ನವದೆಹಲಿ (ಪಿಟಿಐ): ರಕ್ಷಣಾ ಇಲಾಖೆಗೆ ಸೇರಿದ ಒಟ್ಟು ರೂ 80 ಸಾವಿರ ಕೋಟಿ ವೆಚ್ಚದ ಯೋಜನೆಗಳಿಗೆ ಕೇಂದ್ರ ಸರ್ಕಾರ ಶನಿವಾರ ಒಪ್ಪಿಗೆ ನೀಡಿದೆ. ಆರು ಜಲಾಂತರ್ಗಾಮಿಗಳನ್ನು ದೇಶೀಯವಾಗಿ ನಿರ್ಮಿಸಲು ತೀರ್ಮಾನಿಸಿದ್ದು, ಇದಕ್ಕಾಗಿ ರೂ50 ಸಾವಿರ ಕೋಟಿ ವೆಚ್ಚ ಮಾಡಲಾಗುತ್ತದೆ.
ಇಸ್ರೇಲ್‌ನಿಂದ ಎಂಟು ಸಾವಿರಕ್ಕೂ ಹೆಚ್ಚು ಟ್ಯಾಂಕ್‌ನಿರೋಧಕ ಕ್ಷಿಪಣಿ ಖರೀದಿ ಹಾಗೂ 12 ಅತ್ಯಾಧುನಿಕ ಡಾರ್ನಿಯರ್‌ ಬೇಹುಗಾರಿಕಾ ವಿಮಾನಗಳನ್ನು ಖರೀದಿಸುವುದೂ ರೂ80 ಸಾವಿರ ಕೋಟಿಗಳ ಯೋಜನೆಯ ಭಾಗವಾಗಿದೆ. ರಕ್ಷಣಾ ಸಚಿವ ಅರುಣ್‌ ಜೇಟ್ಲಿ ಅವರು ರಕ್ಷಣಾ ಸಾಧನ– ಸಲಕರಣೆ ಸಂಗ್ರಹಣಾ ಮಂಡಳಿಯಲ್ಲಿ ಎರಡು ಗಂಟೆ ಕಾಲ ಸಮಾಲೋಚನೆ ನಡೆಸಿದ ನಂತರ ಈ ತೀರ್ಮಾನ ತೆಗೆದುಕೊಳ್ಳಲಾಗಿದೆ. ಸಭೆಯಲ್ಲಿ ರಕ್ಷಣಾ ಕಾರ್ಯದರ್ಶಿ, ಸೇನೆಯ ಮೂರು ಪಡೆಗಳ ಮುಖ್ಯಸ್ಥರು, ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಮುಖ್ಯಸ್ಥರು ಮತ್ತಿತರರು ಭಾಗವಹಿಸಿದ್ದರು.
ಇಸ್ರೇಲ್‌ನಿಂದ 8,356 ಕ್ಷಿಪಣಿಗಳನ್ನು ರೂ3,200 ಕೋಟಿ ವೆಚ್ಚದಲ್ಲಿ ಖರೀದಿಸಲಾಗುತ್ತದೆ. ಎಚ್‌ಎಎಲ್‌ನಿಂದ 12 ಅತ್ಯಾಧುನಿಕ ವಿಮಾನಗಳ ಖರೀದಿಗೆ ರೂ1,850 ಕೋಟಿ ವೆಚ್ಚ ಮಾಡಲು ನಿರ್ಧರಿಸಲಾಗಿದೆ. ಇದಲ್ಲದೆ ಭೂ ಸೇನೆಗೆ 362 ವಾಹನಗಳನ್ನು ರೂ662 ಕೋಟಿ ವೆಚ್ಚದಲ್ಲಿ ಖರೀದಿಸಲಾಗುತ್ತದೆ. ಆರು ಜಲಾಂತರ್ಗಾಮಿ ಹಡಗುಗಳನ್ನು ನಿರ್ಮಾಣ ಸಂಬಂಧ ಸಮಿತಿಯೊಂದನ್ನು ರಚಿಸಿದ್ದು, ಸಾಧಕ – ಬಾಧಕಗಳ ಬಗ್ಗೆ ರಕ್ಷಣಾ ಇಲಾಖೆ ಅಧ್ಯಯನ ಮಾಡಲಿದೆ ಎಂದು ಮೂಲಗಳು ತಿಳಿಸಿವೆ. ಸರ್ಕಾರಿ ಅಥವಾ ಖಾಸಗಿ ಸಹಭಾಗಿತ್ವದಲ್ಲಿ ಹಡಗುಕಟ್ಟೆಗಳನ್ನು ಸ್ಥಾಪಿಸುವ ಬಗ್ಗೆ ಅಧ್ಯಯನ ನಡೆಸಿ ಸಮಿತಿಯು 68 ವಾರಗಳಲ್ಲಿ ವರದಿ ನೀಡಲಿದೆ.
