ಪ್ರಾದೇಶಿಕ ಅಭಿವೃದ್ಧಿ ಉದ್ದೇಶದ, ಚೀನಾ ನೇತೃತ್ವದಲ್ಲಿನ ಬಹುರಾಷ್ಟ್ರೀಯ ‘ಏಷ್ಯಾ ಮೂಲಸೌಕರ್ಯ ಹೂಡಿಕೆ ಬ್ಯಾಂಕ್’ (ಎಐಐಬಿ) ಬೀಜಿಂಗ್ನಲ್ಲಿ ಅಸ್ತಿತ್ವಕ್ಕೆ ಬರುತ್ತಿರುವುದು ಈ ವಲಯದ ದೇಶಗಳ ಪಾಲಿಗೆ ಹೊಸ ಭಾಗ್ಯದ ಬಾಗಿಲು ತೆರೆಯಲಿದೆ. ಅಮೆರಿಕದ ತೀವ್ರ ವಿರೋಧದ ಮಧ್ಯೆಯೂ ಈ ಬ್ಯಾಂಕ್ ಕೊನೆಗೂ ಅಸ್ತಿತ್ವಕ್ಕೆ ಬರುತ್ತಿರುವುದು ಈ ವಲಯದ ಮೂಲಸೌಕರ್ಯಗಳ ಅಭಿವೃದ್ಧಿ ನಿಟ್ಟಿನಲ್ಲಿನ ಮಹತ್ವದ ಬೆಳವಣಿಗೆಯಾಗಿದೆ.
ಸದಸ್ಯ ದೇಶಗಳಿಗೆ ಸಾಲ ಪಡೆಯುವ ಅವಕಾಶಗಳು ಹೆಚ್ಚುವುದು ಮತ್ತು ಸುಲಭವಾಗಿ ಸಾಲ ಸಿಗಲಿರುವುದರಿಂದ ನಿಜಕ್ಕೂ ಇದೊಂದು ಸಕಾರಾತ್ಮಕ ಬೆಳವಣಿಗೆ. ಅಮೆರಿಕದ ಒತ್ತಡಕ್ಕೆ ಮಣಿದಿರುವ ಜಪಾನ್ ಮತ್ತು ದಕ್ಷಿಣ ಕೊರಿಯಾ-ಗಳು ಈ ಬ್ಯಾಂಕ್ನ ಸದಸ್ಯತ್ವ ಪಡೆಯದಿರುವುದು ಬಿಟ್ಟರೆ, ಅಭಿವೃದ್ಧಿ ಹೊಂದುತ್ತಿರುವ ಮತ್ತು ಬಡ ದೇಶಗಳೇ ಹೆಚ್ಚಾಗಿರುವ 21 ಸದಸ್ಯರ ಪೈಕಿ ಭಾರತವು ಚೀನಾ ನಂತರದ ಎರಡನೇ ಪ್ರಮುಖ ಪಾಲುದಾರಿಕೆ ದೇಶವಾಗಿದೆ. ಇದರಿಂದ ಚೀನಾದ ಮೇಲುಗೈಗೆ ಕಡಿವಾಣ ಬೀಳಲಿದ್ದು, ಸಮತೋಲನವೂ ಸಾಧ್ಯವಾಗಲಿದೆ.
ಭಾರತವೂ ಚೀನಾ ಮತ್ತಿತರ ದೇಶಗಳ ಸಹಯೋಗದಲ್ಲಿಯೇ ಕಾರ್ಯನಿರ್ವಹಿಸುವ ಮೂಲಕ ಇತರ ಸದಸ್ಯ ದೇಶಗಳ ಹಿತ ಕಾಯಬೇಕಾಗಿದೆ. ಏಷ್ಯಾದ ದೇಶಗಳ ಅಭಿವೃದ್ಧಿಗೆ ನೆರವಾಗುವ ಮಹತ್ವಾಕಾಂಕ್ಷೆಯ ಈ ಬ್ಯಾಂಕ್ನ ಅಸ್ತಿತ್ವವು ಅಮೆರಿಕ ನೇತೃತ್ವದ ಜಾಗತಿಕ ಆರ್ಥಿಕ ವ್ಯವಸ್ಥೆಗೆ ಒಡ್ಡಿದ ಮೊದಲ ಸವಾಲೂ ಆಗಿದೆ. ಹೊಸ ಬ್ಯಾಂಕ್ ಅಸ್ತಿತ್ವಕ್ಕೆ ಬರುತ್ತಿರುವುದರಿಂದ ಈ ಪ್ರದೇಶದ ಅಭಿವೃದ್ಧಿಗೆ ಸಹಜವಾಗಿಯೇ ಒತ್ತು ಸಿಗುವುದರ ಜತೆಗೆ, ಜಾಗತಿಕ ಆರ್ಥಿಕ ಶಕ್ತಿಯ ಸಮತೋಲನವೂ ಈಗ ಏಷ್ಯಾದತ್ತ ವಾಲಿದಂತಾಗಿದೆ. ಮೂಲಸೌಕರ್ಯಗಳ ಯೋಜನೆಗಳಿಗೆ ನೆರವು ಪಡೆಯಲು ಏಷ್ಯಾದ ಅಭಿವೃದ್ಧಿ ಹೊಂದುತ್ತಿರುವ ದೇಶಗಳು ಇದುವರೆಗೆ ಅಂತರರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಮತ್ತು ವಿಶ್ವಬ್ಯಾಂಕ್ನ ಮರ್ಜಿ ಕಾಯಬೇಕಾಗಿತ್ತು.
