ಪಣಜಿ (ಐಎಎನ್‌ಎಸ್‌): ಹಲ್ಲೆ, ಅತ್ಯಾಚಾರ ಯತ್ನ ಮತ್ತು ದರೋಡೆಗೆ ಒಳಗಾದ ರಷ್ಯಾದ ಮಹಿಳೆಯನ್ನು ವೈದ್ಯಕೀಯ ತಪಾಸಣೆಗೆಂದು ಇಲ್ಲಿನ ಗೋವಾ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ (ಜಿಎಂಸಿ) ಕಳುಹಿಸಿದಾಗ ಅಲ್ಲಿನ ವೈದ್ಯರೊಬ್ಬರು ಅವರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ ಎಂದು ಆರೋಪಿಸಲಾಗಿದೆ.
ಲೈಂಗಿಕ ಶೋಷಣೆಗೆ ಒಳಗಾದ ಮಹಿಳೆ ಈ ವಿಷಯವನ್ನು ರಷ್ಯಾದ ಕಾನ್ಸುಲೇಟ್‌ ಅಧಿಕಾರಿಗೆ ತಿಳಿಸಿದ್ದಾರೆ. ರಷ್ಯಾದ ಮಹಿಳೆ ಏಳು ದಿನಗಳ ಕಾಲ ಪ್ರವಾಸಕ್ಕೆಂದು ಗೋವಾಕ್ಕೆ ಬಂದಿದ್ದರು. ಕಳೆದ ಶನಿವಾರ ಅವರು ಬಾಗಾ ಬೀಚ್‌ನಲ್ಲಿ ವಿಹರಿಸುತ್ತಿದ್ದಾಗ ದುರುಳರ ಗುಂಪೊಂದು ಅವರ ಮೇಲೆ ಹಲ್ಲೆ ಮಾಡಿ, ಅತ್ಯಾಚಾರಕ್ಕೆ ಯತ್ನಿಸಿತು. ಬಳಿಕ ಚಿನ್ನದ ಸರ ಮತ್ತು 33 ಸಾವಿರ ನಗದನ್ನು ದರೋಡೆ ಮಾಡಿತ್ತು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹಿಳೆಯನ್ನು ತಪಾಸಣೆಗಾಗಿ ಜಿಎಂಸಿಗೆ ಕಳುಹಿಸಿದಾಗ ಅಲ್ಲಿನ ವೈದ್ಯರೊಬ್ಬರು ಲೈಂಗಿಕ ದೌರ್ಜನ್ಯ ನಡೆಸಿದ್ದಾರೆ ಎಂದು ರಷ್ಯಾ ಕಾನ್ಸುಲೇಟ್‌ನ ಕಾನೂನು ಸಲಹೆಗಾರ ವಿಕ್ರಂ ವರ್ಮಾ ತಿಳಿಸಿದ್ದಾರೆ.
‘ಮೊದಲಿಗೆ ರಷ್ಯಾ ಮಹಿಳೆ ಮೇಲೆ ಹಲ್ಲೆ, ಅತ್ಯಾಚಾರ ಯತ್ನ ಮತ್ತು ದರೋಡೆಗೆ ಸಂಬಂಧಿಸಿದಂತೆ ಪ್ರಕರಣ ದಾಖಲಿಸುವಲ್ಲಿ ಪೊಲೀಸರಿಂದ ಕರ್ತವ್ಯ ಲೋಪಗಳಾಗಿವೆ. ವೈದ್ಯಕೀಯ ತಪಾಸಣೆಯೂ ನಿಯಮದಂತೆ ಪ್ರಕ್ರಿಯೆಗಳು ನಡೆದಿಲ್ಲ. ಬದಲಿಗೆ ಪುರುಷ ವೈದ್ಯರೊಬ್ಬರು ಅವರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ’ ಎಂದು ವರ್ಮಾ ಹೇಳಿದ್ದಾರೆ.
