ನವದೆಹಲಿ (ಪಿಟಿಐ): ದೇಶವನ್ನು ವಿಶ್ವಮಟ್ಟದಲ್ಲಿ ತಯಾರಿಕಾ ತಾಣವನ್ನಾಗಿಸುವ ಮಹತ್ವಾಕಾಂಕ್ಷೆಯ ‘ಭಾರತದಲ್ಲಿ ಸೃಷ್ಟಿಸಿ’ (ಮೇಕ್ ಇನ್ ಇಂಡಿಯಾ) ಅಭಿಯಾನಕ್ಕೆ ಗುರುವಾರ ವಿಜ್ಞಾನ ಭವನದಲ್ಲಿ ಅದ್ಧೂರಿಯಾಗಿ ಚಾಲನೆ ನೀಡಿದ ಪ್ರಧಾನಿ ನರೇಂದ್ರ ಮೋದಿ, ‘ಪರಿಣಾಮಕಾರಿ ಆಡಳಿತದ ಮೂಲಕ ವಾಣಿಜ್ಯ ವ್ಯವಹಾರವನ್ನು ಉತ್ತೇಜಿಸಲಾಗುತ್ತದೆ’ ಎಂದು ಉದ್ಯಮಿಗಳಿಗೆ ಅಭಯ ನೀಡಿದರು.
‘ಎಫ್ಡಿಐ’ (ವಿದೇಶಿ ನೇರ ಬಂಡವಾಳ ಹೂಡಿಕೆಗೆ) ಶಬ್ದಕ್ಕೆ ಹೊಸ ಅರ್ಥ ನೀಡಿದ ಪ್ರಧಾನಿ, ‘ಮೊದಲು ಭಾರತವನ್ನು ಅಭಿವೃದ್ಧಿ ಮಾಡಿ. ( ಫಸ್ಟ್ ಡೆವಲಪ್ ಇಂಡಿಯಾ) ದೇಶವನ್ನು ಕೇವಲ ಮಾರುಕಟ್ಟೆಯಾಗಿ ನೋಡದೇ ಒಂದು ಅವಕಾಶ ಎಂದು ಭಾವಿಸಿ’ ಎಂದು ಕರೆ ನೀಡಿದರು.
‘ಉದ್ಯಮ ಹಾಗೂ ಕೈಗಾರಿಕಾ ವಲಯದಲ್ಲಿ ಕಳೆದ ೨೩ ವರ್ಷಗಳಿಂದ ಕಾಣುತ್ತಿದ್ದ ಆತಂಕದ ವಾತಾವರಣ ಮರೆಯಾಗಿದೆ. ಭಾರತೀಯ ಕಂಪೆನಿಗಳು ವಿದೇಶಕ್ಕೆ ಪಲಾಯನ ಮಾಡುವ ಅನಿವಾರ್ಯತೆ ಇಲ್ಲ’ ಎಂದು ಪ್ರಧಾನಿ ಮನದಟ್ಟು ಮಾಡಿಕೊಟ್ಟರು.