ಇಸ್ಲಾಮಾಬಾದ್ (ಪಿಟಿಐ): ‘ಪಾಕಿಸ್ತಾನ್ ಇನ್‌ಸ್ಟಿಟ್ಯೂಟ್ ಆಫ್ ಡೆವಲಪ್‌ಮೆಂಟ್ ಎಕನಾಮಿಕ್ಸ್’ ಎಂಬ ಪಾಕಿಸ್ತಾನದ ಮುಂಚೂಣಿಯ ಅರ್ಥಶಾಸ್ತ್ರ ಅಧ್ಯಯನ ಸಂಸ್ಥೆಯೊಂದು ತನ್ನ ವಾರ್ಷಿಕ ಘಟಿಕೋತ್ಸವದ ಆಹ್ವಾನ ಪತ್ರಿಕೆಯಲ್ಲಿ ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ಅವರನ್ನು ಪಾಕಿಸ್ತಾನದ ಅಧ್ಯಕ್ಷ ಎಂದು ಮುದ್ರಿಸಿದೆ.
ಇದೇ 28ರಂದು ನಡೆಯಲಿರುವ ಸಂಸ್ಥೆಯ ಘಟಿಕೋತ್ಸವದ ಆಹ್ವಾನ ಪತ್ರಿಕೆಯಲ್ಲಿ, ‘ಪ್ರೆಸಿಡೆಂಟ್ ಆಫ್ ಇಸ್ಲಾಮಿಕ್ ರಿಪಬ್ಲಿಕ್ ಆಫ್ ಪಾಕಿಸ್ತಾನ್, ಮನಮೋಹನ್ ಸಿಂಗ್’ ಎಂದು ತಪ್ಪಾಗಿ ಮುದ್ರಿಸಿದೆ ಎನ್ನಲಾಗಿದೆ. ಸಿಂಗ್ ಅವರ ಹೆಸರಿನ ಬದಲು ಪಾಕ್ ಅಧ್ಯಕ್ಷ ಮಮ್ನೂನ್ ಹುಸೇನ್ ಹೆಸರು ಇರಬೇಕಿತ್ತು. ಇದು ಪತ್ತೆಯಾಗುವ ಮುನ್ನವೇ ಸಾಕಷ್ಟು ಜನರಿಗೆ ಆಹ್ವಾನ ಪತ್ರಿಕೆ ಹಂಚಲಾಗಿತ್ತು.
