ಬರ ನಂಜಿಗೆ ಉಪ್ಪು ಸವರುವ ವಿಷ ನೀರು

‘ಆಂಧ್ರಪ್ರದೇಶಕ್ಕೆ ಬರೀ 3 ಕಿ.ಮೀ.ನಷ್ಟು ಸಮೀಪದಲ್ಲಿರುವ ನಾವು ಜಿಲ್ಲೆಯ ಅತ್ಯಂತ ಗಡಿಭಾಗದಲ್ಲಿ ವಾಸವಿದ್ದೇವೆ. ಮಳೆ ಮೇಲೆ ನಂಬಿಕೆ ಕಳೆದುಕೊಂಡಿರುವ ನಮಗೆ ಕೊಳವೆಬಾವಿಗಳು ಕೂಡ ಕೈಕೊಟ್ಟಿವೆ. ಉತ್ತಮ ಮಳೆ ಸುರಿದು, ಕೆರೆಕುಂಟೆ ತುಂಬಿ 15 ವರ್ಷಗಳು ಗತಿಸಿವೆ. ಬದುಕಿಗೆ ಆಸರೆಯಾಗುವಷ್ಟು ಮಳೆಯಾಗದೇ ಒಂದೊಂದು ದಿನವನ್ನೂ ದಯನೀಯ ಸ್ಥಿತಿಯಲ್ಲಿ ನೂಕುತ್ತಿದ್ದೇವೆ’ ಎಂದು ಮಾಡಪಲ್ಲಿ ಗ್ರಾಮಸ್ಥ ಎಂ.ಎಲ್‌.ನರಸಿಂಹಮೂರ್ತಿ ‘ಪ್ರಜಾವಾಣಿ’ಗೆ ತಿಳಿಸಿದರು.

ಜೀವನಶೈಲಿ ಬದಲು: ‘ಗ್ರಾಮ ಪಂಚಾಯತಿ ವ್ಯಾಪ್ತಿಯಲ್ಲಿ 1500ಕ್ಕೂ ಹೆಚ್ಚು ಮನೆಗಳಿದ್ದು, ಬಹುತೇಕ ಮಂದಿ ಬದುಕಿಗೆ ಕೃಷಿಯನ್ನೇ ಅವಲಂಬಿಸಿದ್ದಾರೆ. ಆದರೆ ಬರಗಾಲವು ಕೆಟ್ಟನೋಟ ಬೀರಿದ ವರ್ಷದಿಂದ ಗ್ರಾಮಸ್ಥರು ವಲಸೆ ಹೊರಟರು. ಕೆಲವರು ಆಂಧ್ರಪ್ರದೇಶಕ್ಕೆ ಸೇರಿ ಕೂಲಿಗೆಲಸ ಮಾಡುತ್ತಿದ್ದರೆ, ಕೆಲವರು ಬೆಂಗಳೂರು ಸೇರಿ ಒಂದು ಹೊತ್ತಿನ ಊಟಕ್ಕಾಗಿ ಪರದಾಡುತ್ತಿದ್ದಾರೆ. ಬಾಳಿ ಬದುಕಬೇಕಿದ್ದ ಕುಟುಂಬಗಳು ಚೂರುಚೂರಾಗಿ ಅಸ್ತಿತ್ವ ಕಳೆದುಕೊಳ್ಳುತ್ತಿವೆ’ ಎಂದು ಅವರು ಆತಂಕ ವ್ಯಕ್ತಪಡಿಸಿದರು.

‘ಮಳೆಯಿಲ್ಲದೇ ಕೃಷಿ ಚಟುವಟಿಕೆಗೆ ತೀವ್ರ ಹಿನ್ನಡೆಯಾಗಿದೆ. ಇದಕ್ಕೆ ಪೂರಕವಾಗಿ ಕೃಷಿಗೆಲಸ ಮಾಡಲು ಕೂಲಿಗೆಲಸಗಾರರು ಸಿಗದಿರುವುದು ಒಂದು ಕಾರಣವಾದರೆ, ಜಮೀನು ಹೊಂದಿರವವರೇ ಕೃಷಿಗೆಲಸ ಮಾಡಲು ಬಯಸದಿರುವುದು ಮತ್ತೊಂದು ಕಾರಣ. ಕೆಲವರು ಜಮೀನನ್ನು ಭೋಗ್ಯಕ್ಕೆ ನೀಡಿ ವಲಸೆ ಹೋಗಿದ್ದರೆ, ಇನ್ನೂ ಕೆಲವರು ಮಾರಾಟ ಮಾಡಿದ್ದಾರೆ. ಕಳೆದ 20 ವರ್ಷಗಳಲ್ಲಿ ಗ್ರಾಮೀಣ ಪ್ರದೇಶದ ಜೀವನಶೈಲಿಯೇ ಬದಲಾಗುತ್ತಿದೆ ಎಂದು ಅವರು ತಿಳಿಸಿದರು.

