ಲಂಕಾ ನೆಲದಲ್ಲಿ ‘ಯುವಪಡೆ’ಯ ದರ್ಬಾರ್‌

ಕೊಲಂಬೊ:  ಬಹುತೇಕ ಯುವ ಆಟಗಾರರನ್ನು ಒಳಗೊಂಡ ಭಾರತ ತಂಡದ ಶಕ್ತಿ ಏನೆಂಬುದು ಸಿಂಹಳೀಯ ನಾಡಿನಲ್ಲಿ ಸಾಬೀತಾಗಿದೆ. ಅನುಭವಿಗಳ ಬಲ ಕಡಿಮೆಯಿದ್ದರೂ ‘ನಾವು ಯಾರಿಗೂ ಕಡಿಮೆ ಯಿಲ್ಲ’ ಎನ್ನುವುದನ್ನು ವಿರಾಟ್‌ ಕೊಹ್ಲಿ ನಾಯಕತ್ವದ ಪ್ರವಾಸಿ ತಂಡ ತೋರಿಸಿಕೊಟ್ಟಿದೆ.

ಮಂಗಳವಾರ ಭಾರತದ ಕ್ರಿಕೆಟ್‌ ಪ್ರೇಮಿಗಳು ಭಾರಿ ಖುಷಿಯಲ್ಲಿದ್ದರು. ಏಕೆಂದರೆ, ತಂಡ 22 ವರ್ಷಗಳ ಬಳಿಕ ಶ್ರೀಲಂಕಾದಲ್ಲಿ ಟೆಸ್ಟ್‌ ಸರಣಿ ಜಯಿಸಿದೆ. ಅದರಲ್ಲೂ ವಿಶೇಷವಾಗಿ ಈ ಗೆಲುವು ವಿರಾಟ್‌ ಕೊಹ್ಲಿ ಅವರಲ್ಲಿ ಹೊಸ ಚೈತನ್ಯ ತುಂಬಿದೆ. ಕೊಹ್ಲಿ ಟೆಸ್ಟ್ ತಂಡದ ನಾಯಕರಾದ ಬಳಿಕ ಭಾರತ ಜಯಿಸಿದ ಚೊಚ್ಚಲ ಸರಣಿಯಿದು.

ಭಾರತ ತಂಡ 2011ರಲ್ಲೂ ಲಂಕಾ ಪ್ರವಾಸ ಕೈಗೊಂಡಿತ್ತು. ಟೆಸ್ಟ್‌ ಪರಿಣತ ಬ್ಯಾಟ್ಸ್‌ಮನ್‌ಗಳಾದ ರಾಹುಲ್ ದ್ರಾವಿಡ್‌, ವಿವಿಎಸ್‌ ಲಕ್ಷ್ಮಣ್‌ ತಂಡದಲ್ಲಿದ್ದರು. ಸ್ಫೋಟಕ ಆಟಕ್ಕೆ ಹೆಸರಾಗಿದ್ದ ವೀರೇಂದ್ರ ಸೆಹ್ವಾಗ್‌ ಕೂಡ ಇದ್ದರು. ಸಚಿನ್‌ ತೆಂಡೂಲ್ಕರ್‌, ಮಹೇಂದ್ರ ಸಿಂಗ್ ದೋನಿ ಅವರ ಬಲವೂ ತಂಡಕ್ಕಿತ್ತು. ಆದರೂ, ಭಾರ ತಕ್ಕೆ ಸರಣಿ ಜಯಿಸಲು ಸಾಧ್ಯವಾಗಿರಲಿಲ್ಲ. ಆದ್ದರಿಂದ ಈ ಬಾರಿಯ ‘ಯುವಪಡೆ’ಯ ಸಾಧನೆ ಎಲ್ಲರ ಮೆಚ್ಚುಗೆಗೆ ಕಾರಣವಾಗಿದೆ.  ಮೂರನೇ ಟೆಸ್ಟ್‌ನಲ್ಲಿ 117 ರನ್‌ ಗೆಲುವು ದಾಖಲಿಸಿದ ಭಾರತ ಸರಣಿಯನ್ನು 2–1ರಲ್ಲಿ ಗೆದ್ದುಕೊಂಡಿತು.