ಇನ್ನು ಮುಂದೆ ಅಂತಹ ಪರಿಸ್ಥಿತಿ ಎದುರಾಗದು. ಈ ಎರಡೂ ಜಾಗತಿಕ ಹಣಕಾಸು ಸಂಸ್ಥೆಗಳು ಸಿರಿವಂತ ದೇಶಗಳ ಅಗತ್ಯಗಳಿಗೆ ಮಾತ್ರ ಸ್ಪಂದಿಸುತ್ತಿರುವುದು ಸುಳ್ಳಲ್ಲ. ಏಷ್ಯಾದ ಅಭಿವೃದ್ಧಿ ಹೊಂದುತ್ತಿರುವ ದೇಶಗಳ ಹಣಕಾಸಿನ ಅಗತ್ಯಗಳು ಈ ಸಂಸ್ಥೆಗಳಿಗೆ ಇದುವರೆಗೂ ಮನವರಿಕೆಯಾಗಿಲ್ಲ ಅಥವಾ ನೆರವು ನೀಡುವ ಮನಸ್ಸು ಅವುಗಳಿಗೆ ಇದ್ದಂತಿಲ್ಲ. ಏಷ್ಯಾದ ದೇಶಗಳ ಹಣಕಾಸಿನ ನೆರವಿನ ಅಗತ್ಯಗಳಿಗೆ ಇವುಗಳು ಸೂಕ್ತವಾಗಿ ಸ್ಪಂದಿಸದಿರುವುದೇ ಹೊಸ ಬ್ಯಾಂಕ್ ಅಸ್ತಿತ್ವಕ್ಕೆ ಬರಲು ಮೂಲ ಕಾರಣ ಎನ್ನುವುದನ್ನು ಮರೆಯುವಂತಿಲ್ಲ.
ಒಂದು ಅಂದಾಜಿನ ಪ್ರಕಾರ, 2020ರವರೆಗಿನ ಅವಧಿಯಲ್ಲಿ ಏಷ್ಯಾದ ದೇಶಗಳ ಮೂಲಸೌಕರ್ಯ ಅಭಿವೃದ್ಧಿ ಯೋಜನೆಗಳಿಗೆ ವಾರ್ಷಿಕ ₨ 48 ಲಕ್ಷ ಕೋಟಿಗಳಷ್ಟು ಹಣಕಾಸು ನೆರವಿನ ಅಗತ್ಯ ಇದೆ. ಜಪಾನ್ ಹಿಡಿತದಲ್ಲಿ ಇರುವ ಏಷ್ಯಾ ಅಭಿವೃದ್ಧಿ ಬ್ಯಾಂಕ್ (ಎಡಿಬಿ) ವರ್ಷಕ್ಕೆ ₨ 60 ಸಾವಿರ ಕೋಟಿಗಳಷ್ಟೆ ಕೊಡುವ ಸಾಮರ್ಥ್ಯ ಹೊಂದಿದೆ. ಅಮೆರಿಕ ನಿಯಂತ್ರಣದ ವಿಶ್ವಬ್ಯಾಂಕ್ ಮತ್ತು ಯುರೋಪ್ ದೇಶಗಳ ನಿಯಂತ್ರಣದ ಐಎಂಎಫ್ನಿಂದ ಕೂಡ ಏಷ್ಯಾದ ಬೇಡಿಕೆ ಈಡೇರಿಸುವುದು ಸಾಧ್ಯವಾಗುತ್ತಿಲ್ಲ.
₨ 3 ಲಕ್ಷ ಕೋಟಿಗಳ ಮೂಲ ಬಂಡವಾಳದೊಂದಿಗೆ ಅಸ್ತಿತ್ವಕ್ಕೆ ಬರುತ್ತಿರುವ ಹೊಸ ಬ್ಯಾಂಕ್ನಲ್ಲಿ ಚೀನಾ ಪ್ರಾಬಲ್ಯ ಸಾಧಿಸದಂತೆಯೂ ಇತರ ಸದಸ್ಯ ದೇಶಗಳು ನೋಡಿಕೊಳ್ಳಬೇಕಾಗಿದೆ. ಪ್ರಾದೇಶಿಕ ಮೂಲಸೌಕರ್ಯ ಅಭಿವೃದ್ಧಿಗೆ ಈ ಬ್ಯಾಂಕ್ ಅಗತ್ಯವಾದ ಬಂಡವಾಳ ಕ್ರೋಡೀಕರಿಸಿ ಹಣಕಾಸು ನೆರವು ಒದಗಿಸುವ ನಿಟ್ಟಿನಲ್ಲಿ ಎಡಿಬಿ, ಐಎಂಎಫ್ ಮತ್ತು ವಿಶ್ವಬ್ಯಾಂಕ್ಗೆ ಪರ್ಯಾಯವಾಗಿ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸಿದರೆ ಮಾತ್ರ ಬ್ಯಾಂಕ್ ಸ್ಥಾಪನೆ ಉದ್ದೇಶ ಈಡೇರಲಿದೆ.
ಸಾರಿಗೆ, ಅಣೆಕಟ್ಟು, ಬಂದರು ಮತ್ತಿತರ ಮೂಲ ಸೌಕರ್ಯಗಳ ನಿರ್ಮಾಣಕ್ಕೆ ಬಲಿಷ್ಠ ದೇಶಗಳ ಹಂಗಿಲ್ಲದೇ ಹಣಕಾಸು ನೆರವು ಪಡೆಯುವುದು ಈಗ ಏಷ್ಯಾದ ದೇಶಗಳಿಗೆ ಹೆಚ್ಚು ಸುಲಭವಾಗಲಿದೆ. ಈ ಅವಕಾಶವನ್ನು ಸದಸ್ಯ ದೇಶಗಳು ಸದ್ಬಳಕೆ ಮಾಡಿಕೊಂಡರೆ ಅಭಿವೃದ್ಧಿಯ ವೇಗ ತೀವ್ರಗೊಂಡೀತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.