ಅಲ್ಪಸ್ವಲ್ಪ ಓದಿಕೊಂಡವರು ಬೆಂಗಳೂರಿಗೆ ಸೇರಿಕೊಂಡು ಸೆಕ್ಯೂರಿಟಿ ಗಾರ್ಡ್‌, ಸಿಮೆಂಟ್‌ ಕೆಲಸ ಮಾಡುತ್ತಿದ್ದಾರೆ. 60 ವರ್ಷಕ್ಕಿಂತ ಮೇಲ್ಪಟ್ಟ ವೃದ್ಧರು ಎಲ್ಲಿಯೂ ಓಡಾಡಲಾಗದೇ ಗ್ರಾಮದಲ್ಲೇ ಉಳಿದುಕೊಂಡು ಇಂದಿನ ಪರಿಸ್ಥಿತಿ ಕುರಿತು ವ್ಯಥೆ ಪಡುತ್ತಿದ್ದಾರೆ. ‘ಇಂತಹ ಭೀಕರ ದಿನ ನೋಡಲು ನಾನಿಷ್ಟು ವರ್ಷ ಬದುಕಿರಬೇಕಿತ್ತಾ? ನನ್ನ ಮಕ್ಕಳು, ಮೊಮ್ಮಕ್ಕಳು ಸಂಕಷ್ಟದಲ್ಲಿ ಸಿಲುಕಿರುವುದನ್ನು ನೋಡಿ ಕಣ್ತುಂಬಿಕೊಳ್ಳಬೇಕಾ’ ಎಂದು ವೃದ್ಧೆ ಗಂಗಮ್ಮ ನೋವು ತೋಡಿಕೊಂಡರು.

ನೀರು ಹಾಲಿನ ಕೆನೆಯಂತೆ ಉಕ್ಕುತ್ತದೆ
ಬಾಗೇಪಲ್ಲಿ ಮತ್ತು ಗುಡಿಬಂಡೆ ತಾಲ್ಲೂಕುಗಳ ಬಹುತೇಕ ಗ್ರಾಮಸ್ಥರ ಬದುಕಿನಲ್ಲಿ ಫ್ಲೋರೈಡ್ ನೀರು ಯಾವ ಪರಿ ಹಾಸುಹೊಕ್ಕಿದೆಯೆಂದರೆ, ಪಾತ್ರೆಪರಿಕರ, ಸಿಸ್ಟನ್‌ ಮುಂತಾದ ಕಡೆ ಅದು ಅಳಿಸಲಾಗದ ಗುರುತು ಬಿಟ್ಟಿದೆ. ಫ್ಲೋರೈಡ್‌ ನೀರನ್ನು ಕುದಿಸಿದರೆ, ಅದು ಹಾಲಿನ ಕೆನೆಯಂತೆ ಉಕ್ಕುತ್ತದೆ. ಒಂದು ದಿನಕ್ಕೂ ಹೆಚ್ಚು ಕಾಲ ನೀರನ್ನು ಶೇಖರಿಸಿಟ್ಟರೆ, ಆ ಪಾತ್ರೆಯಂಚಿನಲ್ಲಿ ಬಿಳಿ ಬಣ್ಣ ಅಥವಾ ಪದರ ಉಳಿದುಕೊಳ್ಳುತ್ತದೆ.

‘ಗ್ರಾಮದಲ್ಲಿನ ನೀರಿನ ಸಿಸ್ಟನ್‌ಗಳನ್ನು ಸೂಕ್ಷ್ಮವಾಗಿ ನೋಡಿದರೆ, ಅವುಗಳ ಮೇಲೆಯೂ ಬಿಳಿ ಬಣ್ಣ ಕಾಣುತ್ತದೆ. ನೀರು ತುಂಬಿ ಸಿಸ್ಟನ್‌ ಮೇಲೆ ಹರಿದಾಗ, ಕ್ರಮೇಣ ಅಲ್ಲಿ ಬಿಳಿ ಬಣ್ಣ ಆವರಿಸಿಕೊಳ್ಳುತ್ತದೆ. ಸುಣ್ಣ ಬಳಿದಂತೆ ಗೋಚರವಾಗುತ್ತದೆ. ಕೆರೆಕುಂಟೆಗಳು ಮತ್ತು ಕೊಳವೆಬಾವಿಗಳು ಬತ್ತಿರುವ ಕಾರಣ ನಾವೆಲ್ಲರೂ ಸಿಸ್ಟನ್‌ನಲ್ಲಿನ ನೀರನ್ನು ಸೇವಿಸುತ್ತೇವೆ. ಕನಿಷ್ಠ ಬಾಯಾರಿಸಿಕೊಳ್ಳಲಾದರೂ ಈ ನೀರನ್ನೇ ಸೇವಿಸಬೇಕು’ ಎಂದು ಗ್ರಾಮಸ್ಥ ಸಿ.ವೆಂಕಟೇಶ್‌ ತಿಳಿಸಿದರು.

