ಬಿದಿರು: ವಿನ್ಯಾಸ ಸೌಂದರ್ಯದ ಚಿಗುರು

ಬಿದಿರಿನ ಗಿಡ ಅದೃಷ್ಟ ತರುತ್ತದೆ ಎಂದು ನಂಬಿದವರಿದ್ದಾರೆ. ಈಗ ಅದು ಒಳಾಂಗಣ ವಿನ್ಯಾಸದ ಸೌಂದರ್ಯವನ್ನು ದುಪ್ಪಟ್ಟು ಮಾಡುವ ಪರಿಕರ ಎಂದೂ ಪರಿಗಣಿತವಾಗಿದೆ. ಹಾಲ್, ಊಟದ ಮನೆ, ಅಡುಗೆ ಮನೆ, ಬೆಡ್‌ರೂಮ್ ಅಷ್ಟೇ ಅಲ್ಲದೆ ಬಚ್ಚಲುಮನೆಯನ್ನೂ ಅಲಂಕರಿಸಲು ಈ ದಿನಮಾನದಲ್ಲಿ ಬಿದಿರು ಬಳಕೆಯಾಗುತ್ತಿದೆ.

ಬಿದಿರನ್ನು ಪೀಠೋಪಕರಣ ತಯಾರಿಕೆಯಲ್ಲಿ, ಕಿಟಕಿ ಪರದೆಗಳನ್ನು ರೂಪಿಸಲು, ಸ್ತಂಭಗಳು ಹಾಗೂ ಕಲಾತ್ಮಕ ವಿನ್ಯಾಸಗಳನ್ನು ಮಾಡಲು ವ್ಯಾಪಕವಾಗಿ ಬಳಸುತ್ತಿದ್ದಾರೆ. ಹೊಸತನಕ್ಕೆ ತುಡಿಯುವ ಎಷ್ಟೋ ವಿನ್ಯಾಸಕರಿಗೆ ಅದು ಒದಗಿಬರುತ್ತಿದೆ. ಮನೆಗಳಷ್ಟೇ ಅಲ್ಲದೆ ಕಚೇರಿಗಳ ಒಳಾಂಗಣ ವಿನ್ಯಾಸದಲ್ಲಿಯೂ ಅದಕ್ಕೆ ಮನ್ನಣೆ ಸಿಗುತ್ತಿರುವ ಕಾಲವಿದು. ಹಾಗಿದ್ದೂ ಬಿದಿರಿನ ವಿಷಯದಲ್ಲಿ ಕೆಲವು ತಪ್ಪು ಕಲ್ಪನೆಗಳೂ ಇವೆ. ಏಷ್ಯಾ, ಫೆಂಗ್ ಶುಯಿ ವಿನ್ಯಾಸ ಅಥವಾ ಜೆನ್ ತತ್ವಗಳ ಪ್ರಕಾರ ‘ಬಿದಿರು ನಾನ್ಯಾರಿಗಲ್ಲದವಳು’ ಎಂಬ ಜಾನಪದ ಗೀತೆಗೆ ಅರ್ಥವಿದೆ.

ಬೆತ್ತ, ಕುರ್ಚಿ, ಸಣ್ಣಕೋಣೆಗಳ ಸಿಂಗಾರ, ಪೀಠೋಪಕರಣ ಹೀಗೆ ಬಿದಿರಿನ ಬಳಕೆ ವ್ಯಾಪಕ. ಇವತ್ತು ಬಿದಿರಿಗೆ ಸಮಕಾಲೀನ ವಿನ್ಯಾಸದ ಪ್ರಮುಖ ಪರಿಕರದ ಸ್ಥಾನ ಸಂದಿದೆ. ಸ್ಥಳ ವಿಭಜಕವಾಗಿಯೂ ಅದನ್ನು ಹಲವು ಬಗೆಗಳಲ್ಲಿ ಉಪಯೋಗಿಸುತ್ತಿದ್ದಾರೆ. ಅಷ್ಟೇ ಏಕೆ, ಬಿದಿರಿನ ಬಟ್ಟೆಗಳು, ರಗ್‌ಗಳು, ಶೀಟ್‌ಗಳೂ ತಯಾರಾಗುತ್ತಿವೆ. ಹಿಂದೆ ಬಿದಿರು ಕೆಲವು ಕೀಟಗಳನ್ನು ಆಕರ್ಷಿಸುತ್ತದೆ ಎಂಬ ಅಭಿಪ್ರಾಯವಿತ್ತು. ಆದರೀಗ ಅವುಗಳ ಬಳಿ ಯಾವ ಕೀಟವೂ ಸುಳಿಯದಂತೆ ಸಂಸ್ಕರಿಸಲಾಗುತ್ತದೆ.

ಪರಿಸರ ಸ್ನೇಹಿ ಹಾಗೂ ನಿರ್ವಹಣಾ ವೆಚ್ಚ ದುಬಾರಿ ಅಲ್ಲ ಎನ್ನುವ ಕಾರಣಕ್ಕೆ ಬಿದಿರಿಗೆ ಬೆಲೆಬಾಳುವ ಮರಗಳ ಪೀಠೋಪಕರಣಗಳಿಗಿಂತ ಬೇಡಿಕೆ ಹೆಚ್ಚಾಗಿದೆ. ಬಿದಿರು ಬೇಗ ಬೆಳೆಯುವುದರಿಂದ ಕಡಿದರೆ ನಾಶವಾದೀತು ಎಂಬ ಆತಂಕವಿಲ್ಲ. ದೀರ್ಘ ಕಾಲ ಬಾಳಿಕೆ ಬರುವ, ಎಂಥ ವಿನ್ಯಾಸಕ್ಕೂ ಒಗ್ಗಬಲ್ಲ, ಹಗುರವಾದ ಬಿದಿರು ಒಂದು ವಿಧದಲ್ಲಿ ವಿನ್ಯಾಸಕರ ಕನಸಿನ ಪರಿಕರ.

