ಜ್ಯೂರಿಚ್‌ (ಪಿಟಿಐ): ಸ್ವಿಸ್‌ ಬ್ಯಾಂಕ್‌ನಲ್ಲಿಿ ಕಪ್ಪುಹಣ ಇಟ್ಟಿರುವವರ ಹೆಸರುಗಳನ್ನು ಬಹಿರಂಗಪಡಿಸಿರುವ ಸ್ವಿಡ್ಜರ್‌ಲೆಂಡ್‌ ಸರ್ಕಾರ, ಇದೀಗ ಕಳೆದ 60 ವರ್ಷಗಳಿಂದ ವಾರಸುದಾರರು ಇಲ್ಲದ ಖಾತೆಗಳ ಪಟ್ಟಿಯನ್ನು ಪ್ರಕಟಿಸಲು ಮುಂದಾಗಿದೆ.
2015ರ ಅಂತ್ಯದಲ್ಲಿ ಸ್ವಿಸ್‌ ಬ್ಯಾಂಕಿನ ಒಂಬುಡ್ಸ್‌ಮನ್‌ ಅವರು ಈ ಪಟ್ಟಿಯನ್ನು ಪ್ರಕಟಿಸಲಿದ್ದಾರೆ. ಇದೇ ವೇಳೆ ಸ್ವಿಸ್‌ ಬ್ಯಾಂಕಿನಲ್ಲಿರುವ ವಾರಸುದಾರರಿಲ್ಲದ ಸ್ವತ್ತುಗಳ ಬಗ್ಗೆಯೂ ಮಾಹಿತಿ ನೀಡಲಿದ್ದಾರೆ. ಈ ಖಾತೆಗಳು ಅರಸರು ಮತ್ತು ಶ್ರೀಮಂತ ಕುಟುಂಬಗಳಿಗೆ ಸೇರಿವೆ. ಅವರು ಸ್ವಿಸ್‌ ಬ್ಯಾಂಕ್‌ನಲ್ಲಿ ಖಾತೆಗಳನ್ನು ತೆರೆದ ಬಳಿಕ ಖಾತೆಯ ಒಡೆತನವನ್ನು ತಮ್ಮ ಮಕ್ಕಳಿಗೆ ಅಥವಾ ಕುಟುಂಬ ಸದಸ್ಯರಿಗೆ ವರ್ಗಾಯಿಸದ ಕಾರಣ ಈ ಖಾತೆಗಳು ಹಾಗೆಯೇ ಉಳಿದಿವೆ ಎಂಬ ಊಹಾಪೋಹಗಳು ಇವೆ.
ಖಾತೆ ವಿವರದೊಂದಿಗೆ, ಖಾತೆದಾರರ ರಾಷ್ಟ್ರೀಯತೆಯನ್ನು ಬಹಿರಂಗಗೊಳಿಸಲಾಗುವುದು ಎಂದು ಸ್ವಿಸ್‌ ಬ್ಯಾಂಕ್‌ ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