ಬಹುತೇಕ ಗ್ರಾಮಗಳಲ್ಲಿ ಸಮಸ್ಯೆ
ಜಿಲ್ಲೆಯಲ್ಲಿರುವ 1561 ಗ್ರಾಮಗಳ ಪೈಕಿ 403 ಗ್ರಾಮಗಳಲ್ಲಿನ ಕೊಳವೆಬಾವಿ ನೀರನ್ನು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಪರೀಕ್ಷಿಸಿದೆ. 414 ಪ್ರಾಥಮಿಕ ಮತ್ತು ಪ್ರೌಢಶಾಲೆಗಳಲ್ಲಿನ 10,561 ಮಕ್ಕಳ ಹಲ್ಲು ಮತ್ತು ಆರೋಗ್ಯ ಪರೀಕ್ಷಿಸಿದೆ. 5299 ಮಕ್ಕಳಲ್ಲಿ ಮತ್ತು 5227 ಹಿರಿಯರಲ್ಲಿ ಶಂಕಿತ ದಂತ ಫ್ಲೋರೋಸಿಸ್‌ ಕಾಯಿಲೆ ಕಾಣಿಸಿಕೊಂಡಿದ್ದರೆ, 48 ಹಿರಿಯರಲ್ಲಿ ಶಂಕಿತ ಮೂಳೆಗಳ ಫ್ಲೋರೋಸಿಸ್‌ ಕಾಯಿಲೆ ಇರುವುದು ಪತ್ತೆಯಾಗಿದೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಸಾರ್ವಜನಿಕ ಆರೋಗ್ಯ ವಿಭಾಗದ ಸಲಹೆಗಾರ ವಿನೋದ್‌ಕುಮಾರ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

ಪ್ರಥಮ ಹಂತದ ಸಮೀಕ್ಷೆ ಪ್ರಕಾರ, ಜಿಲ್ಲೆಯಲ್ಲಿ 2174 ಶಾಲಾ ಮಕ್ಕಳು ಮತ್ತು 2066 ಹಿರಿಯರು ಶಂಕಿತ ಫ್ಲೋರೋಸಿಸ್‌ ಕಾಯಿಲೆಯಿಂದ ಬಳಲುತ್ತಿದ್ದಾರೆ. ಬಹುತೇಕ ಜನರ ಹಲ್ಲುಗಳು ಹಾಳಾಗಿದ್ದು, ಮೂಳೆಗಳು ಸವೆದಿವೆ. ಕಿರಿಯ ವಯಸ್ಸಿನವರು ಶಕ್ತಿ ಕಳೆದುಕೊಂಡು ವೃದ್ಧರಂತೆ ಕಾಣುತ್ತಾರೆ. ಈ ಸಮಸ್ಯೆ ಗ್ರಾಮೀಣ ಪ್ರದೇಶದಲ್ಲಿ ಆಳವಾಗಿ ಬೇರು ಬಿಟ್ಟಿದೆ ಎಂದು ಅವರು ತಿಳಿಸಿದರು.

ಬರ ಪರಿಸ್ಥಿತಿ ಹೀಗೆ ಮುಂದುವರಿದಲ್ಲಿ, ಭವಿಷ್ಯದಲ್ಲಿ ಗ್ರಾಮಗಳಲ್ಲಿ ಜನರೇ ಸಿಗುವುದಿಲ್ಲ. ಸದ್ಯದ ಪರಿಸ್ಥಿತಿಯಲ್ಲಿ ಯುವಕರು ಕಾಣೆಯಾಗಿದ್ದು, ಗ್ರಾಮಗಳು ವೃದ್ಧಾಶ್ರಮವಾಗಿ ಮಾರ್ಪಟ್ಟಿವೆ.
–ಕೆ.ವಿ.ಆದಿನಾರಾಯಣ,
ಶಿಕ್ಷಕ