ನವದೆಹಲಿ (ಪಿಟಿಐ): ದೇಶದ ನಾಗರಿಕ ವಿಮಾನಯಾನ ಕ್ಷೇತ್ರದಲ್ಲಿ ಮತ್ತೊಂದು ಸುತ್ತಿನ ದರ ಸಮರ ಆರಂಭಗೊಂಡಿದೆ. ಅತಿ ಕಡಿಮೆ ದರದಲ್ಲಿ ದೇಶದ ವಿವಿಧೆಡೆಗೆ ವಿಮಾನದಲ್ಲಿ ಸಂಚರಿಸುವ ಅವಕಾಶ ಪ್ರಯಾಣಿಕರಿಗೆ ಮತ್ತೆ ದೊರಕಿದಂತಾಗಿದೆ.
ಏರ್ ಇಂಡಿಯಾ, ಇಂಡಿಗೊ ಮತ್ತು ಗೋಏರ್ ಕಂಪೆನಿಗಳು ಗುರುವಾರ ಕಡಿಮೆ ದರದ ವಿಮಾನಯಾನ ಕೊಡುಗೆ ಪ್ರಕಟಿಸಿವೆ. ಈ ಮೂಲಕ ಸ್ಪೈಸ್ಜೆಟ್ ಮಂಗಳವಾರ ಆರಂಭಿಸಿದ ‘ದರ ಸಮರ’ಕ್ಕೆ ತಮ್ಮ ಪಾಲನ್ನೂ ನೀಡಿವೆ.
ಏರ್ ಇಂಡಿಯಾ ‘ಅಲ್ಪಾವಧಿ’ಯ ಮುಂಗಾರು ಕೊಡುಗೆ ಘೋಷಿಸಿದೆ. ದೇಶದೊಳಗಿನ 40 ಮಾರ್ಗಗಳಲ್ಲಿನ 108 ವಿಮಾನಗಳಲ್ಲಿ ₨1,599 ದರದಲ್ಲಿ (ತೆರಿಗೆ ಪ್ರತ್ಯೇಕ) ಪ್ರಯಾಣಿಸಬಹುದಾಗಿದೆ. ಸೆ.30ರ ನಂತರವಷ್ಟೇ ಪ್ರಯಾಣಕ್ಕೆ ಅವಕಾಶವಿದೆ. ಈ ಮುಂಗಾರು ಕೊಡುಗೆಯ ಟಿಕೆಟ್ ಖರೀದಿಗೆ ಕೇವಲ ಮೂರು ದಿನಗಳ ಕಾಲಾವಕಾಶವನ್ನಷ್ಟೇ ನೀಡಲಾಗಿದೆ. ಏ. 3ರಿಂದಲೇ ಬುಕಿಂಗ್ ಆರಂಭಗೊಂಡಿದ್ದು, ಏ 5ರವರೆಗಷ್ಟೇ ಟಿಕೆಟ್ ಖರೀದಿಗೆ ಅವಕಾಶವಿದೆ ಎಂದು ಕಂಪೆನಿ ಪ್ರಕಟಣೆಯಲ್ಲಿ ತಿಳಿಸಿದೆ.
ಇಂಡಿಗೊ ಟಿಕೆಟ್ ದರವನ್ನು ₨ 1,389ಕ್ಕೆ ತಗ್ಗಿಸಿದೆ. ಸಂಸ್ಥೆಯ ನೇರ ವಿಮಾನ ಹಾರಾಟ ಮಾರ್ಗಗಳಲ್ಲಿ ಹಾಗೂ ಮಿತಸಂಖ್ಯೆಯ ಆಸನಗಳಿಗಷ್ಟೇ ಈ ಕೊಡುಗೆ ಲಭ್ಯ ಎಂದು ತಿಳಿಸಿದೆ. ಆದರೆ, ಟಿಕೆಟ್ ಖರೀದಿಗೆ ಇರುವ ಕಾಲಾವಧಿ ಕುರಿತು ಯಾವುದೇ ಮಾಹಿತಿ ನೀಡಿಲ್ಲ.
