ಬಾಹ್ಯಾಕಾಶ ಪ್ರವಾಸ: ಆರಂಭಿಕ ವಿಘ್ನ...
ಪ್ರವಾಸಿಗರನ್ನು ಬಾಹ್ಯಾಕಾಶಕ್ಕೆ ದುಬಾರಿ ವೆಚ್ಚದ ವಿಹಾರಕ್ಕೆ (ಹಾರಾಟಕ್ಕೆ) ಕರೆದೊಯ್ಯಲು ರೂಪಿಸಿದ್ದ ವಿಶೇಷ ಬಾಹ್ಯಾಕಾಶ ನೌಕೆ ‘ಸ್ಪೇಸ್ಶಿಪ್ ಟು’, ಪರೀಕ್ಷಾರ್ಥ ಹಾರಾಟದ ಸಂದರ್ಭದಲ್ಲಿ ಶುಕ್ರವಾರ ಕ್ಯಾಲಿಫೋರ್ನಿಯಾದ ಮೊಜಾವೆ ಮರುಭೂಮಿಯಲ್ಲಿ ಅಪಘಾತಕ್ಕೀಡಾಗಿದೆ.
ಈ ದುರಂತದಿಂದಾಗಿ ಬಾಹ್ಯಾಕಾಶ ಪ್ರವಾಸೋದ್ಯಮಕ್ಕೆ ತೀವ್ರ ಹಿನ್ನಡೆ ಉಂಟಾಗಿದೆ. ಬ್ರಿಟನ್ನಿನ ಉದ್ಯಮಿ ರಿಚರ್ಡ್ ಬ್ರಾನ್ಸನ್ ಅವರಿಂದ ಸ್ಥಾಪನೆಗೊಂಡಿರುವ ವಾಣಿಜ್ಯ ಉದ್ದೇಶದ ಬಾಹ್ಯಾಕಾಶ ಪ್ರವಾಸಿ ಸಂಸ್ಥೆ ವರ್ಜಿನ್ ಗಲಾಕ್ಟಿಕ್ ಸಿದ್ಧಪಡಿಸಿದ್ದ ‘ಸ್ಪೇಸ್ಶಿಪ್ ಟು’ ದುರಂತದಲ್ಲಿ ಒಬ್ಬ ಪೈಲಟ್ ಮೃತಪಟ್ಟಿದ್ದರೆ, ಇನ್ನೊಬ್ಬ ಪೈಲಟ್ ಪ್ಯಾರಾಷೂಟ್ ನೆರವಿನಿಂದ ನೌಕೆಯಿಂದ ಹೊರಗೆ ಜಿಗಿದು ಪಾರಾಗಿದ್ದರೂ ಗಂಭೀರವಾಗಿ ಗಾಯಗೊಂಡಿದ್ದಾನೆ.
‘ಸ್ಪೇಸ್ಶಿಪ್ ಟು’ ಹೆಸರಿನ ರಾಕೆಟ್ ವಿನ್ಯಾಸ ಮಾಡಿ ನಿರ್ಮಿಸಿದ್ದ ಸ್ಕೇಲ್ಡ್ ಕಂಪೋಸಿಟಿಸ್ ಈ ಪರೀಕ್ಷಾರ್ಥ ಹಾರಾಟ ಕೈಗೊಂಡಿತ್ತು.
ವಾರದಲ್ಲಿ 2ನೇ ದುರಂತ
ವಾಣಿಜ್ಯ ಬಾಹ್ಯಾಕಾಶ ಉದ್ದಿಮೆ ಒಂದು ವಾರದ ಅವಧಿಯಲ್ಲಿ ಕಂಡ ಎರಡನೆ ದುರಂತ ಇದಾಗಿದೆ. ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಸರಕು ಸಾಗಿಸುತ್ತಿದ್ದ ಮಾನವರಹಿತ ರಾಕೆಟ್ ಉಡಾವಣೆಗೊಂಡ ಕೆಲವೇ ಕ್ಷಣಗಳಲ್ಲಿ ಸ್ಫೋಟಗೊಂಡಿತ್ತು.
