ನವದೆಹಲಿ (ಪಿಟಿಐ): ಜೂನ್‌ಗೆ ಅಂತ್ಯ ವಾಗುವ 2015–16ನೇ ಬೆಳೆ ವರ್ಷದಲ್ಲಿ, ಮಾವು ಫಸಲು ಶೇ 2.1ರಷ್ಟು ಹೆಚ್ಚಾಗಲಿದ್ದು, 19 ಲಕ್ಷ ಟನ್‌ಗಳಿಗೆ ತಲುಪಲಿದೆ. ಹೀಗಾಗಿ ಈ ಬಾರಿ ಬೆಲೆಯಲ್ಲಿ ಏರಿಕೆಯಾಗುವ ಸಾಧ್ಯತೆ ಕಡಿಮೆ ಇದೆ ಎಂದ ಕೇಂದ್ರ ಕೃಷಿ ಸಚಿವ ರಾಧಾ ಮೋಹನ್‌ ಸಿಂಗ್‌ ಅವರು ಮಂಗಳವಾರ ಲೋಕಸಭೆಗೆ ತಿಳಿಸಿದರು.
ಕಳೆದ ವರ್ಷ ಇದೇ ಅವಧಿಯಲ್ಲಿ 18.52 ಲಕ್ಷ ಟನ್‌ ಫಸಲು ಬಂದಿತ್ತು.
ಅಕಾಲಿಕ ಮಳೆಯಿಂದ ತೆಲಂಗಾಣ ದಲ್ಲಿ ಈ ಬಾರಿ ಫಸಲು ಕಡಿಮೆಯಾಗಲಿದೆ. ಉಳಿದಂತೆ ಎಲ್ಲಾ ರಾಜ್ಯಗಳಲ್ಲಿ ಫಸಲು ಕಳೆದ ವರ್ಷದಷ್ಟೇ ಅಥವಾ ಅದಕ್ಕೂ ಉತ್ತಮವಾಗಿರಲಿದೆ ಎಂದು ಅವರು ತಿಳಿಸಿದರು.
ದೇಶದಲ್ಲಿ ಬೆಳೆಯುವ ಒಟ್ಟು ಮಾವಿನ ಹಣ್ಣಿನಲ್ಲಿ ಆಂಧ್ರಪ್ರದೇಶ ಮತ್ತು ಉತ್ತರ ಪ್ರದೇಶದ ಪಾಲೇ ಅರ್ಧದಷ್ಟಿದೆ. ಒಂದು ಸಾವಿರಕ್ಕೂ ಹೆಚ್ಚಿನ ವಿವಿಧ ತಳಿಯ ಹಣ್ಣುಗಳನ್ನು ಬೆಳೆಯಲಾಗುತ್ತಿದೆ. ಯುಎಇಗೆ ಅತಿ ಹೆಚ್ಚು ಮಾವು ರಫ್ತಾಗುತ್ತಿದೆ.
