ಬೆಳ್ಳಿತೆರೆಗೆ ಬರಲಿದೆ ಕಥಾನಾಯಕನ ಕಥೆ

ಸಿನಿಮಾದಲ್ಲಿ ಅವಕಾಶಗಳು ಕುದುರುತ್ತಿರುವಾಗಲೇ ದೂರದರ್ಶನದಲ್ಲಿ ಮುಖ್ಯ ಮೇಕಪ್ ಕಲಾವಿದರಾಗಿ ಸೇರಿಕೊಂಡರು. ಅಲ್ಲಿ ಎರಡು ವರ್ಷ ದುಡಿಯುವಷ್ಟರಲ್ಲಿ ಮತ್ತೆ ಚಿತ್ರರಂಗದ ತುಡಿತ ತೀವ್ರವಾಯಿತು. ಟೀವಿ ಬಿಟ್ಟರು. ಸ್ವಲ್ಪ ಕಾಲ ಜಿ.ವಿ. ಅಯ್ಯರ್ ಅವರ ‘ಕೃಷ್ಣಾವತಾರ’ ಹಿಂದಿ ಧಾರಾವಾಹಿಗೆ ದುಡಿದರು. ಅಲ್ಲಿ ಲಾಭವಿಲ್ಲ ಎಂದುಕೊಂಡು ಮತ್ತೆ ಸಿನಿಮಾ ಕಡೆ ಹೊರಳಿದರು. ‘ಬೆಳ್ಳಿ ಕಾಲುಂಗುರ’, ‘ತಬರನ ಕತೆ’, ‘ಮನೆ’, ‘ಮೂರು ದಾರಿಗಳು’, ‘ನ್ಯಾಯದ ಕಣ್ಣು’, ‘ಮುತ್ತಿನಹಾರ’– ಹೀಗೆ ಅನೇಕ ಸಿನಿಮಾಗಳಿಗೆ ಮೇಕಪ್ ಕಲಾವಿದನಾಗಿ ಕೆಲಸ ಮಾಡಿದರು.

ಮೇಕಪ್ ಕಲಾವಿದರಾಗಿ ಸುಮಾರು 140 ಚಿತ್ರಗಳಿಗೆ ದುಡಿದ ಕೃಷ್ಣ ಅವರಿಗೆ ಹೆಸರು ತಂದುಕೊಟ್ಟಿದ್ದು ಕಿರುತೆರೆಯ ಧಾರಾವಾಹಿ ‘ನಟಸಾರ್ವಭೌಮ’. 52 ವಾರಗಳ (ಕಂತು) ಕಾಲ ರಾಜಕುಮಾರರ ಜೀವನಚರಿತ್ರೆಯನ್ನು ನಿರೂಪಿಸಿದ ಕೀರ್ತಿ ಅವರದು. ಇದಕ್ಕಾಗಿ 36 ತಾಸುಗಳ ಕಾಲ ರಾಜ್ ಸಂದರ್ಶನ ಮಾಡಿದ್ದು ಕೃಷ್ಣ ಅವರ ಜೀವನದ ಅವಿಸ್ಮರಣೀಯ ಕ್ಷಣಗಳು. ಆ ಸವಿನೆನಪುಗಳು ಕೂಡ ‘ಕಥಾನಾಯಕನ ಕಥೆ’ ಚಿತ್ರಕ್ಕೆ ಪ್ರೇರಣೆಯಾಗಿವೆ. ‘ಕಥಾನಾಯಕನ ಕಥೆ’ ಕೃಷ್ಣ ಅವರ ಮಹತ್ವಾಕಾಂಕ್ಷೆಯ ಪ್ರಯತ್ನ. ಇದು ನನ್ನ ಜೀವನದ ಸಾರ್ಥಕತೆಯ ಸಿನಿಮಾ ಎನ್ನುವುದು ಅವರ ಅನಿಸಿಕೆ.

ಮುತ್ತುರಾಜನ ಹುಟ್ಟಿನಿಂದ ಹಿಡಿದು ‘ಬೇಡರ ಕಣ್ಣಪ್ಪ’ ಚಿತ್ರದ ಮೂಲಕ ರಾಜಕುಮಾರ್ ಉದಯದವರೆಗಿನ ಕಥೆ (1930ರಿಂದ 1945ರವರೆಗಿನ ಅವಧಿ) ಸಿನಿಮಾದಲ್ಲಿ ಇರಲಿದೆ. ಈ ಸಿನಿಮಾ ಗೆದ್ದರೆ, ‘ಬೇಡರ ಕಣ್ಣಪ್ಪ’ ಚಿತ್ರದ ನಂತರದ ರಾಜಕುಮಾರರ ಬದುಕನ್ನು ಸಿನಿಮಾಕ್ಕೆ ಅಳವಡಿಸುವ ಉದ್ದೇಶ ಕೃಷ್ಣ ಅವರಿಗಿದೆ. ‘ರಾಜಕುಮಾರ್‌ ಬಗ್ಗೆ ಜನರಿಗೆ ಗೊತ್ತಿಲ್ಲದ ಅನೇಕ ಪ್ರಸಂಗಗಳನ್ನು ಸಿನಿಮಾದಲ್ಲಿ ಅಳವಡಿಸುವ ಪ್ರಯತ್ನ ನಡೆಯುತ್ತಿದೆ. ಸಮಾಜವನ್ನೇ ವಿಶ್ವವಿದ್ಯಾಲಯ ಆಗಿಸಿಕೊಂಡು ರೂಪುಗೊಂಡ ಮೇರು ಕಲಾವಿದನ ಸಾಧನೆಯ ಹಿಂದಿನ ಪ್ರೇರಣೆಗಳನ್ನು ಈ ತಲೆಮಾರಿಗೆ ತಲುಪಿಸುವುದು ನನ್ನ ಉದ್ದೇಶ. ಮುಖ್ಯವಾಗಿ ರಾಜಕುಮಾರರ ಪಿತೃಭಕ್ತಿ ಇಂದಿನವರಿಗೆ ಮಾದರಿಯಾಗಬಲ್ಲದು’ ಎನ್ನುತ್ತಾರೆ ಕೃಷ್ಣ.