ಎಸ್‌ಎಸ್‌ಸಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಭಾರತ ತಂಡ ಆತಿಥೇಯರ ಗೆಲುವಿಗೆ 386 ರನ್‌ ಗುರಿ ನೀಡಿತ್ತು. ಸವಾಲಿನ ಗುರಿಯ ಎದುರು ಪ್ರಬಲ ಹೋರಾಟ ನಡೆಸಿದ ಲಂಕಾ ಕೊನೆಯ ದಿನದಾಟ ಮುಗಿಯಲು ಒಂದು ಗಂಟೆಯಷ್ಟೇ ಬಾಕಿ ಇರುವಾಗ ಸೋಲೊಪ್ಪಿಕೊಂಡಿತು. ಈ ತಂಡ ದ್ವಿತೀಯ ಇನಿಂಗ್ಸ್‌ನಲ್ಲಿ 85 ಓವರ್‌ಗಳಲ್ಲಿ 268 ರನ್ ಗಳಿಸಿತು.

ಸೋಮವಾರದ ದಿನದಾಟದ ಅಂತ್ಯಕ್ಕೆ ಮೂರು ವಿಕೆಟ್‌ ಕಳೆದುಕೊಂಡು 67 ರನ್ ಗಳಿಸಿದ್ದ ಲಂಕಾ ತಂಡ ಮಂಗಳವಾರದ ದಿನದಾಟದ ಮೊದಲ ಅವಧಿಯಲ್ಲಿ ರಕ್ಷಣಾತ್ಮಕವಾಗಿ ಆಡಲು ಯತ್ನಿಸಿತು. ಈ ತಂಡದ ನಾಯಕ ಏಂಜೆಲೊ ಮ್ಯಾಥ್ಯೂಸ್‌ ಭಾರತದ ಎಲ್ಲಾ ಬೌಲರ್‌ಗಳನ್ನು ಸಮರ್ಥವಾಗಿ ಎದುರಿಸಿದರು.

ಗಾಲ್‌ನಲ್ಲಿ ನಡೆದಿದ್ದ ಮೊದಲ ಟೆಸ್ಟ್‌ನಲ್ಲಿ ಲಂಕಾ ಗೆಲುವು ಪಡೆದಿತ್ತು. ಎರಡನೇ ಟೆಸ್ಟ್‌ನಲ್ಲಿ ಭಾರತ ಜಯ ಸಾಧಿಸಿತ್ತು. ಆದ್ದರಿಂದ ಮೂರನೇ ಟೆಸ್ಟ್‌ ಉಭಯ ತಂಡ ಗಳಿಗೂ ಮಹತ್ವದ್ದಾಗಿತ್ತು. ಗುರುವಾರವೇ   ಉಫುಲ್‌ ತರಂಗ, ದಿಮುತ್‌ ಕರುಣಾರತ್ನೆ ಮತ್ತು ಚಾಂಡಿಮಾಲ್‌ ಔಟಾಗಿದ್ದರಿಂದ ಲಂಕಾ ತಂಡ ಒತ್ತಡಕ್ಕೆ ಸಿಲುಕಿತ್ತು.  ಆದ್ದರಿಂದ ತವರಿನಲ್ಲಿ ಮುಖಭಂಗ ತಪ್ಪಿಸಿಕೊಳ್ಳಲು ಮ್ಯಾಥ್ಯೂಸ್‌ ರನ್‌ ಗಳಿಸುವುದಕ್ಕಿಂತ ಹೆಚ್ಚಾಗಿ ಪಂದ್ಯ ವನ್ನು ಡ್ರಾ ಮಾಡಿಕೊಳ್ಳಲು ಹೋರಾಟ ನಡೆಸಿದರು. ಅವರು ಒಟ್ಟು ಐದು ಗಂಟೆ 13 ನಿಮಿಷ ಕ್ರೀಸ್‌ನಲ್ಲಿ ಇದ್ದದ್ದು ಇದಕ್ಕೆ ಸಾಕ್ಷಿ.