ಮಾರ್ಗ ಮಧ್ಯೆ ಸ್ಫೋಟ
‘ವ್ಹೈಟ್‌ನೈಟ್‌ಟು’ ಹೆಸರಿನ ಬೃಹತ್‌ ವಿಮಾನದ ಬೆನ್ನೇರಿ ಈ ‘ಸ್ಪೇಸ್ಶಿಪ್ ಟು’ ರಾಕೆಟ್ ಅಂತರಿಕ್ಷಕ್ಕೆ ಪರೀಕ್ಷಾರ್ಥ ಪ್ರಯಾಣ ಕೈಗೊಂಡಿತ್ತು. 50 ಸಾವಿರ ಅಡಿಗಳಷ್ಟು ಎತ್ತರಕ್ಕೆ ಪ್ರಯಾಣಿಸಿದ ವಿಮಾನದಿಂದ ಈ ಬಾಹ್ಯಾಕಾಶ ನೌಕೆಯು ಕಳಚಿಕೊಂಡು ಅಲ್ಲಿಂದ ಬಾಹ್ಯಾಕಾಶದ ತುದಿ ಎಂದು ಗುರುತಿಸಿರುವ 62 ಮೈಲಿಗಳ ಎತ್ತರಕ್ಕೆ ಪ್ರಯಾಣಿಸಬೇಕಿತ್ತು. ಈ ಸಂದರ್ಭದಲ್ಲಿ ಎರಡು ಸಣ್ಣ ವಿಮಾನಗಳನ್ನು ಬಿಡುಗಡೆ ಮಾಡಿದ ನಂತರ ಈ ನೌಕೆಯ ಎಂಜಿನ್‌ ಚಾಲನೆಗೊಳ್ಳಬೇಕಾಗಿತ್ತು. ವಿಮಾನದಿಂದ ಬೇರ್ಪಟ್ಟು ಎಂಜಿನ್‌ ಚಾಲನೆಗೊಂಡು ಬಾಹ್ಯಾಕಾಶದ ಅಂಚಿನತ್ತ ಸಾಗುವ ಮಾರ್ಗಮಧ್ಯೆ 60ರಿಂದ 90 ಸೆಕೆಂಡುಗಳ ಅವಧಿಯಲ್ಲಿ ರಾಕೆಟ್ ಇಬ್ಭಾಗವಾಗಿ ಸ್ಫೋಟಗೊಂಡಿದೆ. ಉಡಾವಣೆಗೊಂಡ ಎರಡು ನಿಮಿಷಗಳಲ್ಲಿ ರಾಕೆಟ್‌ನ ಭಗ್ನಾವಶೇಷಗಳು ಭೂಮಿಗೆ ಬಂದು ಬಿದ್ದಿದ್ದವು.
ಸ್ಫೋಟಕ್ಕೆ ಕಾರಣ
ಸ್ಫೋಟಕ್ಕೆ ನಿಖರ ಕಾರಣ ಏನೆಂಬುದು ತಕ್ಷಣಕ್ಕೆ ಗೊತ್ತಾಗಿಲ್ಲ. ಈ ಬಾಹ್ಯಾಕಾಶ ನೌಕೆಯು ಪ್ಲಾಸ್ಟಿಕ್‌ ಆಧಾರಿತ ರಾಕೆಟ್ ಇಂಧನ ಬಳಸಿದ್ದೇ ಕಾರಣವಾಗಿರಬಹುದು ಎಂದು ಶಂಕಿಸಲಾಗಿದೆ. ಇಂತಹ ಇಂಧನವನ್ನು ಈ ಮೊದಲು ಬಳಸಿರಲಿಲ್ಲ.
ಯೋಜನೆ ಕೈಬಿಡಲಾರೆ ‘ವರ್ಜಿನ್ ಗಲಾಕ್ಟಿಕ್ ಪ್ರವಾಸಿ ಬಾಹ್ಯಾಕಾಶ ನೌಕೆ ದುರಂತಕ್ಕೀಡಾಗಿದ್ದರೂ, ನನ್ನ ಕನಸಿನ ವಾಣಿಜ್ಯ ಉದ್ದೇಶದ ಬಾಹ್ಯಾಕಾಶ ಪ್ರವಾಸ ಯೋಜನೆ ಕೈಬಿಡುವುದಿಲ್ಲ’ ಎಂದು ಬ್ರಾನ್ಸನ್ ಹೇಳಿದ್ದಾರೆ. |
ಅನಿರೀಕ್ಷಿತ?
