇವೆಗೆ ಮುಕ್ತಗೊಳಿಸಲಾಗುತ್ತದೆ’ ಎಂದು ಫಿನಿಕ್ಸ್‌ ಕ್ಯಾಬಿನ್‌ ಕಂಪೆನಿಯ ವ್ಯವಸ್ಥಾಪಕ ನಿರ್ದೇಶಕ ಸತೀಶ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಒಂದು ಶೌಚಾಲಯದ ನಿರ್ಮಾಣಕ್ಕೆ ಸುಮಾರು 10 ಲಕ್ಷ ವೆಚ್ಚವಾಗಲಿದೆ. ತಿಂಗಳಿಗೆ ಶೌಚಾ­ಲಯದ ನಿರ್ವಹಣೆಗಾಗಿ 20 ರಿಂದ 25 ಸಾವಿರ ಖರ್ಚಾಗಲಿದ್ದು, ಎಲ್ಲಾ ವೆಚ್ಚವನ್ನು  ಕಂಪೆನಿ ಭರಿಸಲಿದೆ’ ಎಂದು ಹೇಳಿದರು.  ‘ಶೌಚಾಲಯವನ್ನು ಫ್ರಿ ಫ್ಯಾಬ್ರಿಕ್‌ನಿಂದ ನಿರ್ಮಿಸಲಾಗಿದ್ದು, ದೀರ್ಘಬಾಳಿಕೆಗೆ ಯೋಗ್ಯವಾ­ಗಿದೆ. ಜತೆಗೆ ನಿರ್ವಹಣಾ ಕಾರ್ಯ ಸಹ ಸುಲಭ. ಕಂಪೆನಿಯಿಂದ ಶೌಚಾಲಯದ ಸ್ವಚ್ಛತೆಗೆ ಹೆಚ್ಚು ಒತ್ತು ನೀಡಲಾಗುತ್ತದೆ’ ಎಂದು ಮಾಹಿತಿ ನೀಡಿದರು.

‘ಬಾಲಭವನದ ಮುಂದಿನ ಶೌಚಾಲಯದ ಸಾಧಕ ಬಾಧಕಗಳನ್ನು ಪರಿಶೀಲಿಸಿ ಕೆ.ಆರ್.ವೃತ್ತ ಹಾಗೂ ಸಿದ್ದಲಿಂಗಯ್ಯ ವೃತ್ತದಲ್ಲಿ ಶೌಚಾಲಯ­ಗಳನ್ನು ನಿರ್ಮಿಸಲಾಗುವುದು.  ತೋಟಗಾರಿಕೆ ಇಲಾಖೆ ಹಾಗೂ ಬಿಬಿಎಂಪಿಯು ಅನುಮತಿ ನೀಡಿದರೆ ನಗರದಾದ್ಯಂತ 200 ಶೌಚಾಲಯ­ಗಳನ್ನು ನಿರ್ಮಾಣ ಮಾಡುವ ಗುರಿ ಹೊಂದಿ­ದ್ದೇವೆ’  ಎಂದರು.