ವಿಜ್ಞಾನ ಪಸರಿಸುವ ‘ಇಜ್ಞಾನ’

ಅಂತರ್ಜಾಲ ಇಂದು ನಮ್ಮ ದಿನಚರಿಯ ಭಾಗವೇ ಆಗಿಹೋಗಿದೆ. ಅದು ಇಷ್ಟು ವ್ಯಾಪಕವಾಗಿ ನಮ್ಮ ಬದುಕು ಆವರಿಸಿಕೊಂಡಿದ್ದರೂ ಪ್ರಾದೇಶಿಕ ಭಾಷೆಗಳಲ್ಲಿ ಸಾಕಷ್ಟು ಮಾಹಿತಿ ಸಿಗುತ್ತಿಲ್ಲ. ಕನ್ನಡದಲ್ಲಿ ವಿಜ್ಞಾನ- ತಂತ್ರಜ್ಞಾನದ ಬಗ್ಗೆ ಅಂತರ್ಜಾಲದಲ್ಲಿ ಸಿಗುವ ಮಾಹಿತಿಯ ಪ್ರಮಾಣ ತೃಪ್ತಿದಾಯಕವಾಗಿಲ್ಲ.

ಆದರೆ ಕೆಲವು ಸಂಸ್ಥೆ–ಜಾಲತಾಣಗಳು ಅಂತರ್ಜಾಲದಲ್ಲಿ ಕನ್ನಡದ ಮಾಹಿತಿಯನ್ನು ಒದಗಿಸಲು ಶ್ರಮಿಸುತ್ತಿವೆ. ಇಜ್ಞಾನ.ಕಾಂ (www.ejnana.com) ಕೂಡ ಅಂಥ ವಿರಳ ಜಾಲತಾಣಗಳಲ್ಲಿ ಒಂದು.

2007ರಲ್ಲಿ ಟಿ.ಜಿ. ಶ್ರೀನಿಧಿ ಅವರು ಆರಂಭಿಸಿದ ಜಾಲತಾಣ ಇಜ್ಞಾನ.ಕಾಂ. ವಿಜ್ಞಾನ– ತಂತ್ರಜ್ಞಾನ ವಿಷಯಗಳ ಸಂವಹನಕ್ಕಾಗಿ ಮೀಸಲಾಗಿರುವ ಈ ಜಾಲತಾಣವು ಕಾರ್ಯಾರಂಭ ಮಾಡಿದ ದಿನಗಳಲ್ಲಿ ಕನ್ನಡ ಯೂನಿಕೋಡ್‌ ತಂತ್ರಜ್ಞಾನ ಮುಂಚೂಣಿಗೆ ಬಂದಿರಲಿಲ್ಲ.

ಆದ್ದರಿಂದ ಪತ್ರಿಕೆಗಳಲ್ಲಿ ವಿಜ್ಞಾನ ತಂತ್ರಜ್ಞಾದ ಕುರಿತಾಗಿ ಪ್ರಕಟವಾದ ಲೇಖನಗಳ ಪಿಡಿಎಫ್‌ ಪುಟಗಳನ್ನು ಪ್ರಕಟಿಸಲಾಗುತ್ತಿತ್ತು. ಮೈಸೂರಿನಲ್ಲಿ ಶ್ರೀನಿಧಿ ಅವರು ವಿಜ್ಞಾನ ಲೇಖಕ ಕೊಳ್ಳೆಗಾಲ ಶರ್ಮ ಅವರೊಂದಿಗೆ ಮಾತನಾಡುತ್ತಿದ್ದಾಗ ಜಾಲತಾಣವೊಂದನ್ನು ಪ್ರಾರಂಭಿಸುವ ಯೋಜನೆ ರೂಪುಗೊಂಡಿತು. ಇನ್ನೋರ್ವ ಸ್ನೇಹಿತ ನಂದಕಿಶೋರ್‌ ‘ಇಜ್ಞಾನ.ಕಾಂ’ ಎಂಬ ಹೆಸರು ನೀಡಿದರು.