ಸ್ಫೋಟವು ಅನಿರೀಕ್ಷಿತವೇನಲ್ಲ ಎಂದು ವಿಜ್ಞಾನಿಗಳು ಪ್ರತಿಕ್ರಿಯಿಸಿದ್ದಾರೆ. ರಾಕೆಟ್‌ನಲ್ಲಿ ಅಳವಡಿಸಿರುವ ಸುರಕ್ಷತಾ ಕ್ರಮಗಳು ಸಮರ್ಪಕವಾಗಿಲ್ಲ ಎನ್ನುವ ಎಚ್ಚರಿಕೆಯನ್ನು ನಿರ್ಲಕ್ಷಿಸಿದ್ದೇ ಈ ದುರಂತಕ್ಕೆ ಕಾರಣ. ಮಾರ್ಗ ಮಧ್ಯೆ ಇಂತಹ ಸ್ಫೋಟ ಸಂಭವಿಸುವುದು ನಿರೀಕ್ಷಿತವಾಗಿತ್ತು ಎಂದು ರಾಕೆಟ್ ತಂತ್ರಜ್ಞರು ಮತ್ತು ಬಾಹ್ಯಾಕಾಶ ಪರಿಣತರು ಅಭಿಪ್ರಾಯಪಟ್ಟಿದ್ದಾರೆ.
ದುಬಾರಿ ಯಾನ
ಬಾಹ್ಯಾಕಾಶಕ್ಕೆ ಖಾಸಗಿಯಾಗಿ ಪ್ರವಾಸಿಗರನ್ನು ಕರೆದೊಯ್ಯುವ ಈ ಕನಸಿನ ಯೋಜನೆಗೆ ಈಗಾಗಲೇ 700 ಜನರು ಮುಂಗಡ ಟಿಕೆಟ್‌ ಕಾದಿರಿಸಿದ್ದಾರೆ. ಆರಂಭದಲ್ಲಿ 2 ಲಕ್ಷ ಡಾಲರ್‌ರಷ್ಟಿದ್ದ (₨ 1.20 ಕೋಟಿ) ಟಿಕೆಟ್‌ ಬೆಲೆ ಇತ್ತೀಚೆಗೆ 2.50 ಲಕ್ಷ ಡಾಲರ್‌ಗೆ (₨ 1.50 ಕೋಟಿ) ಏರಿಕೆಯಾಗಿತ್ತು. ದುಬಾರಿ ಬೆಲೆ ತೆತ್ತು ಬಾಹ್ಯಾಕಾಶ ಪ್ರಯಾಣ ಕೈಗೊಳ್ಳಲು ಇಚ್ಛೆಪಟ್ಟವರಲ್ಲಿ ಹಾಲಿವುಡ್‌ ನಟ ಲಿಯೊನಾರ್ಡೊ ಡಿಕ್ಯಾರ್ಪಿಯೊ, ಏಂಜಲೀನಾ ಜೂಲಿ ಮತ್ತಿತರ ಗಣ್ಯರೂ ಇದ್ದಾರೆ. ಕೇವಲ ಎರಡು ಗಂಟೆಗಳ ಈ ವಿಶಿಷ್ಟ ಪ್ರಯಾಣದಲ್ಲಿ ಐದು ನಿಮಿಷಗಳ ತೂಕರಹಿತ ಅನುಭವವೂ ಸೇರಿರುತ್ತದೆ.
ಇಬ್ಬರು ಪೈಲಟ್‌ಗಳು ಮತ್ತು ಆರು ಜನ ಪ್ರಯಾಣಿಕರನ್ನು ಬಾಹ್ಯಾಕಾಶಕ್ಕೆ ಕರೆದೊಯ್ಯಲು ಈ ರಾಕೆಟ್ ಸಜ್ಜುಗೊಳಿಸಲಾಗಿತ್ತು. ಗಗನಯಾನಿಗಳಿಗೆ ಮಾತ್ರ ಸಿಗುವ ಬಾಹ್ಯಾಕಾಶದ ರೋಮಾಂಚಕಾರಿ ಅನುಭವವನ್ನು ಇತರರಿಗೂ ನೀಡುವುದೇ ಈ ಬಾಹ್ಯಾಕಾಶ ಪ್ರವಾಸದ ಮುಖ್ಯ ಉದ್ದೇಶವಾಗಿದೆ. 60 ಅಡಿ ಉದ್ದದ ಬಾಹ್ಯಾಕಾಶ ನೌಕೆಯಲ್ಲಿ ಪ್ರತಿಯೊಬ್ಬ ಪ್ರಯಾಣಿನಿಗಾಗಿ ಎರಡು ದೊಡ್ಡ ಕಿಟಕಿಗಳನ್ನು (ಒಂದು ಬದಿಯಲ್ಲಿ, ಇನ್ನೊಂದು ಮೇಲ್ಭಾಗದಲ್ಲಿ) ನಿರ್ಮಿಸಲಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.