ರಾಜಧಾನಿ ರಸ್ತೆಗಳಲ್ಲೀಗ ಗುಂಡಿಗಳದ್ದೇ ರಾಜ್ಯಭಾರ!

ಬೆಂಗಳೂರು: ನಗರದ ತುಂಬಾ ಬಸ್‌ ಶೆಲ್ಟರ್‌ಗಳ ಮೇಲೆ ಈಗ ರಸ್ತೆಗಳ ಅಭಿವೃದ್ಧಿ ಕುರಿತ ಜಾಹೀರಾತುಗಳೇ ರಾರಾಜಿಸುತ್ತಿವೆ. ‘ಸಂಚಾರ ಸುಗಮಗೊಳಿಸಿದ ಅಂದದ ರಸ್ತೆಗಳು’, ‘ಬೆಂಗಳೂರಿನ ಅಂದ ಹೆಚ್ಚಿಸಿದ ಅಂತರರಾಷ್ಟ್ರೀಯ ಗುಣಮಟ್ಟದ ರಸ್ತೆಗಳು’ ಎಂಬ ಅಡಿಬರಹಗಳು ಕಣ್ಣಿಗೆ ಕುಕ್ಕುತ್ತವೆ. ಅದನ್ನು ನೋಡುತ್ತಾ ಹೋಗುವ ಸವಾರರಿಗೆ ಎದುರಿನಲ್ಲೇ ಗುಂಡಿ ಕಾದಿರುತ್ತದೆ!

‘ಅಂದದ, ಅಂತರರಾಷ್ಟ್ರೀಯ ರಸ್ತೆಗಳು ಒಂದೆಡೆ ಇರಲಿ, ಗುಂಡಿಯಿಲ್ಲದ ರಸ್ತೆಗಳನ್ನಾದರೂ ಬಿಬಿಎಂಪಿ ಕೊಟ್ಟರೆ ಸಾಕು’ ಎಂದು ವ್ಯಂಗ್ಯವಾಡುತ್ತಾರೆ ಸಿಟಿಜನ್‌ ಆ್ಯಕ್ಷನ್‌ ಫೋರಂ ಅಧ್ಯಕ್ಷ ಡಿ.ಎಸ್‌. ರಾಜಶೇಖರ್‌.

‘ಗುಂಡಿಗಳ ಲೆಕ್ಕ ಇಡುವುದು ಏನು ತರಕಾರಿ ವ್ಯಾಪಾರವೇ? ಪ್ರತಿ ರಸ್ತೆಯಲ್ಲೂ ಗುಂಡಿಗಳೇ ತುಂಬಿದ್ದರೂ ಬಿಬಿಎಂಪಿ ಕೇವಲ ನೂರರ ಲೆಕ್ಕದಲ್ಲಿ ಅವುಗಳ ಸಂಖ್ಯೆಯನ್ನು ನೀಡುತ್ತದೆ. ಅದರ ಈ ನಿಲುವು ನಾಚಿಕೆಗೇಡು’ ಎಂದು ಗೇಲಿ ಮಾಡುತ್ತಾರೆ.

ಕಳೆದ ಹಣಕಾಸು ವರ್ಷದಲ್ಲಿ ಬಿಬಿಎಂಪಿ ರಸ್ತೆ ಅಭಿವೃದ್ಧಿಗಾಗಿ ₹ 952 ಕೋಟಿ ವ್ಯಯಿಸಿದೆ.  ‘ದುರಸ್ತಿ ಮಾಡಲಾಗಿದೆ’ ಎಂದು ಪಾಲಿಕೆ ಕೊಡುವ ಪಟ್ಟಿಯಲ್ಲಿರುವ ರಸ್ತೆಗಳಲ್ಲೇ ಈಗ ಮತ್ತೆ ಗುಂಡಿಗಳು ಬಿದ್ದಿವೆ. ಮೊದಲೇ ಕಿಕ್ಕಿರಿದ ವಾಹನಗಳಿಂದ ಕಂಗೆಟ್ಟ ರಸ್ತೆಗಳು, ನಿರ್ವಹಣೆ ಕೊರತೆಯಿಂದ ಮೈಮೇಲೆಲ್ಲ ಗುಂಡಿಗಳ ‘ಗಾಯ’ ಮಾಡಿಕೊಂಡು ಒದ್ದಾಡುತ್ತಿವೆ.

