ಲಖನೌ: ಸೋದರ ಸಂಬಂಧಿಗಳಾದ ದಲಿತ ಬಾಲಕಿಯರ ಮೇಲೆ ನಡೆದ ಸಾಮೂಹಿಕ ಅತ್ಯಾಚಾರ ಮತ್ತು ಬರ್ಬರ ಕೊಲೆ ಪ್ರಕರಣದಿಂದ ದಿಗಿಲುಗೊಂಡಿರುವ ಬದಾಯೂಂ ಜಿಲ್ಲೆಯ ಕಟರಾ ಸಾದತ್‌ಗಂಜ್‌ ಗ್ರಾಮದ ಬಹುತೇಕ ಮಹಿಳೆಯರು ಗುಳೆ ಹೋಗುತ್ತಿದ್ದಾರೆ.
ಈ ಮಧ್ಯೆ, ಬೆದರಿಕೆಯ ಹಿನ್ನೆಲೆಯಲ್ಲಿ ಬಾಲಕಿಯರ ಕುಟುಂಬದವರೂ ಗ್ರಾಮ ತೊರೆಯಲು ಮುಂದಾಗಿದ್ದಾರೆ ಎನ್ನಲಾಗಿದೆ. ಈ ಕುಟುಂಬದವರಿಗೆ ಭದ್ರತೆಯ ಒದಗಿಸುವ ಭರವಸೆ ನೀಡಿರುವ ರಾಜ್ಯ ಸರ್ಕಾರ, ಅವರ ಮನೆಗಳ ಸುತ್ತ ಸಶಸ್ತ್ರ ಪೊಲೀಸರ ಪಹರೆಯನ್ನು ನಿಯೋಜಿಸಿದೆ.
ಆದರೂ ಬೆದರಿಕೆ ನಿಂತಿಲ್ಲದ ಕಾರಣ ಈ ಕುಟುಂಬದವರು ಊರು ತೊರೆಯಲು ಚಿಂತಿಸಿದ್ದಾರೆ. ಜಿಲ್ಲಾಡಳಿತ ಬಾಲಕಿಯರ ಕುಟುಂಬದವರ ಮನವೊಲಿಸುವ ಪ್ರಯತ್ನ ಮುಂದುವರಿಸಿದೆ ಎಂದು ತಿಳಿದುಬಂದಿದೆ.
ಬೇರೆ ಊರುಗಳಿಗೆ ಮದುವೆಯಾಗಿ ಹೋಗಿರುವ ಮಹಿಳೆಯರು ತಮ್ಮ ಮಕ್ಕಳೊಂದಿಗೆ ಬೇಸಿಗೆ ರಜೆಗೆಂದು ತವರಿಗೆ ಬಂದಿದ್ದರು. ಆದರೆ, ಈ ಘಟನೆಯ ನಂತರ ದಿಗಿಲುಗೊಂಡಿರುವ ಅವರು ಕೂಡಲೇ ಗಂಡನ ಮನೆಗೆ ವಾಪಸು ಹೋಗಿದ್ದಾರೆ.
