ಮೂರು ಮೆಟ್ಟಿಲ ಸ್ವರ್ಗ ‘ಟಿಟ್ಲಿಸ್’

ಕೊನೆಯ ಭಾಗದಲ್ಲಿ ಬಂದಾಗ ಅಲ್ಲಿನ ವಾತಾವರಣ ಏರುಪೇರಾದರೆ, ಚಳಿ – ಶೀತಗಾಳಿ ಹೆಚ್ಚಾದರೆ ಅದನ್ನು ತಡೆಯಲು ಪರ್ವತದ ಮೇಲೆ ರೆಸ್ಟ್ ರೂಂ ಇದೆ. ಅಲ್ಲಿ ಉಷ್ಣಾಂಶ ಸಮತೋಲನದ  ವ್ಯವಸ್ಥೆಯನ್ನು ಮಾಡಲಾಗಿದೆ. ಅಷ್ಟು ಮಾತ್ರವಲ್ಲ– ಅಂಗಡಿಗಳು, ರೆಸ್ಟೋರೆಂಟ್‌ಗಳು ಕೂಡ ಪರ್ವತದ ಮೇಲಿವೆ. ‘ಬೆಟ್ಟದ ಮೇಲೊಂದು ಮನೆಯ ಮಾಡಿ...’ ಎಂದು ಟಿಟ್ಲಿಸ್‌ ಹತ್ತಿ ಕೊರಗುವಂತಿಲ್ಲ. ಟಿಟ್ಲಿಸ್‌ ಹಲವು ಆಕರ್ಷಣೆಗಳ ಆಗರ. ವಿಶೇಷ ಉಡುಪನ್ನು ಧರಿಸಿಕೊಂಡು ಫೋಟೋವನ್ನು  ತೆಗೆಸಿಕೊಳ್ಳಲು ಇಲ್ಲೊಂದು ಸ್ಟುಡಿಯೋ ಇದೆ. ಒಂದು ಫೋಟೋವಿಗೆ 36 ಯೂರೊ ತೆರಬೇಕು.

ಸ್ವಿಟ್ಜರ್‌ಲ್ಯಾಂಡ್‌ನಲ್ಲಿ ಕೇಬಲ್‌ ಕಾರಿನ ಮೂಲಕ ಹೋಗುವುದರ ಬಗ್ಗೆ ಮೊದಲೇ ಗೊತ್ತಿದ್ದರಿಂದ ಮೊದಮೊದಲು ಭಯ, ನಡುಕ ಉಂಟಾಗಿತ್ತು. ‘ಹೇಗಪ್ಪಾ ಅಷ್ಟು ಎತ್ತರಕ್ಕೆ ಕೇಬಲ್‌ ಕಾರಿನಲ್ಲಿ ಹೋಗುವುದು? ಜೀವಕ್ಕೆ ಅಪಾಯವಾದರೆ ಗತಿ ಏನು?’ ಎನ್ನುವ ದಿಗಿಲು ನಮ್ಮಲ್ಲಿ ಮನೆ ಮಾಡಿತ್ತು. ಗಟ್ಟಿ ಮನಸ್ಸು ಮಾಡಿಕೊಂಡು ಕೇಬಲ್‌ ಕಾರ್‌ ಸ್ಟೇಷನ್‌ ಪ್ರವೇಶ ದ್ವಾರವನ್ನು  ಪ್ರವೇಶಿಸಿದೆವು.

ಕೇಬಲ್‌ ಕಾರ್‌ ತಿರುಗುತ್ತಾ ಮೇಲೇರಲು ಪ್ರಾರಂಭಿಸಿತು. ಸುತ್ತಲೂ ಮರಗಿಡ ಬಳ್ಳಿ, ರಸ್ತೆಗಳು, ಕಟ್ಟಡಗಳು, ತಮ್ಮ ಸೌಂದರ್ಯದ ಮೆರುಗನ್ನು ಹೆಚ್ಚಿಸಿಕೊಂಡು ಸುಂದರ ವಿನೂತನ ರೀತಿಯಲ್ಲಿ ಕಾಣಿಸುತ್ತಿದ್ದವು. ಆಹಾ! ಎಂಥ ಅದ್ಬುತ ದೃಶ್ಯಗಳು! ಅದು ಬಣ್ಣನೆಗೆ ನಿಲುಕುದ ಅಪೂರ್ವ ಅನುಭವ.  ಟನ್‌ಗಟ್ಟಲೆ ಕಬ್ಬಿಣದ ತೊಲೆಗಳನ್ನು ತಂದು, ಇಲ್ಲಿ ನೆಟ್ಟು, ಅವುಗಳನ್ನು ಸಿಮೆಂಟ್‌ ಜಲ್ಲಿಯಿಂದ ಭದ್ರಪಡಿಸಿ, ಅದರ ಮೇಲೆ ಕೇಬಲ್‌ ಎಳೆದು, ಕಾರಿನ ಭಾರಕ್ಕೆ ಎಲ್ಲೂ ಜಗ್ಗದಂತೆ ಎಳೆದು ಕಟ್ಟಿ, ಸಮತೋಲನವನ್ನ ಕಾಯ್ದಿರಿಸಿ ಅದರ ಮೂಲಕ ಕಾರಿನಲ್ಲಿ ಜನರನ್ನ ಹೊತ್ತು ತರುವ ಸಾಹಸದ ಅನಾವರಣ ಇಲ್ಲಿದೆ. ಈ ಅಪೂರ್ವ ಸೃಷ್ಟಿ ಮಾನವನ ಬುದ್ಧಿಶಕ್ತಿ ಹಾಗೂ ಶ್ರಮಶಕ್ತಿಯ ಸಂಗಮದ ಪ್ರತೀಕದಂತಿತ್ತು.