ಒಂದೆಡೆ ಮೆಟ್ರೊ ಕಾಮಗಾರಿ, ಇನ್ನೊಂದೆಡೆ ಒಳಚರಂಡಿ ನಿರ್ಮಾಣ, ಮತ್ತೊಂದೆಡೆ ದೂರಸಂಪರ್ಕ ಹಾಗೂ ಅನಿಲ ಪೂರೈಕೆ ಜಾಲ ಅಳವಡಿಕೆ ಎಂದೆಲ್ಲ ಹಲವು ರಸ್ತೆಗಳು ಓಡಾಟಕ್ಕೆ ಆಸ್ಪದವೇ ಇಲ್ಲದಂತೆ ವಿರೂಪಗೊಂಡಿವೆ. ಹೊಸದಾಗಿ ಟಾರು ಹಾಕಲಾದ ರಸ್ತೆಗಳಲ್ಲೂ ಆಳವಾದ ಗುಂಡಿಗಳು ಬಾಯ್ದೆರೆದಿದ್ದು ಸಂಚಾರ ವ್ಯವಸ್ಥೆಗೆ ಸಂಚಕಾರ ತಂದಿವೆ.

ನಗರದ ರಸ್ತೆಗಳು ಎಷ್ಟೊಂದು ಹದಗೆಟ್ಟಿವೆ ಎಂಬುದನ್ನು ನೋಡಲು ಶೇಷಾದ್ರಿಪುರ ಇಲ್ಲವೆ ಚಿಕ್ಕಪೇಟೆ ರಸ್ತೆಗಳಿಗೆ ಬರಬೇಕು. ಒಂದಕ್ಕಿಂತ ಒಂದು ಆಳವಾದ ಗುಂಡಿಗಳು ಇಲ್ಲಿದ್ದು, ಒಂದೆಡೆ ತಪ್ಪಿಸಿಕೊಂಡರೂ ಇನ್ನೊಂದೆಡೆ ಸವಾರರನ್ನು ‘ಖೆಡ್ಡಾ’ಕ್ಕೆ ಕೆಡವಲು ಅವು ಸಜ್ಜಾಗಿ ನಿಂತಿರುತ್ತವೆ. ಬಿಬಿಎಂಪಿಯ ಕೇಂದ್ರ ಕಚೇರಿಯಿರುವ ಎನ್‌.ಆರ್‌. ವೃತ್ತದ ಸುತ್ತಲಿನ ರಸ್ತೆಗಳ ಸ್ಥಿತಿಯೂ ಇದಕ್ಕೆ ಹೊರತಲ್ಲ.

ಪಂಪಮಹಾಕವಿ ರಸ್ತೆ, ಆಡಗೋಡಿ ರಸ್ತೆ, ಬನ್ನೇರುಘಟ್ಟ ರಸ್ತೆ, ಬಸವನಗುಡಿ ರಸ್ತೆ, ಮೈಸೂರು ರಸ್ತೆ, ನೃಪತುಂಗ ರಸ್ತೆ, ಶೇಷಾದ್ರಿ ರಸ್ತೆ, ತುಮಕೂರು ರಸ್ತೆ, ಗೂಡ್ಸ್ ಶೆಡ್ ರಸ್ತೆ, ವಸಂತನಗರ ರಸ್ತೆ ಸೇರಿದಂತೆ ನಗರದ ಪ್ರಮುಖ ರಸ್ತೆಗಳ ದುಸ್ಥಿತಿ ಬಗೆಗೂ ಸಾಕಷ್ಟು ದೂರುಗಳಿವೆ.

‘2006ರಿಂದ 2015ರವರೆಗೆ ಬಿಬಿಎಂಪಿ 9,923 ರಸ್ತೆ ಕಾಮಗಾರಿಗಳನ್ನು ನಡೆಸಿದ್ದು, ಈ ಉದ್ದೇಶಕ್ಕಾಗಿ ₹ 17,832 ಕೋಟಿ ವ್ಯಯಿಸಿದೆ. ಇಷ್ಟೊಂದು ದುಡ್ಡು ಸದ್ವಿನಿಯೋಗ ಆಗಿದ್ದರೆ ನಗರದ 14 ಸಾವಿರ ಕಿ.ಮೀ. ಉದ್ದದ ರಸ್ತೆ ಜಾಲವೆಲ್ಲ ನುಣುಪಾದ ಮೇಲ್ಮೈನಿಂದ ನಳನಳಿಸಬೇಕಿತ್ತು’ ಎಂದು ಹಿಂದಿನ ಆಡಳಿತ ಪಕ್ಷದ ನಾಯಕ ಎನ್‌.ಆರ್‌. ರಮೇಶ್‌ ಕೌನ್ಸಿಲ್‌ ಸಭೆಯಲ್ಲೇ ಹೇಳಿದ್ದರು. ಈ ವಿವರ ರಸ್ತೆ ಕಾಮಗಾರಿಗಳ ಎಲ್ಲ ಕಥೆಯನ್ನೂ ಹೇಳುತ್ತದೆ.

