ಬೆಂಗಳೂರು: ವಿಶ್ವಖ್ಯಾತ ಓಟಗಾರ ಜಮೈಕಾದ ಉಸೇನ್‌ ಬೋಲ್ಟ್‌ , ಭಾರತದ ಕ್ರಿಕೆಟಿಗ ಯುವರಾಜ್‌ ಸಿಂಗ್‌ಗೆ ಸವಾಲೊಡ್ಡುವ ಸಮಯ ಸನ್ನಿಹಿತವಾಗಿದೆ.
ಸೆಪ್ಟೆಂಬರ್‌ 2ರಂದು ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಸ್ಪರ್ಧೆಯಲ್ಲಿ ಬೋಲ್ಟ್‌ ಹಾಗೂ ಯುವಿ ಕ್ರಿಕೆಟ್ ಆಡಲಿದ್ದಾರೆ. ಈ ಕಾರ್ಯಕ್ರಮಕ್ಕೆ ‘ಬೋಲ್ಟ್‌ ಆ್ಯಂಡ್‌ ಯುವಿ–ಬ್ಯಾಟಲ್‌ ಆಫ್ ದಿ ಲೆಜೆಂಡ್ಸ್‌’ ಎಂದು ಶೀರ್ಷಿಕೆ ನೀಡಲಾಗಿದೆ.
ಪೂಮಾ ಕಂಪೆನಿಯ ಪ್ರಚಾರ ರಾಯಭಾರಿಗಳಾಗಿರುವ ಯುವಿ ಮತ್ತು ಬೋಲ್ಟ್‌ ಅವರ ಆಟವನ್ನು ಕಣ್ತುಂಬಿಕೊಳ್ಳಲು ಉದ್ಯಾನನಗರಿಯ ಜನತೆ ಈಗ ಕಾತರರಾಗಿದ್ದಾರೆ.
‘ಸೆಪ್ಟೆಂಬರ್‌ 2 ರಂದು ನಡೆಯುವ ಕ್ರಿಕೆಟ್ ಆಟದಲ್ಲಿ ಇಬ್ಬರು ದಿಗ್ಗಜ ಕ್ರೀಡಾಪಟುಗಳು ತಮ್ಮ ಸಾಮರ್ಥ್ಯ ಮೆರೆಯಲಿದ್ದಾರೆ. ಪೂಮಾ ಕಂಪೆನಿ ಇದೇ ಮೊದಲ ಬಾರಿಗೆ ಯುವಿ ಹಾಗೂ ಬೋಲ್ಟ್‌ ಅವರ ಸಮಾಗಮಕ್ಕೆ ವೇದಿಕೆ ಕಲ್ಪಿಸಿದೆ’ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ
