ಮುಂಬೈ (ಪಿಟಿಐ): ದೇಶದ ಪ್ರಥಮ ಮುಸ್ಲಿಂ ಉನ್ನತ ಕಾನೂನು ಅಧಿಕಾರಿ ಎನಿಸಿದ ಮಾಜಿ ಅಟಾರ್ನಿ ಜನರಲ್ ಜಿ.ಇ. ವಾಹನ್ವತಿ ಮಂಗಳವಾರ ಇಲ್ಲಿ ಹೃದಯಾಘಾತದಿಂದ ನಿಧನರಾದರು.
ಗೂಲಂ ಎಸ್ಸಾಜಿ ವಾಹನ್ವತಿ (65) ಅವರಿಗೆ ಪತ್ನಿ ಮತ್ತು ಪುತ್ರ ಇದ್ದಾರೆ. ಕೆಲ ಕಾಲದಿಂದ ಶ್ವಾಸಕೋಶ ಸೋಂಕಿನಿಂದ ಬಳಲುತ್ತಿದ್ದ ಅವರು, ನಗರದ ಆಸ್ಪತ್ರೆಯೊಂದರಲ್ಲಿ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದರು.
ಯುಪಿಎ ಸರ್ಕಾರವು 2009ರ ಜೂನ್ನಲ್ಲಿ ಮೂರು ವರ್ಷಗಳ ಅವಧಿಗಾಗಿ ವಾಹನ್ವತಿ ಅವರನ್ನು 13ನೇ ಅಟಾರ್ನಿ ಜನರಲ್ ಆಗಿ ನೇಮಿಸಿದ್ದು, ನಂತರ 2012ರಲ್ಲಿ ಮುಂದಿನ ಎರಡು ವರ್ಷಗಳವರೆಗೆ ಅಧಿಕಾರಾವಧಿ ವಿಸ್ತರಿಸಿತ್ತು. 2014 ಮೇನಲ್ಲಿ ಕೇಂದ್ರದಲ್ಲಿ ಹೊಸ ಬಿಜೆಪಿ ಸರ್ಕಾರ ಅಧಿಕಾರಕ್ಕೆ ಬಂದ ಮೇಲೆ ರಾಜೀನಾಮೆ ಸಲ್ಲಿಸಿದ್ದರು.
ಅಟಾರ್ನಿ ಜನರಲ್ ಆಗುವ ಮುನ್ನ, ವಾಹನ್ವತಿ ಅವರು, 2004ರ ಜೂನ್ 20ರಿಂದ 2009ರ ಜೂನ್ 7ರವರೆಗೆ ಸಾಲಿಸಿಟರ್ ಜನರಲ್ ಆಗಿ ಸೇವೆ ಸಲ್ಲಿಸಿದ್ದರು. ಅದಕ್ಕೂ ಮುಂಚೆ ಅವರು ಮಹಾರಾಷ್ಟ್ರದ ಅಡ್ವೊಕೇಟ್ ಜನರಲ್ ಆಗಿ ಸೇವೆ ಸಲ್ಲಿಸಿದ್ದರು.
1949ರ ಮೇ 7ರಂದು ಜನಿಸಿದ ವಾಹನ್ವತಿ ಅವರು, ಇಲ್ಲಿನ ಸೇಂಟ್ ಗ್ಸೇವಿಯರ್ ಕಾಲೇಜಿನಲ್ಲಿ ಪದವಿ ಮತ್ತು ಸರ್ಕಾರಿ ಕಾನೂನು ಕಾಲೇಜಿನಲ್ಲಿ ಕಾನೂನು ಪದವಿ ಪಡೆದಿದ್ದರು.