ವಾಷಿಂಗ್ಟನ್‌ (ಎಎಫ್‌ಪಿ): ಮಂಗಳಗ್ರಹದ ವಾತಾವರಣದ ಬದಲಾವಣೆ ಕುರಿತು ಅಧ್ಯಯನ ಮಾಡಲು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಕಳುಹಿಸಿರುವ ‘ಮಾವೆನ್’ ನೌಕೆ ಸೋಮವಾರ ಮಂಗಳಗ್ರಹವನ್ನು ಸುತ್ತುಹಾಕಲು ಆರಂಭಿಸಿದೆ.
10 ತಿಂಗಳಲ್ಲಿ 71.1 ಕೋಟಿ ಕಿ.ಮೀ. ಕ್ರಮಿಸಿ ಈ ನೌಕೆ ಮಂಗಳ ಕಕ್ಷೆ ಸೇರಿದೆ. ಶತಕೋಟಿ ವರ್ಷಗಳ ಹಿಂದೆ ಮಂಗಳ ಗ್ರಹದಲ್ಲಿದ್ದ ನೀರು ಮತ್ತು ಇಂಗಾಲದ ಡೈ ಆಕ್ಸೈಡ್‌ ಏನಾಯಿತು ಎಂಬ ಕುರಿತು ಈ ನೌಕೆ ಅಧ್ಯಯನ ನಡೆಸಲಿದೆ. ಮಂಗಳ ಗ್ರಹದಲ್ಲಿ ಜೀವಿಗಳ ವಾಸಕ್ಕೆ ಅನುಕೂಲಕರವಾಗಿದ್ದ ವಾತಾವರಣ ಹೇಗೆ ನಶಿಸಿತು ಎಂಬುದು ಈಗಲೂ ನಿಗೂಢವಾದ ವಿದ್ಯಮಾನ. ‘ಮಾವೆನ್’ ಈ ಅಂಶಗಳ ಮೇಲೆ ಬೆಳಕು ಚೆಲ್ಲುವ ಸಾಧ್ಯತೆಯಿದೆ.
‘ಮಾವೆನ್’ ಯಶಸ್ಸಿನಿಂದ ಬೀಗುತ್ತಿರುವ ನಾಸಾ ವಿಜ್ಞಾನಿಗಳು ಇಸ್ರೊ ವಿಜ್ಞಾನಿಗಳಿಗೆ ಶುಭ ಹಾರೈಸಿದ್ದಾರೆ.
