ವಾಷಿಂಗ್ಟನ್ (ಪಿಟಿಐ): ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ‘ನಾಸಾ’ ಪರವಾಗಿ ಅಗತ್ಯ ಸಾಮಗ್ರಿ ಸಾಗಿಸುತ್ತಿದ್ದ ಮಾನವರಹಿತ ಖಾಸಗಿ ರಾಕೆಟ್ ಉಡಾವಣೆಯಾದ ಕೆಲವೇ ಕ್ಷಣಗಳಲ್ಲಿ ಸ್ಫೋಟಗೊಂಡ ಘಟನೆ ನಡೆದಿದೆ.
ಅಮೆರಿಕದ ಪೂರ್ವ ವರ್ಜೀನಿಯಾ ಕರಾವಳಿಯ ವಾಲೋಪ್ಸ್ ಉಡಾವಣಾ ಕೇಂದ್ರದಿಂದ ಮಂಗಳವಾರ ಸಂಜೆ 6.22ಕ್ಕೆ (ಸ್ಥಳೀಯ ಕಾಲಮಾನ) ಈ ರಾಕೆಟ್ ಉಡಾವಣೆ ಮಾಡಲಾಗಿತ್ತು.
ಆರ್ಬಿಟಲ್ ಸೈನ್ಸ್ಸ್ ಕಾರ್ಪೊರೇಷನ್ನ ‘ಅಂಟಾರೆಸ್’ ರಾಕೆಟ್ ‘ಸೈಗ್ನಸ್’ ಅಂತರಿಕ್ಷ ನೌಕೆಯನ್ನು ಬಾಹ್ಯಾಕಾಶ ನಿಲ್ದಾಣಕ್ಕೆ ಕೊಂಡೊಯ್ಯುತ್ತಿತ್ತು. ನೌಕೆಯಲ್ಲಿ 2,268 ಕೆ.ಜಿ. ತೂಕದ ಸಾಮಗ್ರಿಗಳು ಇದ್ದವು. ಉಡಾವಣೆಯಾದ 6 ಸೆಕೆಂಡ್ಗಳಲ್ಲಿ ರಾಕೆಟ್ ಸ್ಫೋಟಗೊಂಡಿತು. ಈ ವೈಫಲ್ಯಕ್ಕೆ ಕಾರಣ ವಿಶ್ಲೇಷಿಸಲಾಗುತ್ತಿದೆ ಎಂದು ‘ನಾಸಾ‘ ವಕ್ತಾರ ಜಾಯ್ ಬೊಲ್ಡನ್ ತಿಳಿಸಿದ್ದಾರೆ.