ರಾಜಕುಮಾರರ ತಂದೆ ಪುಟ್ಟಸ್ವಾಮಯ್ಯ, ಮಕ್ಕಳಾದ ಮುತ್ತುರಾಜ್, ವರದರಾಜ್, ಶಾರದಮ್ಮ ಅವರ ಪಾತ್ರಗಳು ಸಿನಿಮಾದಲ್ಲಿ ಬರಲಿವೆ. ಇವರುಗಳ ಜೊತೆಗೆ ಗುಬ್ಬಿ ವೀರಣ್ಣ, ಸುಬ್ಬಯ್ಯನಾಯ್ಡು ಅವರ ಪಾತ್ರಗಳೂ ಇರಲಿವೆ. ಈ ಅಪೂರ್ವ ಕಲಾವಿದರ ಪಾತ್ರಗಳಿಗೆ ಜೀವ ತುಂಬುವುದಾದರೂ ಯಾರು? ಪ್ರಸ್ತುತ ಅಂಥ ಕಲಾವಿದರ ತಲಾಷಿನಲ್ಲಿ ಕೃಷ್ಣ ತೊಡಗಿಕೊಂಡಿದ್ದಾರೆ. ರಂಗಭೂಮಿಯಲ್ಲೇನಾದರೂ ಅಂಥ ಪ್ರತಿಭೆಯ ಕಿಡಿಗಳು ಸಿಕ್ಕಾವೆಯೇ ಎಂದು ಕೃಷ್ಣ ಅವರ ಶೋಧ ನಡೆದಿದೆ.

ಅಂದಹಾಗೆ, ‘ಕಥಾನಾಯಕನ ಕಥೆ’ ಎನ್ನುವುದು ‘ವಿಜಯಚಿತ್ರ’ ಸಿನಿಮಾ ಮಾಸಿಕದಲ್ಲಿ ಪ್ರಕಟಗೊಂಡ ರಾಜಕುಮಾರರ ಜೀವನ ಕಥೆ. ಈವರೆಗೆ ರಾಜಕುಮಾರರ ಬಗ್ಗೆ ಸುಮಾರು ಎಪ್ಪತ್ತೈದು ಪುಸ್ತಕಗಳು ಪ್ರಕಟಗೊಂಡಿವೆ. ಆದರೆ, ಅಧಿಕೃತ ಎನ್ನುವ ವಿವರಗಳು ಇರುವುದು ‘ಕಥಾನಾಯಕನ ಕಥೆ’ಯಲ್ಲಿ. ಆ ಶೀರ್ಷಿಕೆಯ ಜೊತೆಗೆ ಕಥೆಯನ್ನೂ ಕಡ ತೆಗೆದುಕೊಂಡಿರುವ ಕೃಷ್ಣ ಅವರು, ‘ನಟಸಾರ್ವಭೌಮ’ ಧಾರಾವಾಹಿ ಸಂದರ್ಭದಲ್ಲಿನ ತಮ್ಮ ಅನುಭವಗಳನ್ನೂ ಚಿತ್ರಕ್ಕೆ ಬಳಸಿಕೊಳ್ಳುತ್ತಿದ್ದಾರೆ.

ರಾಜಕುಮಾರ್ ಇನ್‌ಸ್ಟಿಟ್ಯೂಟ್!
ರಾಜಕುಮಾರ್ ಹೆಸರಿನಲ್ಲಿ ಚಲನಚಿತ್ರ ತರಬೇತಿ ಸಂಸ್ಥೆಯೊಂದನ್ನು ಮೇಕಪ್ ಕೃಷ್ಣ ರೂಪಿಸಿದ್ದಾರೆ. ಸದ್ಯದಲ್ಲೇ ಆರಂಭವಾಗಲಿರುವ ಈ ಸಂಸ್ಥೆ ಕಲಾವಿದರಾಗಲು ಬಯಸುವ ಪ್ರತಿಭೆಗಳನ್ನು ತಿದ್ದಿತೀಡಲಿದೆಯಂತೆ. 6 ತಿಂಗಳ ಕೋರ್ಸ್.