‘ಏನೋ ಸಾಧನೆ ಮಾಡಿಬಿಡ್ತೀವಿ ಎಂಬ ಮಹದುದ್ದೇಶ ಇಟ್ಟುಕೊಂಡು ಈ ಜಾಲತಾಣ ಆರಂಭಿಸಲಿಲ್ಲ. ವಿಜ್ಞಾನದ ಮಾಹಿತಿ ಕನ್ನಡದಲ್ಲಿ ಅಷ್ಟು ಸುಲಭಕ್ಕೆ ಸಿಗುತ್ತಿಲ್ಲ. ಆ ಕೊರತೆಯನ್ನು ಸಾಧ್ಯವಾದಷ್ಟೂ ನೀಗಿಸುವ ಪ್ರಯತ್ನ ನಮ್ಮದಾಗಿತ್ತು’ ಎನ್ನುತ್ತಾರೆ  ಶ್ರೀನಿಧಿ.

ಜಾಲತಾಣವು ಇದೀಗ ಒಂಬತ್ತು ವರ್ಷ ಪೂರೈಸಿ ಹತ್ತನೇ ವರ್ಷಕ್ಕೆ ಕಾಲಿರಿಸುತ್ತಿದೆ. ಕಳೆದ ಒಂಬತ್ತು ವರ್ಷಗಳಲ್ಲಿ 500ಕ್ಕೂ ಅಧಿಕ ಲೇಖನಗಳನ್ನು ಪ್ರಕಟಿಸಿದೆ.

ಪಿ.ಎಸ್‌. ಶಂಕರ್‌, ನಾಗೇಶ ಹೆಗಡೆ, ಟಿ.ಆರ್‌. ಅನಂತರಾಮು, ಯು.ಬಿ. ಪವನಜ, ಶ್ರೀವತ್ಸ ಜೋಶಿ, ಬೇಳೂರು ಸುದರ್ಶನ, ಕೊಳ್ಳೆಗಾಲ ಶರ್ಮ, ಟಿ.ಎಸ್‌. ಗೋಪಾಲ್‌ ಸೇರಿದಂತೆ ಕನ್ನಡದ ಅನೇಕ ಪ್ರಮುಖ ವಿಜ್ಞಾನ ಲೇಖಕರು ‘ಇಜ್ಞಾನ’ಕ್ಕಾಗಿ ಬರೆದಿದ್ದಾರೆ.

ಇಜ್ಞಾನದ ಜತೆಗಿನ ಕಳೆದ ಒಂಬತ್ತು ವರ್ಷಗಳ ಪ್ರಯಾಣದ ಕುರಿತು ಶ್ರೀನಿಧಿ ಪ್ರತಿಕ್ರಿಯಿಸುವುದು ಹೀಗೆ.

‘ನಮ್ಮ ಪ್ರಯತ್ನಕ್ಕೆ ಜನರಿಂದ ನಿರೀಕ್ಷಿತ ಪ್ರತಿಕ್ರಿಯೆ ಸಿಕ್ಕಿಲ್ಲ. ಕನ್ನಡದ ಓದುಗರು ಚೆನ್ನಾಗಿದೆ–ಚೆನ್ನಾಗಿಲ್ಲ ಮಾದರಿಯ ಪ್ರತಿಕ್ರಿಯೆಗಳನ್ನು ನೀಡುವುದರಲ್ಲಿ, ಸ್ಪಂದಿಸುವ ವಿಷಯದಲ್ಲಿ ಸಂಕೋಚ ಸ್ವಭಾವದವರು’ ಎನ್ನುತ್ತಾ ಶ್ರೀನಿಧಿ.

‘ಇದನ್ನು ಯಾರಾದರೂ ಓದುತ್ತಿದ್ದಾರಾ? ಅಥವಾ ಸುಮ್ಮನೇ ವ್ಯರ್ಥವಾಗಿ ಮಾಡುತ್ತಿದ್ದೇನಾ? ಎಂಬ ಅನುಮಾನವೂ ಕೆಲವೊಮ್ಮೆ ನನ್ನನ್ನು ಕಾಡಿದ್ದಿದೆ. ವೆಬ್‌ಸೈಟ್‌ನ ದತ್ತಾಂಶ ಗಮನಿಸಿದಾಗ ರಾಜ್ಯ– ದೇಶ ಅಷ್ಟೇಕೆ ವಿಶ್ವದ ಅನೇಕ ಭಾಗಗಳ ಜನರು ನಮ್ಮ ವೆಬ್‌ಸೈಟ್‌ ಗಮನಿಸುತ್ತಿರುವ ಅಂಶ ತಿಳಿದು ಬಂತು’ ಎನ್ನುತ್ತಾರೆ.

