ಮುಂಬೈ (ಪಿಟಿಐ): ಬಾಲಿವುಡ್‌ ಬಿಗ್‌ ಬಿ ಅಮಿತಾಭ್ ಬಚ್ಚನ್‌ ಅವರು ಎರಡು ವರ್ಷದ ಪುಟ್ಟ ಬಾಲಕನಾಗಿದ್ದಾಗ ರೈಲು ನಿಲ್ದಾಣದಲ್ಲಿ ತಪ್ಪಿಸಿಕೊಂಡು ಕೆಲ ಹೊತ್ತು ಹೆತ್ತವರಿಗೆ ಆತಂಕ ತಂದಿದ್ದರಂತೆ!
ಬಾಲ್ಯದ ಆ ಘಟನೆಯನ್ನು ಬಚ್ಚನ್‌ ತಮ್ಮ ಬ್ಲಾಗ್‌ನಲ್ಲಿ ಸವಿಸ್ತಾರವಾಗಿ ಬರೆದುಕೊಂಡಿದ್ದಾರೆ.
ಬಿಗ್‌ ಬಿ ಹೇಳಿದ್ದು...
‘ನಾನಾಗ ಎರಡು ವರ್ಷದ ಬಾಲಕ. ಅಜ್ಜನನ್ನು ನೋಡಲೆಂದು ಅಲಹಾಬಾದ್‌ನಿಂದ ಕರಾಚಿಗೆ ಹೋಗುತ್ತಿದ್ದೆ. ಆಗ ಕರಾಚಿ ತಲುಪುವುದಕ್ಕೆ ಎರಡು ದಿನಗಳು ಬೇಕಾಗುತ್ತಿದ್ದವು. ಕರಾಚಿಯಿಂದ ವಾಪಸ್‌್ ಬರುತ್ತಿದ್ದಾಗ ನಡೆದ ಘಟನೆ ಇದು. ನಾವು ಒಂದು ಕಡೆ ಬೇರೆ ರೈಲು ಹತ್ತಬೇಕಿತ್ತು. ಜನಜಂಗುಳಿಯಲ್ಲಿ ನಾನು ಹೆತ್ತವರಿಂದ ಬೇರೆಯಾಗಿಬಿಟ್ಟೆ. ನಾನು ಅಪ್ಪನ ಜತೆಯಲ್ಲಿ ಇಲ್ಲ ಎನ್ನುವುದು ಅಮ್ಮನಿಗೆ ಗೊತ್ತಾಯಿತು.
‘ಕಂಗಾಲಾದ ಅವರು, ನನ್ನ ಹೆಸರು ಕೂಗುತ್ತ, ‘‘ಎರಡು ವರ್ಷದ ಬಾಲಕನನ್ನು ಎಲ್ಲಾದರೂ ಕಂಡಿರಾ” ಎಂದು ಪ್ಲಾಟ್‌ಫಾರ್ಮ್‌ ಉದ್ದಕ್ಕೂ ನನಗಾಗಿ ಹುಡುಕಾಡಿದರಂತೆ. ಆಗ ಅಲ್ಲಿಗೆ ಬಂದ ಪ್ರಯಾಣಿಕರೊಬ್ಬರು “ಮೇಲ್ಸೇತುವೆ ಮೇಲೆ ಬಾಲಕನೊಬ್ಬ ನಿಂತಿದ್ದನ್ನು ನೋಡಿದೆ” ಎಂದರಂತೆ.
‘ಕೂಡಲೇ ನನ್ನ ತಂದೆ ತಾಯಿ ಆ ಸ್ಥಳಕ್ಕೆ ಓಡಿ ಬಂದರು. ಅಲ್ಲಿ ನನ್ನನ್ನು ನೋಡಿ ಸಮಾಧಾನದ ನಿಟ್ಟುಸಿರು ಬಿಟ್ಟರು’ ಎಂದು ಹಳೆಯ ನೆನಪುಗಳನ್ನು ಮೆಲುಕು ಹಾಕಿದ್ದಾರೆ ಬಚ್ಚನ್‌.
