ಯಲ್ಲಾಲಿಂಗ ಹತ್ಯೆ ಪ್ರಕರಣ: ಇದೀಗ ರಾಜಕೀಯ ಬಣ್ಣ

‘ಗಂಗಾವತಿ ತಾಲ್ಲೂಕು ಕನಕಾಪುರದ ಕೆಂಚಮ್ಮ (ಯಲ್ಲಾಲಿಂಗನ ತಾಯಿ)ನ ಮನೆಗೆ ದಿನವೂ ರಾಜಕೀಯ ನಾಯಕರು ಬಂದು ಭೇಟಿ ನೀಡುತ್ತಿದ್ದಾರೆ. ಕೆಲವರು ಸಾಂತ್ವನ ಹೇಳಿ ಒಂದಿಷ್ಟು ಕಾಸು ಕೊಟ್ಟು ನಿರ್ದಿಷ್ಟ ರಾಜಕೀಯ ನಾಯಕರ ಮೇಲೆ ಆರೋಪ ಮಾಡಿ ಮುಂದೆ ಸಾಗುತ್ತಿದ್ದಾರೆ.

ಅದರ ಮಧ್ಯೆ ವಿವಿಧ ಸಂಘಟನೆಗಳ ಮುಖಂಡರು ಕೂಡಾ ಕೆಂಚಮ್ಮನ ಮೇಲೇ ಒತ್ತಡ ಹೇರಿ ಮತ್ತೆ ಮತ್ತೆ ಮಾಧ್ಯಮಗಳ ಮುಂದೆ ಹೇಳಿಕೆ ಕೊಡಿಸುತ್ತಿದ್ದಾರೆ. ಈ ಘಟನೆಯಲ್ಲಿ ರಾಜಕೀಯ ಬೆರೆಸುವುದು ಎಳ್ಳಷ್ಟೂ ಸರಿಯಲ್ಲ’ ಎಂದು ಗ್ರಾಮದ ಹಿರಿಯರಾದ ಪಂಪನಗೌಡ ಹೇಳಿದರು.

‘ಕೊಲೆ ಪ್ರಕರಣದ ಮೊದಲ ಆರೋಪಿ ಮಹಾಂತೇಶ ನಾಯಕನ ತಂದೆ ಹನುಮೇಶ ನಾಯಕ ಮೇ 22ರಂದು ಕೆಂಚಮ್ಮನ ಮನೆಗೆ ತೆರಳಿ ಕಾಲಿಗೆ ಬಿದ್ದು, ತನ್ನ ಮಗ ನಿರಪರಾಧಿ ಎಂದ ಪ್ರಸಂಗವೂ ನಡೆಯಿತು. ಇದರ ಹಿಂದೆ ಪ್ರಮುಖ  ಸುದ್ದಿ ವಾಹಿನಿಯೊಂದರ ಸಿಬ್ಬಂದಿಯ ಒತ್ತಡವೂ ಇತ್ತು. ಪ್ರಕರಣ ತನಿಖೆಯ ಹಂತದಲ್ಲಿರುವಾಗ ಆರೋಪಿಗೆ ಅನುಕೂಲವಾಗುವಂತೆ ವೈಭವೀಕರಣ ಮಾಡುವ ಅಗತ್ಯ ಏನಿತ್ತು?’ ಎಂದು ತನಿಖಾ ತಂಡದ ಮೂಲಗಳು ಅಸಮಾಧಾನ ವ್ಯಕ್ತಪಡಿಸಿವೆ.