ಮನೆಯೊಳಗೆ ಮುದ್ದು ಪ್ರಾಣಿಗೊಂದು ಗೂಡು

ಎಲ್ಲ ಮನೆಗಳಲ್ಲೂ ಸಾಕು ಪ್ರಾಣಿಗಳನ್ನು ಪ್ರೀತಿಸು ವವರೇ ಇರುತ್ತಾರೆ ಎಂದೇನಲ್ಲ. ಪ್ರಾಣಿಗಳೆಂದರೆ ದೂರ ಓಡುವವರು, ಪ್ರಾಣಿಗಳನ್ನು ಮುಟ್ಟಲೂ ಇಷ್ಟಪಡ ದವರೂ ಇರುತ್ತಾರೆ. ನಾಯಿ, ಪಕ್ಷಿಗಳನ್ನು ಸಾಕಿದ್ದರೂ ಅವು ಮನೆಗಳಲ್ಲಿ ಎಲ್ಲ ಕಡೆ ಇರುವುದು, ಸಂಚರಿ ಸುವುದು ಇಷ್ಟ ಇರುವುದಿಲ್ಲ.  ಹೀಗಾಗಿ ಅವುಗಳನ್ನು ಒಂದು ನಿಗದಿತ ವ್ಯಾಪ್ತಿಯಲ್ಲಿಯಷ್ಟೇ ಇರುವಂತೆ ಸೀಮಿತಗೊಳಿಸಲು ಬಯಸುತ್ತಾರೆ. ಅಂತಹವರಿ ಗಾಗಿಯೂ ಸಾಕಷ್ಟು ಆಯ್ಕೆಗಳಿವೆ.

ಚಿಕ್ಕ ನಾಯಿ ಹಾಗೂ ಬೆಕ್ಕುಗಳನ್ನು ಸಾಕುವವರು ಮನೆಯ ಒಳಭಾಗದಲ್ಲಿಯೇ ವ್ಯರ್ಥವಾಗಿರುವ ಅಥವಾ ಹೆಚ್ಚಾಗಿ ಬಳಕೆಗೇ ಬಾರದ ಸ್ಥಳವನ್ನು ಸಾಕು ಪ್ರಾಣಿಗಳ ವಿಶ್ರಾಂತಿಗೆ ಮೀಸಲಿಡಲು ಬಳಸಬಹುದು. ಉದಾಹರಣೆಗೆ ಹಜಾರದಲ್ಲಿ ಹಾಕಿರುವ ತುಸು ಎತ್ತರವಿರುವ ದಿವಾನ್‌ ಅಥವಾ ಮರದ ಉದ್ದದ ಕುರ್ಚಿಗಳ ಕೆಳಭಾಗದಲ್ಲಿಯೇ ಸಾಕು ಪ್ರಾಣಿಗೆ ವಿಶ್ರಾಂತಿ ತಾಣ ಮಾಡಿಕೊಡಬಹುದು. ಮಾರುಕಟ್ಟೆಯಲ್ಲಿ ಪ್ರಾಣಿಗಳಿಗಾಗಿಯೇ ನಿರ್ಮಿಸಿದ ಚಿಕ್ಕ ರೆಡಿಮೇಡ್‌ ಮನೆಗಳು ಸಿಗುತ್ತದೆ. ಅವನ್ನು ತಂದು ಸೋಫಾ, ದಿವಾನ್‌ ಕೆಳಗೆ ಜೋಡಿಸಿಡಬಹುದು.

ಮನೆ ದೊಡ್ಡದಾಗಿದ್ದು, ಖಾಲಿ ಜಾಗವೂ ಸಾಕಷ್ಟು ಇದ್ದಲ್ಲಿ ಕಡಿಮೆ ಬೆಲೆಯ ರಬ್ಬರ್‌ವುಡ್‌ ಅಥವಾ ಮನೆಯಲ್ಲಿಯೇ ವ್ಯರ್ಥವಾಗಿ ಬಿದ್ದಿರುವ ಮರದ ದೊಡ್ಡ ಮರದ ಪೆಟ್ಟಿಗೆಗಳಿಂದಲೇ ಪೊಮೆರಿಯನ್‌, ಪಗ್‌ ಮೊದಲಾದ ಚಿಕ್ಕಗಾತ್ರದ ನಾಯಿ ಹಾಗೂ ಬೆಕ್ಕುಗಳಿಗೆ ಬಾಕ್ಸ್‌ ಮನೆ ತಯಾರಿಸಬಹುದು.