ಹೊರಾಂಗಣದಲ್ಲಿ ಯಾವುದಾದರೂ ಕುರ್ಚಿ ಸೋಫಾ ಇಟ್ಟಿರುವವರು ಮಳೆಗಾಲದಲ್ಲಿ ನೀರಿನಿಂದ ನೆಂದುಬಿಟ್ಟರೆ ಹಾಳಾಗುತ್ತದೆ ಎಂದು ಪ್ಲಾಸ್ಟಿಕ್ ಹೊದಿಕೆಗಳಿಂದ ಮುಚ್ಚುವುದುಂಟು. ಬಿದಿರಿನ ಪೀಠೋಪಕರಣ ನೆಂದರೂ ಹಾಳಾಗದೇ ಇರುವುದರಿಂದ ಸಂರಕ್ಷಣೆಯ ಉಸಾಬರಿಯೇ ಇಲ್ಲ. ಈ ಗುಣದಿಂದಾಗಿಯೇ ಬಚ್ಚಲುಮನೆಯ ಪೀಠೋಪಕರಣ ತಯಾರಿಕೆಯಲ್ಲಿ ಬಿದಿರಿಗೆ ದಿನೇದಿನೇ ಹೆಚ್ಚು ಬೇಡಿಕೆ ಕುದುರುತ್ತಿದೆ. ಶೆಲ್ಫ್‌ಗಳು, ಡೈನಿಂಗ್ ಸೆಟ್‌ಗಳು, ಮಕ್ಕಳ ಪೀಠೋಪಕರಣ, ಆರಾಮ ಕುರ್ಚಿಗಳು, ಬಾರ್ ಕೌಂಟರ್‌ಗಳು, ಡ್ರೆಸಿಂಗ್ ಟೇಬಲ್ ಎಲ್ಲವುಗಳಿಗೂ ಬಿದಿರು ಮೂಲ ಸಾಮಗ್ರಿಯಾಗುತ್ತಿರುವ ಕಾಲವಿದು.

ಅಷ್ಟೇ ಏಕೆ, ಟೈಲ್ಸ್ ಮೇಲೆ ಅಲಂಕಾರಿಕ ಪರಿಕರವಾಗಿಯೂ ಬಿದಿರಿನ ಹಾಸು ಉಪಯೋಗಕ್ಕೆ ಬರುತ್ತಿದೆ. ಸಹಜ ಬಣ್ಣದ್ದಷ್ಟೇ ಅಲ್ಲದೆ ಅದಕ್ಕೆ ಬೇರೆ ಬಣ್ಣಗಳನ್ನು ನೀಡುವ ತಂತ್ರಜ್ಞಾನ ಈಗ ಇದೆ. ಕಾರ್ಬೊನೈಸ್ಡ್ ಬಗೆಯಲ್ಲೂ ಅದು ದೊರೆಯುತ್ತಿದೆ. ಸರಿಯಾದ ರೀತಿ ನಿರ್ವಹಿಸಿದರೆ ದೀರ್ಘ ಕಾಲ ಬಾಳಿಕೆ ಬರುವುದರಿಂದ ಹಾಲ್‌ಗಳಿಗೂ ಈ ಹಾಸು ಸೂಕ್ತ ಎಂದು ವಿನ್ಯಾಸಕಾರರು ಸಲಹೆ ನೀಡುತ್ತಿದ್ದಾರೆ. ನೆಲಹಾಸಿನ ಕೆಳಗೆ ಚೆಲ್ಲಿದ ನೀರು ಉಳಿಯದಂತೆ ನಿಗಾ ಮಾಡಬೇಕಷ್ಟೆ.

ಯಾಕೆಂದರೆ, ಬಿದಿರಿನ ಮೇಲ್ಭಾಗದಲ್ಲಿ ನೀರು ಬೇಗ ಒಣಗಿಹೋಗುತ್ತದೆ. ಕೆಳಗೆ ಹಾಗೆಯೇ ಉಳಿದರೆ ನೆಲ ಶಿಥಿಲವಾಗುತ್ತದೆ. ಅಂಥ ಹಾಸಿನ ಮೇಲೆ ಭಾರವಾದ ಪೀಠೋಪಕರಣ ಇಟ್ಟರೆ ಅದರ ಕಾಲುಗಳಿರುವ ಭಾಗದಲ್ಲಿ ಕಲೆಗಳು ಮೂಡಬಹುದು. ಅದನ್ನು ತಪ್ಪಿಸುವ ರೀತಿಯಲ್ಲಿ ನೆಲಹಾಸನ್ನು ಹಾಕಿಸುವುದು ಉತ್ತಮ.

ದೀಪಾಲಂಕಾರ, ಅದೃಷ್ಟ ಇತ್ಯಾದಿ
ಬಿಳಿಬಣ್ಣದ ಗೋಡೆಗಳಿಗೆ ಅಲ್ಲಲ್ಲಿ ಬಿದಿರಿನ ಪರದೆಗಳನ್ನು ನೇತುಬಿಟ್ಟರೆ ಮನೆಯ ಅಂದ ಹೆಚ್ಚುತ್ತದೆ. ನಿಲುವುಗನ್ನಡಿಯ ಪಕ್ಕದ ಭಾಗದಲ್ಲಿ