ಎಂಟು ವರ್ಷಗಳ ಹಿಂದೆ ಮುಂಬೈ ಮೇಲೆ ನಡೆದ ದಾಳಿ ಭಾರತವನ್ನಷ್ಟೇ ಅಲ್ಲ, ಇಡೀ ವಿಶ್ವವನ್ನೇ ಬೆಚ್ಚಿ ಬೀಳಿಸಿತ್ತು. ಅಂದಿನದು ಆಧುನಿಕ ಮನುಕುಲದ ಇತಿಹಾಸದಲ್ಲಿನ ಅತ್ಯಂತ ಕರಾಳ ಭಯೋತ್ಪಾದನಾ ದಾಳಿಗಳಲ್ಲೊಂದು. ಆಗ ಆದ ಗಾಯ ಇನ್ನೂ ಮಾಸಿಲ್ಲ.
ಈ ದಾಳಿಯನ್ನು ತಪ್ಪಿಸಬಹುದಿತ್ತೇ, ಪ್ರಮಾದ ಆಗಿದ್ದೆಲ್ಲಿ ಎಂಬ ಬಗ್ಗೆ ಚರ್ಚೆಗಳು ಇನ್ನೂ ನಡೆಯುತ್ತಲೇ ಇವೆ. ಆದರೆ ದಾಳಿಯನ್ನೇ ನಿಷ್ಫಲಗೊಳಿಸಬಹುದಾಗಿದ್ದ ಅವಕಾಶವೊಂದು ಅಮೆರಿಕ, ಬ್ರಿಟನ್ ಮತ್ತು ಭಾರತದ ಗುಪ್ತಚರ ಸಂಸ್ಥೆಗಳ ನಡುವಿನ ಸಂವಹನ, ಮಾಹಿತಿ ವಿನಿಮಯದ ಕೊರತೆಯಿಂದಾಗಿ ತಪ್ಪಿ ಹೋಯಿತು ಎಂದು ಅಮೆರಿಕದ ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆ, ಪ್ರೊ ಪಬ್ಲಿಕಾ ಮತ್ತು ಫ್ರಂಟ್ಲೈನ್ಗಳು ಸಿದ್ಧಪಡಿಸಿದ ವರದಿಯೊಂದು ಈಗ ಬಹಿ-ರಂಗಪಡಿಸಿದೆ.
ಬೇಹುಗಾರಿಕೆಯ ಚರಿತ್ರೆಯಲ್ಲೇ ಇದು ಅತ್ಯಂತ ದೊಡ್ಡ ವೈಫಲ್ಯ ಎಂದರೂ ಉತ್ಪ್ರೇಕ್ಷೆಯಾಗದು. ಕಂಪ್ಯೂಟರ್ ಆಧಾರಿತ ನಿಗಾ ವ್ಯವಸ್ಥೆ ಮತ್ತು ಆಧುನಿಕ ಮಾಹಿತಿ ತಂತ್ರಜ್ಞಾನವನ್ನು ಸಮರ್ಥವಾಗಿ ಬಳಸಿಕೊಂಡು ಭಯೋತ್ಪಾದನೆಯನ್ನು ಹತ್ತಿಕ್ಕುವ ಶಕ್ತಿ ಮತ್ತು ದೌರ್ಬಲ್ಯ ಎರಡನ್ನೂ ಇದು ಬಯಲು ಮಾಡಿದೆ. ಅಷ್ಟಕ್ಕೂ, ಭಯೋತ್ಪಾದಕರು ಭಾರತದ ದಾಳಿ ಮಾಡಬಹುದು, ಅದಕ್ಕಾಗಿ ಸಿದ್ಧತೆ ನಡೆದಿದೆ ಎಂಬ ಮಾಹಿತಿ ಭಾರತ ಮತ್ತು ಬ್ರಿಟಷ್ ಗೂಢಚರ್ಯೆ ಸಂಸ್ಥೆಳಿಗೆ ಸಾಕಷ್ಟು ಮೊದಲೇ ಸಿಕ್ಕಿತ್ತು. ದಾಳಿಯ ಸಂಚಿನಲ್ಲಿ ಲಷ್ಕರ್ ಎ ತಯಬಾದ ತಾಂತ್ರಿಕ ವಿಭಾಗದ ಮುಖ್ಯಸ್ಥ ಜರಾರ್ ಷಾ ಪ್ರಮುಖ ಪಾತ್ರ ವಹಿಸಿದ್ದ. ಇದರ ಪೂರ್ವಸಿದ್ಧತೆಗಾಗಿ ಪಾಕಿಸ್ತಾನದ ಉತ್ತರ ಪರ್ವತ ಪ್ರದೇಶದಿಂದ ಅರಬ್ಬಿ ಸಮುದ್ರದ ಬಳಿಯ ಸುರಕ್ಷಿತ ಸ್ಥಳದವರೆಗೂ ಅನೇಕ ಸಲ ಓಡಾಡಿದ್ದ.
