ಐದು ವರ್ಷಗಳ ದೀರ್ಘ ಅವಧಿಯ ನಂತರ ನಟಿ ಐಶ್ವರ್ಯಾ ರೈ ಬಚ್ಚನ್, ಸಂಜಯ್ ಗುಪ್ತಾ ಅವರ ‘ಜಸ್ಬಾ’ ಚಿತ್ರದ ಮೂಲಕ ಮತ್ತೆ ಬೆಳ್ಳಿ ಪರದೆ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ. ಈ ಅವಧಿಯಲ್ಲಿ ಚಿತ್ರರಂಗದಿಂದ ದೂರ ಉಳಿದಿದ್ದೇನೆ ಎಂಬ ಭಾವನೆ ತಮ್ಮಲ್ಲಿ ಎಂದೂ ಆವರಿಸಿರಲಿಲ್ಲ ಎಂದು ಐಶ್ವರ್ಯಾ ರೈ ಬಚ್ಚನ್ ತಿಳಿಸಿದ್ದಾರೆ.
41ರ ವಯಸ್ಸಿನ ಐಶ್‌ 2010ರಲ್ಲಿ ತೆರೆ ಕಂಡ ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ ‘ಗುಜಾರಿಶ್’ ಚಿತ್ರದಲ್ಲಿ ಕೊನೆಯ ಬಾರಿಗೆ ನಟಿಸಿದ್ದರು. ‘ಮತ್ತೆ ಕ್ಯಾಮೆರಾ ಮುಂದೆ ಕಾಣಿಸಿಕೊಳ್ಳುತ್ತಿರುವುದಕ್ಕೆ ಸಂತೋಷವಾಗುತ್ತಿದೆ.
ಬಿಡುಗಡೆಗಾಗಿ ಎದುರು ನೋಡುತ್ತಿರುವ ‘ಜಸ್ಬಾ’ ಚಿತ್ರದಲ್ಲಿ ಶಬಾನಾ ಅಜ್ಮಿ, ಇರ್ಫಾನ್‌, ಚಂದನ್‌ ರಾಯ್‌ ಸನ್ಯಾಲ್‌ ಮತ್ತು ಜಾಕಿ ಶ್ರಾಫ್‌ ಅವರೊಂದಿಗೆ ನಟಿಸಿದ್ದೇನೆ. ಈ ನಟರೊಂದಿಗೆ ನಟಿಸಿರುವುದು ಖುಷಿ ನೀಡಿದೆ’ ಎಂದು ಐಶ್ವರ್ಯಾ ತಿಳಿಸಿದ್ದಾರೆ. 2007ರಲ್ಲಿ ತೆರೆಕಂಡ ದಕ್ಷಿಣ ಕೊರಿಯಾದ ಚಿತ್ರ ‘7 ಡೇಸ್’ನ ರಿಮೇಕ್ ಆಗಿರುವ ‘ಜಸ್ಬಾ’ ಚಿತ್ರ ಅಕ್ಟೋಬರ್ 9ರಂದು ಬಿಡುಗಡೆ ಆಗಲಿದೆ.