ಲಂಕಾ ತಂಡ ಒಟ್ಟು 107 ರನ್ ಗಳಿಸುವಷ್ಟರಲ್ಲಿ ಐದು ವಿಕೆಟ್‌ ಕಳೆದುಕೊಂಡಿದ್ದರಿಂದ ಮ್ಯಾಥ್ಯೂಸ್ ಮತ್ತಷ್ಟು ಒತ್ತಡಕ್ಕೆ ಒಳಗಾದರು. ಕೌಶಲ್‌ ಸಿಲ್ವಾ ನೂರು ನಿಮಿಷ ಕ್ರೀಸ್‌ನಲ್ಲಿದ್ದರೂ ಗಳಿಸಿದ್ದು 27 ರನ್ ಮಾತ್ರ. 50 ಎಸೆತಗಳನ್ನು ಎದುರಿಸಿದ ಅವರು ನಾಲ್ಕು ಬೌಂಡರಿ ಬಾರಿಸಿದರು. ತಂಡದ ಇನ್ನೊಬ್ಬ ಪ್ರಮುಖ ಬ್ಯಾಟ್ಸ್‌ಮನ್‌ ಲಾಹಿರಿ ತಿರಿಮಾನ್ನೆ ಕೂಡ ಒಂದೂವರೆ ಗಂಟೆ ಕ್ರೀಸ್‌ನಲ್ಲಿದ್ದರೂ 12 ರನ್‌ಗಳನ್ನಷ್ಟೇ  ಬಾರಿಸಿದರು.  ಇವರು ಮ್ಯಾಥ್ಯೂಸ್‌ ಆಟಕ್ಕೆ ಬೆಂಬಲ ನೀಡಿದರು.

ಆತಂಕ ಮೂಡಿಸಿದ್ದ ಜೋಡಿ:    ಎರಡನೇ ಟೆಸ್ಟ್‌ನಲ್ಲಿ ಲಂಕಾ ತಂಡವನ್ನು 134 ರನ್‌ಗೆ ಕಟ್ಟಿ ಹಾಕಿದ್ದ ಭಾರತದ ಬೌಲರ್‌ಗಳು ಎಸ್‌ಎಸ್‌ ಸಿ ಕ್ಲಬ್‌ನಲ್ಲೂ ಚುರುಕಿನ ದಾಳಿ ನಡೆಸಿದರು.  ಆದರೆ, ಮ್ಯಾಥ್ಯೂಸ್‌ ಪ್ರತಿ ಎಸೆತವನ್ನು ಭಾರಿ ಎಚ್ಚರಿಕೆಯಿಂದ ಎದುರಿಸಿದರು. ಮ್ಯಾಥ್ಯೂಸ್‌ ಮತ್ತು ಕುಶಾಲ್‌ ಪೆರೇರಾ ಜೋಡಿ ಆರನೇ ವಿಕೆಟ್‌ಗೆ 135 ರನ್‌ಗಳನ್ನು ಕಲೆ ಹಾಕಿ ಪಂದ್ಯವನ್ನು ಡ್ರಾ ಮಾಡಿಕೊಳ್ಳಲು ಇನ್ನಿಲ್ಲದ ಹೋರಾಟ ನಡೆಸಿತು. ಮ್ಯಾಥ್ಯೂಸ್‌ ಶತಕ ಬಾರಿಸಿ ಭಾರತದ ಬೌಲರ್‌ಗಳಿಗೆ ‘ತಡೆಗೋಡೆ’ ಎನಿಸಿದರು. 