ಇಂಟರ್ನೆಟ್ನಲ್ಲಿ ಮುಂಬೈಯ ಎರಡು ಐಷಾರಾಮಿ ಹೋಟೆಲ್ಗಳು ಮತ್ತು ಯೆಹೂದಿಗಳ ತಂಗುದಾಣದ ಬಗ್ಗೆ ಜಾಲಾಡಿದ್ದ. ದಾಳಿ ನಡೆಸಬೇಕಾದ ಸ್ಥಳಗಳನ್ನು ತಲುಪುವ ಮಾರ್ಗಗಳನ್ನು ದಾಳಿಕೋರರಿಗೆ ವಿವರಿಸಲು ಗೂಗಲ್ ನಕ್ಷೆ ಬಳಸಲಾಗಿತ್ತು. ಈತನ ಚಲನವಲನಗಳ ಮೇಲೆ ನಿಗಾ ಇಟ್ಟಿದ್ದ ಭಾರತ ಮತ್ತು ಬ್ರಿಟಿಷ್ ಬೇಹುಗಾರರು ಪ್ರತ್ಯೇಕವಾಗಿ ಈ ಬಗ್ಗೆ ಸಾಕಷ್ಟು ಮಾಹಿತಿಯನ್ನೂ ಕಲೆ ಹಾಕಿದ್ದರು. ಆದರೆ ಒಬ್ಬರಿಗೊಬ್ಬರಿಗೆ ಇದು ಗೊತ್ತಿರಲಿಲ್ಲ. ಅಮೆರಿಕಕ್ಕೂ ಗೊತ್ತಿರಲಿಲ್ಲ. ಅದರ ಬೇಹುಗಾರಿಕಾ ಸಂಸ್ಥೆಗಳು ತಮ್ಮದೇ ಮೂಲ, ಸಾಧನಗಳ ಮೂಲಕ ವಿಷಯ ಸಂಗ್ರಹಿಸಿ ಭಾರತದ ಭದ್ರತಾ ಸಂಸ್ಥೆಗಳಿಗೆ ಮುನ್ನೆಚ್ಚರಿಕೆ ನೀಡಿದ್ದವು.
ಇಷ್ಟೆಲ್ಲ ಆದ ನಂತರದ್ದು ಮಹಾ ಪ್ರಮಾದ. ಮೂರೂ ದೇಶಗಳ ಬೇಹುಗಾರಿಕೆ ಸಂಸ್ಥೆಗಳು ಈ ಎಲ್ಲ ಮಾಹಿತಿಗಳನ್ನು ಪರಸ್ಪರ ಹಂಚಿಕೊಂಡಿದ್ದರೆ ಮುಂಬೈ ದಾಳಿಯ ಇಡೀ ಸಂಚನ್ನು ವಿಫಲಗೊಳಿಸಬಹುದಿತ್ತು.ಇಡೀ ವಿಶ್ವವೇ ಭಯೋತ್ಪಾದಕರ ದಾಳಿಗೆ ನಲುಗುತ್ತಿದೆ. ಜಗತ್ತು ಎದುರಿಸುತ್ತಿರುವ ಈ ಸವಾಲನ್ನು ಬೇಹುಗಾರರು ಅರ್ಥ ಮಾಡಿಕೊಳ್ಳಲು ಸೋತರು. ಅದಕ್ಕಾಗಿ ದುಬಾರಿ ಬೆಲೆಯನ್ನೇ ತೆರಬೇಕಾಗಿ ಬಂತು. ಬೇಹುಗಾರಿಕೆ ಸಂಸ್ಥೆಗಳ ಮನೋಭಾವ, ಕೆಲಸದ ವಿಧಾನ ಬದಲಾಗಬೇಕು. ಇನ್ನೆಂದೂ ಇಂಥ ಲೋಪಕ್ಕೆ ಅವಕಾಶ ಕೊಡುವುದಿಲ್ಲ ಎಂದು ಎಲ್ಲ ದೇಶಗಳು ಪ್ರತಿಜ್ಞೆ ಮಾಡಬೇಕು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.