ನವದೆಹಲಿ(ಪಿಟಿಐ): ಅಮೆರಿಕ ಮೂಲದ ಬಹುರಾಷ್ಟ್ರೀಯ ಕಂಪ್ಯೂಟರ್ ಸಾಫ್ಟ್‌ವೇರ್ ಕಂಪೆನಿ ಮೈಕ್ರೊಸಾಫ್ಟ್‌ನಲ್ಲಿ, ‘ನೋಕಿಯಾ’ ಕಂಪೆನಿಯ ಮೊಬೈಲ್ ಹ್ಯಾಂಡ್ಸೆಟ್ ತಯಾರಿಕೆ ವಿಭಾಗದ ವಿಲೀನ ಪ್ರಕ್ರಿಯೆ ಏ. 25ಕ್ಕೆ ಪೂರ್ಣಗೊಳ್ಳಲಿದೆ ಎಂದು ನೋಕಿಯಾ ಪ್ರಕಟಣೆಯಲ್ಲಿ ತಿಳಿಸಿದೆ.
ಫಿನ್ಲೆಂಡ್ ಮೂಲದ ದೂರಸಂಪರ್ಕ ಉಪಕರಣಗಳ ತಯಾರಿಕಾ ಕಂಪೆನಿ ‘ನೋಕಿಯಾ’ದ ಮೊಬೈಲ್ ಹ್ಯಾಂಡ್ಸೆಟ್ ವಹಿವಾಟು ವಿಭಾಗವನ್ನು ಮೈಕ್ರೊಸಾಫ್ಟ್‌ ಇತ್ತೀಚೆಗೆ ಸುಮಾರು 717 ಕೋಟಿ ಡಾಲರ್‌ಗೆ (₨47,200 ಕೋಟಿಗೆ) ಸ್ವಾಧೀನಪಡಿಸಿಕೊಂಡಿತ್ತು.
ಈ ವಿಲೀನ ಪ್ರಕ್ರಿಯೆ ಪೂರ್ಣಗೊಂಡ ನಂತರವೂ ಉಭಯ ಕಂಪೆನಿಗಳ ನಡುವಿನ ‘ಸೇವಾ ಒಪ್ಪಂದ’ದಂತೆ ನೋಕಿಯಾದ ವಿವಾದಿತ ಚೆನ್ನೈ ತಯಾರಿಕಾ ಘಟಕ ಕಾರ್ಯನಿರ್ವಹಿಸಲಿದೆ ಎಂದು ಕಂಪೆನಿ ವಕ್ತಾರ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
ನೋಕಿಯಾದ ಚೆನ್ನೈನಲ್ಲಿನ ಹ್ಯಾಂಡ್ಸೆಟ್ ತಯಾರಿಕಾ ಘಟಕದಲ್ಲಿ ಸದ್ಯ 6,600 ಸಿಬ್ಬಂದಿ ಕಾರ್ಯನಿರ್ವಹಿ ಸುತ್ತಿದ್ದಾರೆ. ಆದರೆ, ಇವರಲ್ಲಿ 700 ಮಂದಿ ಈಗಾಗಲೇ ಸ್ವಯಂ ನಿವೃತ್ತಿ ಯೋಜನೆಗೆ (ವಿಆರ್‌ಎಸ್‌) ಅರ್ಜಿ ಸಲ್ಲಿಸಿದ್ದಾರೆ. ಈ ಘಟಕ ಮಾರಾಟ ತೆರಿಗೆ ವಿವಾದದಲ್ಲೂ ಸಿಲುಕಿಕೊಂಡಿದೆ.
ಈ ಹಿನ್ನೆಲೆಯಲ್ಲಿ ಮೈಕ್ರೊಸಾಫ್ಟ್‌ಗೆ ಇಲ್ಲಿನ ಘಟಕವನ್ನು ಹಸ್ತಾಂತರಿಸುವು ದಕ್ಕೂ ಮುನ್ನ ತಮಿಳುನಾಡು ಸರ್ಕಾ ರಕ್ಕೆ ನೋಕಿಯಾ ₨3,500 ಕೋಟಿ ಭದ್ರತೆ ನೀಡಬೇಕು ಎಂದು ಮಾ. 14ರಂದು ಸುಪ್ರೀಂಕೋರ್ಟ್‌ ಆದೇಶ ನೀಡಿತ್ತು.
ಚೆನ್ನೈ ತಯಾರಿಕಾ ಘಟಕ ಪ್ರತಿ ದಿನ 10 ಲಕ್ಷ ಮೊಬೈಲ್ ಹ್ಯಾಂಡ್ಸೆಟ್ ತಯಾರಿಸುವ ಸಾಮರ್ಥ್ಯ ಹೊಂದಿದೆ. ಆದರೆ, ಇತ್ತೀಚೆಗೆ ತಯಾರಿಕೆ ಗಣನೀಯವಾಗಿ ಕುಸಿದಿದೆ. ಈ ಹಿನ್ನೆಲೆಯಲ್ಲಿ ಕಂಪೆನಿ ‘ವಿಆರ್‌ಎಸ್‌’ ತೆಗೆದುಕೊಳ್ಳು ವಂತೆ ಕಾರ್ಮಿಕರನ್ನು ಒತ್ತಾಯಿಸುತ್ತಿದೆ ಎನ್ನುತ್ತಾರೆ ನೋಕಿಯಾ ಇಂಡಿಯಾದ ಕಾರ್ಮಿಕರ ಸಂಘದ ಗೌರವ ಅಧ್ಯಕ್ಷ ಎ.ಸುಂದರರಾಜನ್‌.
ಈ ಮಧ್ಯೆ, ‘ವಿಆರ್‌ಎಸ್‌’ಗೆ ಅರ್ಜಿ ಸಲ್ಲಿಸಿರುವವರ ಸಂಖ್ಯೆ ಖಚಿತಪಡಿಸಲು ನೋಕಿಯಾ ವಕ್ತಾರ ನಿರಾಕರಿಸಿದ್ದಾರೆ. ಬಲವಂತವಾಗಿ ‘ವಿಆರ್‌ಎಸ್‌’ ಹೇರಲಾಗುತ್ತಿದೆ ಎಂದು ಆರೋಪಿಸಿ ಕೆಲವು ಕಾರ್ಮಿಕರು ಮಂಗಳವಾರದಿಂದ ಕ್ಯಾಂಟೀನ್‌ ಸೇವೆಗಳನ್ನು ಬಹಿಷ್ಕರಿಸುವ ಮೂಲಕ ಪ್ರತಿಭಟನೆ ಆರಂಭಿಸಿದ್ದಾರೆ.
