ಕೂಡಲಸಂಗಮ (ಬಾಗಲಕೋಟೆ): ಇಲ್ಲಿಯ ಬಸವಧರ್ಮ ಪೀಠದ ಆವರಣದಲ್ಲಿ ಬುಧವಾರ ವಿಶ್ವದ ಅತಿ ದೊಡ್ಡ ‘ಬಸವಧರ್ಮ ಧ್ವಜ’ ಅನಾವರಣಗೊಂಡಿತು.
ಈ ಧ್ವಜ 111 ಅಡಿ ಉದ್ದ, 11 ಅಡಿ ಅಗಲವಿದ್ದು, ಜಿಲ್ಲೆಯ ಅಮೀನಗಡದ ಯುವಕ ಮಂಜುನಾಥ ಬಂಡಿ ಸಿದ್ಧಪಡಿಸಿದ್ದಾರೆ. ಬೆಂಗಳೂರು ಬಳಿಯ ಕುಂಬಳ ಗೋಡಿನ ಬಸವಗಂಗೋತ್ರಿಯಲ್ಲಿ ನಿರ್ಮಾಣಗೊಳ್ಳಲಿರುವ 111 ಅಡಿ ಎತ್ತರದ ಬಸವಣ್ಣನವರ ಪ್ರತಿಮೆ ಕುರಿತು ಜನಜಾಗೃತಿ ಮೂಡಿಸಲು ಮತ್ತು ಯುವಕರನ್ನು ಧರ್ಮದತ್ತ ಆಕರ್ಷಿಸುವ ಉದ್ದೇಶದಿಂದ ಈ ಧ್ವಜವನ್ನು ನಿರ್ಮಿಸಲಾಗಿದೆ.
ಇದರಲ್ಲಿ 10 ಅಡಿಗೂ ದೊಡ್ಡದಾದ ‘ಶ್ರೀ ಗುರು ಬಸವ’ ಎನ್ನುವ ಧರ್ಮಲಾಂಛನವನ್ನು ಗದುಗಿನ ಕಲಾವಿದ ಪ್ರಕಾಶ ಬಂಡಿ ಬಿಡಿಸಿದ್ದಾರೆ.
ಮಾತೆ ಮಹಾದೇವಿ ಅವರು ಪೀಠಾರೋಹಣ ಮಾಡಿ 25 ವರ್ಷ ಪೂರೈಸಿದ್ದರ ನೆನಪಿಗಾಗಿ ಈ ಧ್ವಜ ನಿರ್ಮಿಸಲಾಗಿದೆ.
