ಭದ್ರಾವತಿಯ ಚೆಂದುಳ್ಳಿ!

ಆಗ ತಾನೆ ಕಾಲೇಜು ಮೆಟ್ಟಿಲೇರಿದ್ದ ಯುವತಿಗೆ ಸಿನಿಮಾ ಪೋಸ್ಟರ್‌ಗಳು, ಜಾಹೀರಾತು ಪ್ಲೆಕ್ಸ್‌ಗಳನ್ನು ಕಂಡಾಗ ತಾನೂ ಹೀಗೆಯೇ ಕಾಣಿಸಿಕೊಳ್ಳಬೇಕು ಎಂಬ ಆಸೆ. ನಟಿಯಾಗಬೇಕೆಂಬ ಹಂಬಲ ಉತ್ಕಟವಾಗಿರದಿದ್ದರೂ, ಸಣ್ಣ ಸೆಳೆತವಿತ್ತು. ಅದು ಈಡೇರಲು ಹೆಚ್ಚು ಕಾಲವೂ ಬೇಕಾಗಲಿಲ್ಲ. ಅದಕ್ಕೆ ಕಿರುತೆರೆ ವೇದಿಕೆಯನ್ನೂ ನೀಡಿತು.

ಈ ವಾರ ತೆರೆಕಾಣುತ್ತಿರುವ ‘ಗಣಪ’ ಚಿತ್ರದ ಮೂಲಕ ಸಿನಿಮಾ ಪೋಸ್ಟರ್‌ಗಳಲ್ಲಿ ಕಾಣಿಸಿಕೊಳ್ಳುವ ಆಸೆಯನ್ನು ತಣಿಸಿಕೊಂಡವರು ನಟಿ ಮಾನ್ವಿತಾ. ಅವರ ಬಯಕೆ ಒಂದೆರಡು ಸಿನಿಮಾಕ್ಕೆ ಸೀಮಿತವಲ್ಲ, ಅಭಿನಯವನ್ನು ಸಂಪೂರ್ಣ ವೃತ್ತಿಯಾಗಿ ತೆಗೆದುಕೊಳ್ಳಲು ತೀರ್ಮಾನಿಸಿದ್ದಾರೆ. ಗಡಿಯಾಚೆಗಿನ ಚಿತ್ರಲೋಕಗಳತ್ತಲೂ ಅವರು ಕಣ್ಣು ಹಾಯಿಸುತ್ತಿದ್ದಾರೆ.

ಭದ್ರಾವತಿ ಮೂಲದ ಮಾನ್ವಿತಾ ಮೊದಲು ಕ್ಯಾಮೆರಾ ಎದುರಿಸಿದ್ದು ಕಿರುತೆರೆಯಲ್ಲಿ. ಎಸ್ಸೆಸ್ಸೆಲ್ಸಿಯಲ್ಲಿ ಇದ್ದಾಗ ‘ಪ್ರೀತಿಯಿಂದ’ ಧಾರಾವಾಹಿಯ ಸಣ್ಣಪಾತ್ರಕ್ಕೆ ಮೂರು ದಿನಗಳ ಮಟ್ಟಿಗೆ ನಟಿಸುವವರು ಬೇಕು ಎಂದು ಹುಡುಕಾಡುತ್ತ ಬಂದ ತಂಡದ ಕಣ್ಣಿಗೆ ಬಿದ್ದವರು ಮಾನ್ವಿತಾ. ಹತ್ತಿರದ ತೀರ್ಥಹಳ್ಳಿಯಲ್ಲಿಯೇ ಚಿತ್ರೀಕರಣ ಇದ್ದಿದ್ದರಿಂದ ಮತ್ತು ಮೂರು ದಿನಗಳಿಗೇ ಶೂಟಿಂಗ್ ಮುಗಿದು ಹೋಗುತ್ತದೆ ಎಂದಿದ್ದರಿಂದ ಮನೆಯವರನ್ನು ಒಪ್ಪಿಸಲು ಮಾನ್ವಿತಾಗೆ ಕಷ್ಟವಾಗಲಿಲ್ಲ.

ಆದರೆ ಗುಲಾಬಿ ಎಂಬ ಈ ಚಿಕ್ಕಪಾತ್ರ ಮುಂದೆ ಧಾರಾವಾಹಿಯ ಪ್ರಮುಖ ಪಾತ್ರವಾಗಿ ಬೆಳೆಯಿತು. ಏಳು ತಿಂಗಳ ಕಾಲ ಈ ಧಾರಾವಾಹಿ ತಂಡದ ಸದಸ್ಯೆಯಾಗಿ ಮಾನ್ವಿತಾ ಗುರ್ತಿಸಿಕೊಂಡರು. ಬಳಿಕ ಕಂಪ್ಯೂಟರ್ ಸೈನ್ಸ್‌ ಡಿಪ್ಲೊಮಾಗಾಗಿ ಕಾಲೇಜು ಮೆಟ್ಟಿಲೇರಿದ ಅವರಲ್ಲಿ ಸಿನಿಮಾರಂಗಕ್ಕೆ ಕಾಲಿಡುವ ಆಸಕ್ತಿ ಸಣ್ಣನೆ ಚಿಗುರಿತ್ತು. ಓದು ಮುಗಿಸಿ ಅವಕಾಶಕ್ಕಾಗಿ ಬೆನ್ನುಹತ್ತಿದ ಅವರಿಗೆ ಬಾಗಿಲು ತೆರೆದದ್ದು ‘ಗಣಪ’.

ಅಂದಹಾಗೆ, ಮಾನ್ವಿತಾ ಅವರ ಹಿಂದಿನ ಹೆಸರು ಪ್ರಿಯಾಂಕಾ. ಚಿತ್ರರಂಗಕ್ಕೆ ಕಾಲಿಡುವಾಗ ತಮ್ಮ ಹುಟ್ಟು ಹೆಸರು ಮಾನ್ವಿತಾಗೆ ಬದಲಾಗಿದ್ದಾರೆ. ಹೆಸರಿನೊಟ್ಟಿಗೆ ತಮ್ಮ ದೆಸೆಯೂ ಬದಲಾಗುವ ನಿರೀಕ್ಷೆ ಅವರದು. ‘ಗಣಪ’ ಚಿತ್ರದಲ್ಲಿ ನಟಿಸುವಾಗಲೇ ಹಲವು ಅವಕಾಶಗಳು ಬಂದರೂ ಮೊದಲ ಚಿತ್ರದ ಫಲಿತಾಂಶ ದೊರೆತ ಬಳಿಕವೇ ಮತ್ತೆ ಬಣ್ಣಹಚ್ಚುವುದು ಎಂಬ ನಿಲುವಿಗೆ ಅಂಟಿಕೊಂಡರು. ಇದಕ್ಕೆ ಕಾರಣ ಅವರ ಪಾತ್ರದ ವ್ಯಾಪ್ತಿ. ನಾಯಕನೊಟ್ಟಿಗೆ ಹಾಡಿ ಕುಣಿದು, ಕೆಲ ದೃಶ್ಯಗಳಿಗೆ ಸೀಮಿತ­ವಾಗುವ ಪಾತ್ರ ತನ್ನದಲ್ಲ ಎನ್ನುತ್ತಾರೆ ಮಾನ್ವಿತಾ.