‘ಇದು ನನ್ನ ಮನೆ/ಗೂಡು’
ಪ್ರಾಣಿಗಳ ಮನೆ ಎಂದ ಕೂಡಲೇ ಅದು ನೋಡಲು ಮನೆಯಂತೆಯೇ ಇರಬೇಕೆಂದಿಲ್ಲ. ನಿಮ್ಮ ಮುದ್ದಿನ ಶ್ವಾನ, ಮಾರ್ಜಾಲ ಅಥವಾ ಮೊಲ ‘ಇದು ನನ್ನ ಮನೆ/ಗೂಡು’ ಎಂದು ಸುರಕ್ಷತೆಯ ಭಾವದಲ್ಲಿ ವಿಶ್ರಮಿಸಲು ಅವಕಾಶ ನೀಡುವಂತಿದ್ದರೂ ಸಾಕು.

ತುಸು ಹಣ ವೆಚ್ಚ ಮಾಡಲು ಸಿದ್ಧರಿದ್ದರೆ, ಮರದ ದಪ್ಪ ಪಟ್ಟಿಗಳನ್ನು ಬಳಸಿಯೇ ವಿವಿಧ ವಿನ್ಯಾಸದಲ್ಲಿ ಗೂಡುಗಳನ್ನು ಪ್ರಾಣಿಗಳಿಗೆ ರಚಿಸಿಕೊಡಬಹುದು. ಪುಟ್ಟ ಮಕ್ಕಳಿಗೆ ಅವರ ಕೊಠಡಿಯಲ್ಲಿ ಬಂಕರ್‌ ನಿರ್ಮಿಸಿ ಕೊಡುವಂತೆಯೇ ಸಾಕು ಪ್ರಾಣಿಗಳಿಗೂ ಅದರ ಗೂಡನ್ನು ವಿನ್ಯಾಸ ಮಾಡಿಕೊಡಬಹುದು. ನಾಯಿ, ಬೆಕ್ಕು ಸಂಖ್ಯೆ ಹೆಚ್ಚಿದ್ದರೆ ಆ ಗೂಡಿನಲ್ಲಿಯೇ ಎರಡು ಮೂರು ಅಂತಸ್ತುಗಳನ್ನು ನಿರ್ಮಿಸಿ ಅವು ಹತ್ತಿಳಿಯಲು ಅನುಕೂಲವಾಗುವಂತೆ ಪುಟಾಣಿ ಮೆಟ್ಟಿಲುಗಳನ್ನೂ ಇಡಬಹುದು. ವಿಶ್ರಾಂತಿ ತೆಗೆದುಕೊಳ್ಳಲು ಪುಟಾಣಿ ಹಾಸಿಗೆಯನ್ನೂ ಹಾಕಬಹುದು.

ಇದೇ ಗೂಡು ಮನೆಗಳಲ್ಲಿ ಪ್ರಾಣಿಗಳ ನೀರು ಹಾಗೂ ಆಹಾರದ ಪಾತ್ರೆ ಇಡಲೂ ಸ್ಥಳ ಮೀಡಲಿಡಬಹುದು. ಮನೆಯ ಯಾವುದಾದರೂ ಒಂದು ಕಡೆ ಎರಡು ಅಥವಾ ಮೂರು ಗೋಡೆಗಳು ಒಟ್ಟಾಗಿ ಸೇರಿಕೊಳ್ಳು ವಂತಿದ್ದರೆ ಆ ಜಾಗವನ್ನು ಬಳಸಿಕೊಂಡು ಮನೆ ಕಟ್ಟಬಹುದು.

ಆದರೆ ಮನೆಗಳ ಒಳಭಾಗದಲ್ಲಿ ಯಾವುದೇ ಪ್ರಾಣಿಗಳಿಗೆ ಮನೆ ಕಟ್ಟುವಾಗ ಮುನ್ನೆಚ್ಚರಿಕೆ ವಹಿಸಬೇಕು. ಕಾರಣ ಮನೆಯ ಒಳಗಿರುವ ಜೀವಿ ಸದಾ ಕಣ್ಣೆದುರು ಇರುವಂತೆ ನೋಡಿಕೊಂಡರೆ ಒಳ್ಳಯದು. ಮನೆಗೆ ಯಾರಾದರೂ ಬಂದಲ್ಲಿ ಅವುಗಳಿಗೂ ಕಾಣು ವಂತಿರಬೇಕು.

