ಮನೆಯಲ್ಲೇ ಉಳಿಯಲಿದೆ ಮಿಶ್ರತ್ಯಾಜ್ಯ!

ಬೆಂಗಳೂರು: ಮನೆಯಲ್ಲಿ ಮಿಶ್ರತ್ಯಾಜ್ಯ ಶೇಖರಣೆ ಮಾಡಿಟ್ಟಿರುವಿರಾ? ಹಾಗಾದರೆ ಆ ತ್ಯಾಜ್ಯ ಮನೆಯಲ್ಲೇ ಉಳಿಯಲಿದೆ. ಬೇರ್ಪಡಿಸಿಕೊಟ್ಟರೆ ಮಾತ್ರ ಪೌರಕಾರ್ಮಿಕರು ಅದನ್ನು ಸಂಗ್ರಹಿಸಿಕೊಂಡು ಹೋಗಲಿದ್ದಾರೆ.

ಮೂಲದಲ್ಲೇ ಕಸ ಬೇರ್ಪಡಿಸಿ ಕೊಡುವುದನ್ನು ಈಗ ಕಡ್ಡಾಯಗೊಳಿಸಲಾಗಿದ್ದು, ಇನ್ನುಮುಂದೆ ಮನೆಗಳಿಂದ ಮಿಶ್ರತ್ಯಾಜ್ಯ ಕೊಟ್ಟರೆ ಅದನ್ನು ಪಡೆಯದಂತೆ ಪೌರಕಾರ್ಮಿಕರಿಗೆ ಸೂಚನೆ ನೀಡಲಾಗಿದೆ.

ವಿಶೇಷ ಆಯುಕ್ತ (ಘನತ್ಯಾಜ್ಯ ನಿರ್ವಹಣೆ) ಸುಬೋಧ್‌ ಯಾದವ್‌ ಈ ಸಂಬಂಧ ಬುಧವಾರ ಎಲ್ಲ
ವಲಯಗಳ ಅಧಿಕಾರಿಗಳು ಹಾಗೂ ಗುತ್ತಿಗೆದಾರರ ಸಭೆ ನಡೆಸಿದರು. ‘ಕಸ ಬೇರ್ಪಡಿಸಿ ಕೊಡುವುದನ್ನು ಈ ಹಿಂದೆಯೇ ಕಡ್ಡಾಯ ಮಾಡಬೇಕಿತ್ತು. ಆಗ ಬೇರ್ಪಡಿಸಿ ತಂದ ತ್ಯಾಜ್ಯದ ಸಂಸ್ಕರಣೆಗೆ ಯಾವುದೇ ವ್ಯವಸ್ಥೆ ಇರಲಿಲ್ಲ. ಈಗ ಅದಕ್ಕೆ ಅಗತ್ಯವಾದ ಮೂಲಸೌಕರ್ಯ ಸೃಷ್ಟಿಸಲಾಗಿದೆ’ ಎಂದು ಯಾದವ್‌ ತಿಳಿಸಿದರು.

‘ಪ್ರತಿದಿನ 2,350 ಟನ್‌ ಹಸಿ ತ್ಯಾಜ್ಯ ಸಂಸ್ಕರಣೆಗೆ ವ್ಯವಸ್ಥೆಯಾಗಿದೆ. 189 ವಾರ್ಡ್‌ಗಳಲ್ಲಿ ಒಣತ್ಯಾಜ್ಯ ಸಂಗ್ರಹಣಾ ಕೇಂದ್ರ ತೆರೆಯಲಾಗಿದೆ. ಇನ್ನುಮುಂದೆ ಯಾವುದೇ ನೆಪ ಹೇಳದೆ ಪ್ರತ್ಯೇಕಿಸಿದ ಕಸವನ್ನಷ್ಟೇ ಸಂಗ್ರಹಿಸಬೇಕು’ ಎಂದು ಸೂಚನೆ ನೀಡಿದರು.

‘ಪೌರ ಘನತ್ಯಾಜ್ಯ (ವ್ಯವಸ್ಥಾಪನೆ ಮತ್ತು ನಿರ್ವಹಣೆ) ನಿಯಮ 2000’ ಪ್ರಕಾರ ಘನತ್ಯಾಜ್ಯವನ್ನು ಮೂಲದಲ್ಲೇ ಬೇರ್ಪಡಿಸುವುದು ಕಡ್ಡಾಯವಾಗಿದೆ. ನಗರದಲ್ಲಿ ಪ್ರತಿದಿನ ನಾಲ್ಕು ಸಾವಿರ ಟನ್‌ ಕಸ ಉತ್ಪಾದನೆ ಆಗುತ್ತದೆ. ಅದನ್ನು ಮಿಶ್ರಗೊಳಿಸಿ ತಂದರೆ ವೈಜ್ಞಾನಿಕವಾಗಿ ವಿಲೇವಾರಿ ಮಾಡುವುದು ಅಸಾಧ್ಯವಾಗಿದೆ. ಇದುವರೆಗಿನ ಭೂಭರ್ತಿ ಘಟಕಗಳ ಸಮಸ್ಯೆಗೆ ಮಿಶ್ರಕಸವೇ ಕಾರಣವಾಗಿದೆ’ ಎಂದು ವಿವರಿಸಿದರು.

‘ಮಿಶ್ರ ಕಸ ತಂದಿದ್ದರಿಂದ ಟೆರ್ರಾ ಫರ್ಮಾ, ಎಂಎಸ್‌ಜಿಪಿ ಸೇರಿದಂತೆ ವಿವಿಧ ಘಟಕಗಳಲ್ಲಿ ಸಮಸ್ಯೆಯಾಗಿದೆ. ಹೀಗಾಗಿ ಕಸ ವಿಲೇವಾರಿ ಮಾಡಲು ಸಾಧ್ಯವಾಗದೆ ಎಲ್ಲೆಂದರಲ್ಲಿ ಸುರಿಯಲಾಗಿದೆ. ಗುತ್ತಿಗೆದಾರರು ಹಾಗೂ ಅಧಿಕಾರಿಗಳಿಗೆ ಈ ಹಿಂದೆ ಹಲವು ಬಾರಿ ಸೂಚನೆ ನೀಡಿದ್ದರೂ ತ್ಯಾಜ್ಯ ವಿಂಗಡಣೆ ಮಾಡಿಲ್ಲ. ಈ ಕುರಿತು ಸಾರ್ವಜನಿಕರಲ್ಲಿ ಅರಿವನ್ನೂ ಮೂಡಿಸಿಲ್ಲ’ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

‘ತ್ಯಾಜ್ಯ ವಿಲೇವಾರಿ ವಿಕೇಂದ್ರೀಕರಣಕ್ಕೆ ಒತ್ತು ನೀಡಲಾಗಿದ್ದು, ಗುತ್ತಿಗೆದಾರರಿಂದ ಸಹಕಾರ ಅಗತ್ಯವಾಗಿದೆ’ ಎಂದು ಅವರು ತಿಳಿಸಿದರು. ಈ ಮಧ್ಯೆ ರಾಜರಾಜೇಶ್ವರಿನಗರ ವಲಯ ಸೇರಿದಂತೆ ಹಲವೆಡೆ ಕಸ ವಿಂಗಡಣೆ ಮಹತ್ವ ಸಾರಲು ಕರಪತ್ರ ಹಂಚಲಾಗುತ್ತಿದೆ. ಆ ಮೂಲಕ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವ ಕಾರ್ಯವನ್ನು ಆರಂಭಿಸಲಾಗಿದೆ.