ಕೇಬಲ್‌ ಕಾರು ಮೇಲೇರಿದಂತೆ ಬೆಟ್ಟಕ್ಕೆ ಹಿಮದ ಬಟ್ಟೆಯನ್ನು ಉಡಿಸಿದಂತೆ ಕಾಣಿಸುತ್ತಿತ್ತು. ಎಲ್ಲಿ ನೋಡಿದರೂ ಹಿಮ! ಸ್ವಚ್ಛ ಬಿಳುಪಿನ ಲತಾಂಗಿಯಂತೆ ಕಂಗೊಳಿಸುವ ಹಿಮದ ಧಾರೆಯನ್ನು ಅನುಭವಿಸುವಾಗಲೇ ಮತ್ತೊಂದು ಸ್ಟೇಷನ್‌ ಬಂದಿತು. ಕೇಬಲ್‌ ಕಾರಿನಿಂದ ಕೇಬಲ್‌ ಬಸ್ಸಿಗೆ ಸ್ಥಳಾಂತರಗೊಂಡೆವು. ಕೇಬಲ್‌ ಕಾರಿನಲ್ಲಿ ಕೇವಲ 8 ಜನಕ್ಕೆ ಸ್ಥಳಾವಕಾಶ. ಬಸ್‌ನಲ್ಲಿ 20–30 ಜನರು ನಿಂತುಕೊಂಡು ಪ್ರಯಾಣ ಮಾಡಬಹುದಿತ್ತು.

ಕೇಬಲ್‌ ಬಸ್‌ ಎರಡು ಪರ್ವತಗಳ ಮಧ್ಯೆ ಚಲಿಸಿದಾಗ, ಸಾವಿರಾರು ಅಡಿಗಳ ಆಳದ ಪ್ರಪಾತವನ್ನು ನೋಡಿ ಎದೆ ನಡುಗಿತು. ಸೂರ್ಯನ ಕಿರಣಗಳಿಗೆ ಮೈಯೊಡ್ಡಿಕೊಂಡಿದ್ದ ಹಿಮ ಹೊಳೆಯುತ್ತಿತ್ತು.  ಅಗಾಧವಾದ ಬಿಳಿಯ ಹಿಮರಾಶಿ ನೋಡಲು ಎರಡು ಕಣ್ಣು ಸಾಲದೇನೋ ಅನ್ನುವ ಭಾವ. ಮತ್ತೊಂದು ಕೇಬಲ್‌ ಬಸ್ಸಿನ ಮೂಲಕ ಮೌಂಟ್‌ ಟಿಟ್ಲಿಸ್‌ನ ಪರ್ವತದ ಮೇಲೆ, ಹತ್ತು ಸಾವಿರ ಅಡಿಯ ಮೇಲೆ ತಲುಪಿದ್ದೆವು.

ಪ್ರಖರವಾದ ಸೂರ್ಯನ ಬೆಳಕಿನಲ್ಲಿ ಹಿಮದ ಮೇಲೆ ಕುಣಿದು ಕುಪ್ಪಳಿಸಿದೆವು. ಹಿಮವನ್ನು  ಒಬ್ಬರ ಮೇಲೆ ಒಬ್ಬರು ಎರಚಾಡಿದೆವು. ಮಕ್ಕಳಂತೆ ಕುಣಿದಾಡಿದೆವು. ಹಿಮದ ಮೇಲೆ ಬಿದ್ದರೆ, ಮೇಲೆದ್ದು ಜಾರಿದರೆ ಹಿಮ ಚೆಲ್ಲಾಪಿಲ್ಲಿಯಾಗುವುದು. ಕೆಲವರಂತೂ ಹಿಮದ ಮೇಲೆ ವಿವಿಧ ಭಂಗಿಗಳಲ್ಲಿ ನಿಂತು ಕ್ಯಾಮೆರಾಗಿ ಫೋಜು ನೀಡುತ್ತಿದ್ದರು. ಸ್ವಿಟ್ಜರ್ಲೆಂಡ್‌ ಭೂಮಿಯ ಮೇಲಿರುವ ಸ್ವರ್ಗ ಎನ್ನುತ್ತಾರೆ. ಆ ಮಾತಿನ ಸಾಕ್ಷಾತ್ಕಾರದಂತೆ ಟಿಟ್ಲಿಸ್‌ ಪರ್ವತ ಕಾಣುತ್ತದೆ.