ಮನೆಗಳ ಹೊರಗೆ ಸ್ಥಳಾವಕಾಶ ಇಲ್ಲದವರು ಮನೆಗಳ ತಾರಸಿಯಲ್ಲಿ ಪ್ರಾಣಿಗಳಿಗೆ ಗೂಡು ನಿರ್ಮಿಸಬಹುದು. ಬೆಕ್ಕು ಹಾಗೂ ನಾಯಿಗಳಿಗೆ ಮನೆಗಳ ಮೇಲೆ ಗೂಡು ಕಟ್ಟಿದರೆ ಅವುಗಳಿಗೆ ಓಡಾಡಲು ತುಂಬಾ ಜಾಗ ಸಿಗುತ್ತದೆ. ಅಲ್ಲದೆ ಅವುಗಳಿಗೆ ಕಾಂಕ್ರೀಟ್‌ ಫ್ಲೋರಿಂಗ್‌ ಇದ್ದರೆ ತುಂಬಾ ಒಳ್ಳೆಯದು.

ಇದರಿಂದ ಸ್ಥಳವನ್ನು ಸ್ವಚ್ಛಗೊಳಿಸಲು ಅನುಕೂಲವಾಗುತ್ತದೆ. ರಬ್ಬರ್‌ ವುಡ್‌, ಪಿವಿಸಿ ಪಾರ್ಟಿಕಲ್‌ ಹಾಗೂ ಎಫ್‌ಆರ್‌ಪಿ ಇತರೆ ವಸ್ತುಗಳನ್ನು ಬಳಸಿ ಗೂಡುಗಳನ್ನು ಕಟ್ಟಬಹುದು. ರಬ್ಬರ್‌ ವುಡ್‌ ಬಳಸಿದರೆ ನಾಯಿಗಳು ಕಚ್ಚಿ ಚೂರು ಮಾಡುವ ಅಪಾಯವೂ ಇರುತ್ತದೆ.    

ನಾಯಿಗೆ ಮನೆ ಅಂಗಳದಲ್ಲಿ ಗೂಡು ನಿರ್ಮಿಸುವುದಾದರೆ ಕೆಲವು ಅಂಶ ಅರಿತಿರಬೇಕು:
*ನಾಯಿ ವಾಸಿಸುವ ಸ್ಥಳದಲ್ಲಿ ಗಾಳಿ, ಬೆಳಕು ಚೆನ್ನಾಗಿ ಬರುವಂತಿರಬೇಕು. 
*ಬಿಸಿಲು, ಮಳೆಯಿಂದ ರಕ್ಷಣೆ ಇರಬೇಕು.
*ಗೇಟ್‌ ಪಕ್ಕದಲ್ಲಿಯೇ ನಾಯಿ ಗೂಡು ನಿರ್ಮಿಸಬಾರದು. ಆದರೆ, ನಾಯಿಗೆ ಗೇಟ್‌ ಹಾಗೂ ರಸ್ತೆಯಲ್ಲಿ ನಡೆಯುವ ಘಟನೆಯ ದೃಶ್ಯಗಳು ಸ್ವಲ್ಪವಾದರೂ ಕಾಣುವಂತೆ ಇರಬೇಕು.
*ನಾಯಿ ಗೂಡು ಚಿಕ್ಕದಾಗಿದ್ದಲ್ಲಿ, ರಾತ್ರಿ ವೇಳೆ ಕೌಂಪೌಂಡ್‌ ಒಳಗೆ ಓಡಾಡಲು ಬಿಡಬೇಕು. ದಿನದ 24 ಗಂಟೆಯೂ ಗೂಡಿನಲ್ಲಿಯೇ ಕೂಡಿ ಹಾಕಿದರೆ ನಾಯಿಗಳ ದೇಹ, ಮನಸ್ಸಿನ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮವಾಗುತ್ತದೆ ಎಂಬುದನ್ನು ನೆನಪಿಡಬೇಕು.
*ಮನೆಯೊಳಗಿನಿಂದಲೂ ಮುದ್ದಿನ ಪ್ರಾಣಿಯನ್ನು ಗಮನಿಸಲು ಅವಕಾಶವಾಗುವ ಎಡೆಯಲ್ಲಿಯೇ  ಪ್ರಾಣಿಗಳ ಗೂಡು ಅಳವಡಿಸಬೇಕು.