‘ಅಂತರ್ಜಾಲದಲ್ಲಿ ಹಲವು ವೇದಿಕೆಗಳಿವೆ. ಉದಾಹರಣೆಗೆ ವಿಜ್ಞಾನ ಶಿಕ್ಷಕರು ವೇದಿಕೆ ಮಾಡಿಕೊಂಡಿದ್ದಾರೆ. ಅವರೂ ಸಹ ನಮ್ಮ ಜಾಲತಾಣದಲ್ಲಿನ ಮಾಹಿತಿ ಹಂಚಿಕೊಳ್ಳುತ್ತಿದ್ದಾರೆ. ಇಂತಹ ಅನೇಕ ವೇದಿಕೆಗಳಿಗೆ ನಮ್ಮ ಜಾಲತಾಣ ಮಾಹಿತಿ ಮೂಲವಾಗಿದೆ. ಹೀಗೆ ಮಾಹಿತಿ ಪ್ರಸಾರವಾಗುತ್ತಿದೆ ಎಂಬುದೇ ಸಂತೋಷದ ಸುದ್ದಿ’ ಎಂದು ಶ್ರೀನಿಧಿ ವಿವರಿಸುತ್ತಾರೆ.

‘ಜಾಲತಾಣ ಆರಂಭವಾದ ದಿನಗಳಲ್ಲಿ ಅಂತರ್ಜಾಲದಲ್ಲಿ ಕನ್ನಡ ಎಂಬುದೇ ಒಂದು ಅಚ್ಚರಿಯ ಸಂಗತಿಯಾಗಿತ್ತು. ಆದರೆ ಇಂದು ಅಂತರ್ಜಾಲದಲ್ಲಿ ಕನ್ನಡ ಎಂದರೆ ಮಾಮೂಲಿ ಸಂಗತಿ’ ಎನ್ನುತ್ತಾರೆ ಅವರು.

2011ರಲ್ಲಿ ಇಜ್ಞಾನ ಎಂಬ ಹೆಸರಿನಲ್ಲಿಯೇ  ಒಂದು ಅಂತರ್ಜಾಲ ಪತ್ರಿಕೆಯನ್ನೂ ಆರಂಭಿಸಿ ಪರಿಸರ, ರಸಾಯನ ವಿಜ್ಞಾನ, ವಿಜ್ಞಾನ ಸಂವಹನ ಮತ್ತು ಮಾಹಿತಿ ತಂತ್ರಜ್ಞಾನ ಹೀಗೆ ನಾಲ್ಕು ವಿಷಯಗಳ ಕುರಿತು ಪ್ರಾಯೋಗಿಕ ಸಂಚಿಕೆಗಳನ್ನು ರೂಪಿಸಲಾಗಿತ್ತು. ಜನರ ಸ್ಪಂದನೆ ಚೆನ್ನಾಗಿದ್ದರೂ ಅದಕ್ಕೆ ಅವಶ್ಯವಿರುವ ಸಂಪನ್ಮೂಲ ಮತ್ತು ಸಮಯದ ಅಭಾವದಿಂದ ನಿಲ್ಲಿಸಲಾಯಿತು.

ಸಂಸ್ಥೆಯ ರೂಪಕ್ಕೆ...
ಹತ್ತನೇ ವರ್ಷಕ್ಕೆ ಕಾಲಿಡುವ ಸಂದರ್ಭದಲ್ಲಿ ಇಜ್ಞಾನ.ಕಾಮ್‌ನ ಕಾರ್ಯಚಟುವಟಿಕೆಗಳನ್ನು ವಿಸ್ತರಿಸುವ ಉದ್ದೇಶ ಶ್ರೀನಿಧಿ ಅವರಿಗಿದೆ. ಅದರ ಕಾರ್ಯಚಟುವಟಿಕೆಗಳನ್ನು ನಿರ್ವಹಿಸುವುದು ತಮ್ಮೊಬ್ಬರಿಂದಲೇ ಸಾಧ್ಯವಿಲ್ಲ ಎಂಬ ಕಾರಣಕ್ಕೆ ಅದಕ್ಕೊಂದು ಸಾಂಸ್ಥಿಕ ರೂಪ ಕೊಡುವ ಯೋಜನೆಯನ್ನೂ ಅವರು ಹಾಕಿಕೊಂಡಿದ್ದಾರೆ. ಇನ್ನು ಮುಂದೆ ಇಜ್ಞಾನ ಒಂದು ಸರ್ಕಾರೇತರ ಸಂಸ್ಥೆಯಾಗಿ ಕಾರ್ಯನಿರ್ವಹಿಸಲಿದೆ.