‘ಗುಂಡಿಗಳು ಇದ್ದ ಸ್ಥಿತಿಗಿಂತ ಮುಚ್ಚಿದ ವಾತಾವರಣ ಇನ್ನೂ ಭಯಾನಕವಾಗಿದೆ. ರಸ್ತೆಯ ಮೇಲ್ಮೈಗೂ ಮೀರಿದ ಎತ್ತರದಲ್ಲಿ ಮನಬಂದಂತೆ ಟಾರು ಹಾಕಿದ್ದರಿಂದ ಸಣ್ಣ-ಸಣ್ಣ ದಿನ್ನೆಗಳು ನಿರ್ಮಾಣವಾಗಿವೆ. ಅವುಗಳನ್ನು ತಪ್ಪಿಸಿ ಓಡಾಡುವುದು ಕಷ್ಟವಾಗಿದೆ’ ಎನ್ನುತ್ತಾರೆ ಕೇಂದ್ರ ವಾಣಿಜ್ಯ ಪ್ರದೇಶದಲ್ಲಿ ನಿತ್ಯವೂ ಓಡಾಡುವ ವಿ.ಎಂ. ನಾಗೇಶ್‌.

‘ಪ್ರತಿವರ್ಷ ಮಳೆಗಾಲದಲ್ಲಿ ರಸ್ತೆಗಳು ಶೇ 18ರಿಂದ 20ರಷ್ಟು ಹಾಳಾಗುವುದು ಸಾಮಾನ್ಯ. ಆದರೆ, ಹಲವು ವರ್ಷಗಳಿಂದ ರಸ್ತೆಗಳು ದುರಸ್ತಿಯನ್ನೇ ಕಂಡಿಲ್ಲ’ ಎಂದು ಅವರು ದೂರುತ್ತಾರೆ.

‘ರಸ್ತೆ ಗುಂಡಿಗಳನ್ನು ಬೇಕಾಬಿಟ್ಟಿ ಮುಚ್ಚದೆ ರಾಷ್ಟ್ರೀಯ ರಸ್ತೆ ಕಾಂಗ್ರೆಸ್ ಮಾರ್ಗಸೂಚಿ ಅನುಸಾರ ದುರಸ್ತಿ ಮಾಡಬೇಕು. ಗುಂಡಿಯ ಸುತ್ತ ಚೌಕಾಕಾರವಾಗಿ ಕೊರೆಯಬೇಕು. ಅದರ ದೂಳು ತೆಗೆಯಬೇಕು.

ಟಾರು ಹಾಕಿದ ಮೇಲೆ ಚೆನ್ನಾಗಿ ರೋಲ್
ಮಾಡಬೇಕು. ಇಲ್ಲದಿದ್ದರೆ ಗುಂಡಿ ಮುಚ್ಚಿ ಪ್ರಯೋಜನ ಇಲ್ಲ’ ಎನ್ನುತ್ತಾರೆ ನಗರಯೋಜನಾ ತಜ್ಞ ಲೋಕೇಶ್‌ ಹೆಬ್ಬಾನಿ.
‘ಗುತ್ತಿಗೆದಾರರ ನಿರ್ವಹಣೆ ಅವಧಿ ಮುಗಿಯದ ರಸ್ತೆಗಳಲ್ಲಿ ಗುತ್ತಿಗೆದಾರರೇ ಗುಂಡಿ ಮುಚ್ಚಬೇಕು. ಆದರೆ, ಬಿಬಿಎಂಪಿಯಿಂದಲೇ ಅವುಗಳನ್ನು ಮುಚ್ಚಲಾಗುತ್ತಿದೆ’ ಎಂಬ ದೂರು ಸಹ ಕೇಳಿಬಂದಿದೆ.

‘ಮೊದಲು ಎಲ್ಲ ಗುಂಡಿಗಳನ್ನು ಮುಚ್ಚಿ. ಗುತ್ತಿಗೆದಾರರ ನಿರ್ವಹಣೆ ಅವಧಿ ಬಾಕಿಯಿದ್ದರೆ ಅವರಿಂದಲೇ ಕೆಲಸ ಮಾಡಿಸಿ. ಬಳಿಕ ಜಾಹೀರಾತು ಹಾಕಿ. ಮುಖ್ಯಮಂತ್ರಿ ಅವರಿಗೆ ನಗರದಲ್ಲಿ ಗುಂಡಿಗಳು ಕಾಣುವುದೇ ಇಲ್ಲವೆ’ ಎಂದು ರಾಜಶೇಖರ್‌ ಪ್ರಶ್ನಿಸುತ್ತಾರೆ.