ನವದೆಹಲಿ (ಪಿಟಿಐ): ಪ್ರಸಕ್ತ ಲೋಕಸಭಾ ಚುನಾವಣೆಯಲ್ಲಿ ಶೇಕಡಾವಾರು ಮತ ಗಳಿಕೆಯಲ್ಲಿ ಬಹುಜನ ಸಮಾಜ ಪಕ್ಷವು ಮೂರನೇ ಸ್ಥಾನದಲ್ಲಿದ್ದರೂ ಗೆಲುವಿನಲ್ಲಿ ಮಾತ್ರ ‘ಸೊನ್ನೆ ಸುತ್ತಿದೆ’.
ಬಿಜೆಪಿ ಮತ್ತು ಕಾಂಗ್ರೆಸ್ ನಂತರ ಬಿಎಸ್ಪಿಯು ಶೇ 4ರಷ್ಟು ಮತ ಪಡೆದು ಶೇಕಡಾವಾರು ಮತಗಳಿಕೆಯಲ್ಲಿ ಮೂರನೇ ಸ್ಥಾನದಲ್ಲಿದೆ.
ಉತ್ತರ ಪ್ರದೇಶವೊಂದನ್ನೇ ಗಣನೆಗೆ ತೆಗೆದುಕೊಂಡರೆ ಬಿಎಸ್ಪಿ ಶೇ 20-ರಷ್ಟು ಮತ ಗಳಿಸಿದೆ. ಅಲ್ಲಿ ಆ ಪಕ್ಷದ 34 ಅಭ್ಯರ್ಥಿಗಳು ಎರಡನೇ ಸ್ಥಾನ ಪಡೆದಿದ್ದಾರೆ. ಆ ಪಕ್ಷ ಒಟ್ಟು 2.3 ಕೋಟಿ ಮತಗಳನ್ನು ಪಡೆದಿದೆ. ಆದರೆ, ಒಂದು ಸ್ಥಾನವನ್ನೂ ಗೆಲ್ಲಲು ಸಾಧ್ಯವಾಗಿಲ್ಲ.
ಸಮಾಜವಾದಿ ಪಕ್ಷ ಕೂಡ ಶೇ 3.4ರಷ್ಟು ಮತಗಳನ್ನು ಪಡೆದಿದ್ದರೂ ಐದು ಸ್ಥಾನಗಳಲ್ಲಿ ಮಾತ್ರ ಜಯ ಕಂಡಿದೆ.
ಆದರೆ, ಮಮತಾ ಬ್ಯಾನರ್ಜಿ ಅವರ ತೃಣಮೂಲ ಕಾಂಗ್ರೆಸ್ ಶೇ 3.8ರಷ್ಟು ಮತ ಗಳಿಕೆಯೊಂದಿಗೆ 34 ಸ್ಥಾನಗಳನ್ನು ಪಡೆದಿದೆ. ಎಐಎಡಿಎಂಕೆ ಮತ ಗಳಿಕೆ ಶೇ 3.3ರಷ್ಟಿದ್ದು 37 ಸ್ಥಾನಗಳನ್ನು ಪಡೆದಿದೆ. ಆದರೆ ಸಿಪಿಎಂ ಇಷ್ಟೇ ಪ್ರಮಾಣದ (ಶೇ 3.3) ಮತ ಪಡೆದಿದ್ದರೂ ಕೇವಲ ಒಂಬತ್ತು ಕಡೆ ವಿಜಯ ದಾಖಲಿಸಿದೆ.
ಡಿಎಂಕೆ ಶೇ 1.7ರಷ್ಟು ಮತಗಳನ್ನು ಪಡೆದಿದ್ದರೂ ಒಂದು ಸ್ಥಾನ ಗೆಲ್ಲಲು ಆಗಿಲ್ಲ.