240 ಎಸೆತಗಳನ್ನು ಎದುರಿಸಿದ ಅವರು 13 ಬೌಂಡರಿಗಳನ್ನು ಸಿಡಿಸಿದರು. ಆದ್ದರಿಂದ ಪ್ರವಾಸಿ ತಂಡದಲ್ಲಿ  ನಿರಾಸೆಯ ಕಾರ್ಮೋಡ ಕವಿದಿತ್ತು. ಆದರೆ, 81ನೇ ಓವರ್‌ನಲ್ಲಿ ಮ್ಯಾಥ್ಯೂಸ್‌ ಅವರನ್ನು ವೇಗಿ ಇಶಾಂತ್‌ ಶರ್ಮಾ  ಎಲ್‌ಬಿ ಬಲೆಯಲ್ಲಿ ಕೆಡವಿದರು. ಆಗಂತೂ ಭಾರತದ ಆಟಗಾ ರರು ಪಂದ್ಯ ಗೆದ್ದಷ್ಟೇ ಖುಷಿಯಿಂದ ಜಿಗಿ ದಾಡಿದರು. ಈ ವೇಳೆಗಾಗಲೇ ಆತಿಥೇಯರ ಸೋಲು ಖಚಿತವಾಗಿತ್ತು. ಮ್ಯಾಥ್ಯೂಸ್‌ ಔಟಾದ ನಂತರದ ನಾಲ್ಕು ಓವರ್‌ಗಳಲ್ಲಿಯೇ ಲಂಕಾ ತಂಡದ ಇನಿಂಗ್ಸ್‌ ಹೋರಾಟ ಅಂತ್ಯ ಕಂಡಿದ್ದು ಇದಕ್ಕೆ ಸಾಕ್ಷಿ.

ಲಂಕಾ ತಂಡ ಕೊನೆಯ 19 ರನ್‌ ಗಳಿಸುವ ಅಂತರದಲ್ಲಿ ಮೂರು ವಿಕೆಟ್‌ ಗಳನ್ನು ಕಳೆದುಕೊಂಡಿತು. ‘ಬಾಲಂ ಗೋಚಿ’ ಬ್ಯಾಟ್ಸ್‌ಮನ್‌ಗಳಾದ ರಂಗನಾ ಹೆರಾತ್‌ (11), ಧಮ್ಮಿಕಾ ಪ್ರಸಾದ್‌ (6) ಮತ್ತು ನುವಾನ್‌ ಪ್ರದೀಪ್‌ (0) ಅವರಿಗೆ ಆಫ್‌ ಸ್ಪಿನ್ನರ್‌ ಅಶ್ವಿನ್‌ ದಾಳಿ ಎದುರಿಸಲು ಸಾಧ್ಯವಾಗಲಿಲ್ಲ.

ಮತ್ತೆ ಮಿಂಚಿದ ಅಶ್ವಿನ್‌:   ಭಾರತ ತಂಡ ಎರಡನೇ ಟೆಸ್ಟ್‌ನಲ್ಲಿ ಗೆಲುವು ಪಡೆಯಲು ಪ್ರಮುಖ ಕಾರಣರಾಗಿದ್ದ ಅಶ್ವಿನ್‌ ಮೂರನೇ ಟೆಸ್ಟ್‌ನಲ್ಲೂ ಬಹುಮುಖ್ಯ ಪಾತ್ರ ವಹಿಸಿದರು. ಒಟ್ಟು ನಾಲ್ಕು ವಿಕೆಟ್‌ಗಳನ್ನು ಉರುಳಿಸಿದರು. ಸೋಮವಾರ ಎರಡು ವಿಕೆಟ್ ಪಡೆದಿದ್ದ ಬಲಗೈ ವೇಗಿ ಇಶಾಂತ್‌ ಕೊನೆಯ ದಿನ ಮ್ಯಾಥ್ಯೂಸ್ ವಿಕೆಟ್‌ ಪಡೆದು ಪಂದ್ಯದ ಮಹತ್ವದ ತಿರುವಿಗೆ ಕಾರಣರಾದರು.

ಅಶ್ವಿನ್‌ ಮೂರು ಪಂದ್ಯಗಳಿಂದ 21 ವಿಕೆಟ್‌ ಕಬಳಿಸಿದರು. ಇದರಿಂದ ಸರಣಿ ಶ್ರೇಷ್ಠ ಗೌರವಕ್ಕೂ ಪಾತ್ರರಾದರು.