ಕೋಲ್ಕತ್ತ (ಪಿಟಿಐ): ಪಾಠ ಹೇಳಲು ಮನೆಗೆ ಬರುತ್ತಿದ್ದ ಮಧ್ಯ ವಯಸ್ಕ ಮಹಿಳೆ ಮೂರು ವರ್ಷದ ಮಗುವಿಗೆ ನಿರ್ದಯವಾಗಿ ಥಳಿಸಿದ ಘಟನೆ ವರದಿಯಾಗಿದೆ. ನಾಪತ್ತೆಯಾಗಿರುವ ಈ ಮಹಿಳೆಗಾಗಿ ಪೊಲೀಸರು ಶೋಧ ನಡೆಸುತ್ತಿದ್ದಾರೆ. ಇಲ್ಲಿಯ ಲೇಕ್‌ ಟೌನ್‌ ಹೋಮ್‌ನಲ್ಲಿರುವ ಮನೆಯೊಂದರಲ್ಲಿ ನಡೆದ ಈ ಘಟನೆ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ತಾಯಿ ಮನೆಯಲ್ಲಿದ್ದ ಸಂದರ್ಭದಲ್ಲೇ ಈ ಘಟನೆ ನಡೆದಿದೆ.
‘ಘಟನೆಯ ಕುರಿತು ದೂರು ಸ್ವೀಕರಿಸಲಾಗಿದೆ. ಮಗುವಿಗೆ ಥಳಿಸಿದ ಮಹಿಳೆಗಾಗಿ ಶೋಧ ನಡೆಸುತ್ತಿದ್ದೇವೆ’ ಎಂದು ಪೊಲೀಸರು ಹೇಳಿದ್ದಾರೆ. ಈ ಮಹಿಳೆಯನ್ನು ಪೂಜಾ ಸಿಂಗ್ ಎಂದು ಗುರುತಿಸಲಾಗಿದೆ. ಮಗುವನ್ನು ಕೋಣೆಯೊಂದಕ್ಕೆ ಕರೆದುಕೊಂಡು ಹೋಗಿ ಬಾಗಿಲು ಹಾಕಿಕೊಂಡು ಥಳಿಸಿದ್ದಾಳೆ.
ಮಗು ಚೀರುವುದನ್ನು ಕೇಳಿದ ತಾಯಿ ಕೋಣೆಗೆ ಬಂದು ಸಿಸಿಟಿವಿ ಕ್ಯಾಮೆರಾ ನೋಡಿದಾಗ ಮಗುವನ್ನು ಹಿಗ್ಗಾಮುಗ್ಗಾ ಹೊಡೆದಿರುವುದು ಗೊತ್ತಾಗಿದೆ. ‘ಐದು ದಿನಗಳ ಹಿಂದಷ್ಟೇ ಮಹಿಳೆಯನ್ನು ಮನೆ ಪಾಠಕ್ಕೆ ನೇಮಿಸಿಕೊಳ್ಳಲಾಗಿತ್ತು’ ಎಂದು ಮಗುವಿನ ಪಾಲಕರು ಹೇಳಿದ್ದಾರೆ.
ಈ ಕುರಿತು ಮಗುವಿನ ಪಾಲಕರು ಮಹಿಳೆಯನ್ನು ಕೇಳಿದಾಗ ‘ಘಟನೆಯ ಕುರಿತು ಕ್ಷಮೆ ಕೇಳಿ, ಪೊಲೀಸರಿಗೆ ದೂರು ನೀಡದಂತೆ ಮನವಿ ಮಾಡಿಕೊಂಡಿದ್ದಾಳೆ’. ಆದರೆ ಈ ಮಹಿಳೆಯ ಪತಿ ಬೆದರಿಕೆ ಒಡ್ಡಿದ್ದರಿಂದ ಮಗುವಿನ ಪಾಲಕರು ಪೊಲೀಸರಿಗೆ ದೂರು ನೀಡಿದ್ದಾರೆ.
