ಮೈಸೂರು– ಕೊಡಗು: ಶೇ 65.20

ಮೈಸೂರು: ಮೈಸೂರು– ಕೊಡಗು ಲೋಕಸಭಾ ಕ್ಷೇತ್ರದಲ್ಲಿ ಗುರುವಾರ ನಡೆದ ಲೋಕಸಭೆ ಚುನಾವಣೆಯಲ್ಲಿ ದಾಖಲೆ ಪ್ರಮಾಣದ ಮತದಾನ ನಡೆಯಿತು. ಈ ಕ್ಷೇತ್ರದಲ್ಲಿ ಶೇ 65.20ರಷ್ಟು ಮತದಾನ ನಡೆಯುವ ಮೂಲಕ ಕಳೆದ ಬಾರಿಯ ಶೇ 58ರ ಪ್ರಮಾಣವನ್ನು ಮೀರಿತು.

ಸಂಜೆ 6 ಗಂಟೆಯ ಹೊತ್ತಿಗೆ ಚುನಾವಣಾ ಆಯೋಗದ ಮೂಲಗಳು ನೀಡಿರುವ ಈ ಮಾಹಿತಿಯ ಪ್ರಕಾರ, ಮೈಸೂರು–ಕೊಡಗು ಲೋಕಸಭಾ ವ್ಯಾಪ್ತಿಯ ಪಿರಿಯಾಪಟ್ಟಣ ವಿಧಾನಸಭಾ ಕ್ಷೇತ್ರದಲ್ಲಿ ಶೇ 77.54ರಷ್ಟು ಮತದಾನವಾಗಿರುವುದು ಗರಿಷ್ಠ ಪ್ರಮಾಣವಾಗಿದೆ. ಕ್ಷೇತ್ರದ ನರಸಿಂಹರಾಜ ವಿಧಾನಸಭಾ ವ್ಯಾಪ್ತಿಯಲ್ಲಿ ಅತಿ ಕಡಿಮೆ ಶೇ 55.93ರಷ್ಟು ಮತದಾನವಾಗಿದೆ. ಉಳಿದಂತೆ ಹುಣಸೂರು (75.82), ಚಾಮುಂಡೇಶ್ವರಿ (67.26), ಕೃಷ್ಣರಾಜ (57.31), ಚಾಮರಾಜ (57.70), ವಿರಾಜಪೇಟೆ (65), ಮಡಿಕೇರಿ (68.80) ಕ್ಷೇತ್ರಗಳಲ್ಲಿ ಮತದಾನವಾಗಿದೆ.

ಕಾರ್ಯಕರ್ತರ ಜಟಾಪಟಿ: ಆರು ಮಂದಿಗೆ ಗಾಯ
ಮತದಾರರನ್ನು ಮತಗಟ್ಟೆಗೆ ಕರೆತರುವ ವಿಚಾರದಲ್ಲಿ ಸೋಶಿಯಲ್‌ ಡೆಮಾಕ್ರೆಟಿಕ್‌ ಪಾರ್ಟಿ ಆಫ್‌ ಇಂಡಿಯಾ (ಎಸ್‌ಡಿಪಿಐ) ಹಾಗೂ ಕಾಂಗ್ರೆಸ್‌ ಕಾರ್ಯಕರ್ತರ ನಡುವೆ ನಡೆದ ಜಟಾಪಟಿಯಲ್ಲಿ ಆರು ಮಂದಿ ಗಾಯಗೊಂಡಿರುವ ಘಟನೆ ಮೈಸೂರಿನ ಉದಯಗಿರಿ ಠಾಣೆಯ ಆವರಣದಲ್ಲೇ ನಡೆದಿದೆ.

ಘಟನೆಯಿಂದ ಆಕ್ರೋಶಗೊಂಡ ಕಾಂಗ್ರೆಸ್‌ ಬೆಂಬಲಿಗರು ಶಾಸಕ ತನ್ವೀರ್‌ ಸೇಟ್‌ ಸಮ್ಮುಖದಲ್ಲೇ ಪೊಲೀಸ್‌ ಠಾಣೆಯ ಮೇಲೆ ಕಲ್ಲು ತೂರಾಟ ನಡೆಸಿದರು. ಗುಂಪು ಚದುರಿಸಲು ಪೊಲೀಸರು ಲಾಠಿ ಪ್ರಹಾರ ನಡೆಸಿದರು. ಇದರಿಂದ ಉದಯಗಿರಿಯಲ್ಲಿ ಗುರುವಾರ ಸಂಜೆ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿತ್ತು. ಘಟನೆಯಲ್ಲಿ ಕಾಂಗ್ರೆಸ್‌ನ ಅಕ್ರಂ, ಸೈಯದ್‌ ವಾಸೀಮ್‌್, ಮಹಮ್ಮದ್‌ ಖಲೀಮ್‌ ಉಲ್ಲಾ, ಸನಾಉಲ್ಲಾ, ಎಸ್‌ಡಿಪಿಐನ ತಾಹೀರ್‌ ಅಹಮ್ಮದ್‌, ಮಹಮ್ಮದ್‌ ತಬ್ರಿಜ್‌ ಗಾಯಗೊಂಡಿದ್ದಾರೆ. ಎಲ್ಲರನ್ನೂ ಕೆ.ಆರ್‌. ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇದಕ್ಕೂ ಮುನ್ನ ಮಂಡಿ ಮೊಹಲ್ಲಾದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಮತಗಟ್ಟೆಯ ಬಳಿ ಎಸ್‌ಡಿಪಿಐ ಹಾಗೂ ಕಾಂಗ್ರೆಸ್‌ ಕಾರ್ಯಕರ್ತರ ನಡುವೆ ಜಟಾಪಟಿ ನಡೆದಿದೆ.

ಮತದಾನ ಜಾಗೃತಿಗೆ ರಿಯಾಯಿತಿ ಸೂತ್ರ
ಮೈಸೂರು: ಲೋಕಸಭೆ ಚುನಾವಣೆಯಲ್ಲಿ ಮತದಾರರನ್ನು ಮತಚಲಾವಣೆಗೆ ಪ್ರೇರೇಪಿಸಲು ಏ. 17ರಂದು ನಗರದ ವಿವಿಧ ಉದ್ಯಮ ಸಂಸ್ಥೆಗಳು ಮತದಾರರಿಗೆ ವಿಶೇಷ ರಿಯಾಯಿತಿ ದರದಲ್ಲಿ ವಸ್ತುಗಳನ್ನು ಖರೀದಿಸಲು ಅವಕಾಶ ಕಲ್ಪಿಸಿದ್ದವು.