ಇಂಡಿಗೊ ವಿಮಾನದಲ್ಲಿ ದೆಹಲಿ ಮತ್ತು ಲಖನೌ ಮಾರ್ಗದಲ್ಲಿ ಏಕಮುಖ ಸಂಚಾರಕ್ಕಷ್ಟೇ ₨ 1,389ರ ರಿಯಾಯ್ತಿ ಟಿಕೆಟ್ ಲಭ್ಯ. ದೆಹಲಿ, ಮುಂಬೈ ನಡುವಣ ಪ್ರಯಾಣಕ್ಕೆ ₨ 2,400 ನೀಡಬೇಕಿದೆ ಎಂದು ಟ್ರಾವೆಲ್ ಏಜೆಂಟರೊಬ್ಬರು ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
ಗೋಏರ್ ಸಂಸ್ಥೆ ಟಿಕೆಟ್ ದರದಲ್ಲಿ ಶೇ 30ರಿಂದ 40ರವರೆಗೆ ರಿಯಾಯ್ತಿ ಘೋಷಿಸಿದೆ. ಆದರೆ, ಟಿಕೆಟ್ ಖರೀದಿ ಅವಕಾಶ ಶುಕ್ರವಾರಕ್ಕೇ ಕೊನೆಗೊಳ್ಳ-ಲಿದೆ. ಜುಲೈ, ಸೆಪ್ಟೆಂಬರ್ ವೇಳೆ ಪ್ರಯಾಣಕ್ಕೆ (90 ದಿನ ಮುಂಚೆಯೇ ಕಾಯ್ದಿರಿಸುವುದು) ರಿಯಾಯ್ತಿ ಅನ್ವಯವಾಗಲಿದೆ ಎಂದು ಕಂಪೆನಿ ತಿಳಿಸಿದೆ.
ಸ್ಪೈಸ್ಜೆಟ್ ಟಿಕೆಟ್ಗೆ ₨ 1: ಇದಕ್ಕೂ ಮುನ್ನ ಸ್ಪೈಸ್ ಜೆಟ್ ಕಂಪೆನಿ, ₨1ಕ್ಕೆ ವಿಮಾನ ಪ್ರಯಾಣ ಕೊಡುಗೆ ಘೋಷಿಸಿ ದರ ಸಮರದ ಆಹ್ವಾನ ನೀಡಿತ್ತು.
ದೇಶಿಯ ವಿಮಾನ ಮಾರ್ಗಗಳಲ್ಲಿ ಕೇವಲ ₨1ಕ್ಕೆ ವಿಮಾನ ಪ್ರಯಾಣ ಮಾಡಬಹುದು ಎಂದು ಕಂಪೆನಿ ಮಂಗಳವಾರ ಘೋಷಿಸಿದ ಬೆನ್ನಲ್ಲೇ ಸಾವಿರಾರು ಪ್ರಯಾಣಿಕರು ಆನ್ಲೈನ್ನಲ್ಲಿ ಟಿಕೆಟ್ ಖರೀದಿಗೆ ಮುಗಿಬಿದ್ದಿದ್ದರಿಂದ ಸ್ಪೈಸ್ಜೆಟ್ ವೆಬ್ಸೈಟ್ ಒತ್ತಡಕ್ಕೆ ಸಿಲುಕಿ ಅದರ ಕಾರ್ಯಚಟುವಟಿಕೆಯೇ ಕೆಲಸಮಯದವರೆಗೆ ಸ್ಥಗಿತಗೊಂಡಿತ್ತು.
ಸ್ಪೈಸ್ಜೆಟ್ನ ಬಲು ಅಗ್ಗದ ಪ್ರಯಾಣದರ ಕೊಡುಗೆಗೆ ‘ನಾಗರಿಕ ವಿಮಾನಯಾನ ಮಹಾ ನಿರ್ದೇಶನಾಲಯ’ (ಡಿಜಿಸಿಎ) ವಿರೋಧ ವ್ಯಕ್ತಪಡಿಸಿತ್ತು. ಕೆಲವು ವರ್ಷಗಳ ಹಿಂದೆ ₨1ಕ್ಕೆ ಟಿಕೆಟ್ ನೀಡುವ ಕೊಡುಗೆಯನ್ನು ಮೊದಲ ಬಾರಿಗೆ ಏರ್ ಡೆಕ್ಕನ್ ಆರಂಭಿಸಿತ್ತು. ಇದೀಗ ಸ್ಪೈಸ್ಜೆಟ್ ಇದೇ ಮಾದರಿ ಕೊಡುಗೆ ಪ್ರಕಟಿಸಿ ದರ ಸಮರ ಆರಂಭಿಸಿದೆ. ಇತರೆ ಕಂಪೆನಿಗಳೂ ತನ್ನನ್ನು ಅನುಸರಿಸುವಂತೆ ಮಾಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.