ಕೋಟಾ (ರಾಜಸ್ತಾನ)(ಪಿಟಿಐ): ಬಾದಾಮಿ ಬೀಜಗಳೆಂದು ಭಾವಿಸಿ ವಿಷಕಾರಿ ಬೀಜಗಳನ್ನು ಸೇವಿಸಿದ್ದರಿಂದ 63 ಮಕ್ಕಳು ಸೇರಿ ಸುಮಾರು 90 ಜನರು ಅಸ್ವಸ್ಥರಾಗಿರುವ ಘಟನೆ ಈ ಜಿಲ್ಲೆಯಲ್ಲಿ ಬುಧವಾರ ನಡೆದಿದೆ.
ಮದುವೆ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಬಂದಿದ್ದ ಮಕ್ಕಳು ಹಾಗೂ ಮಹಿಳೆಯರು ಅಲ್ಲಿದ್ದ ಹಣ್ಣುಗಳನ್ನು ಬಾದಾಮಿಯೆಂದು ಅಂದಾಜು ಮಾಡಿ ಸೇವಿಸಿದ್ದಾರೆ. ಆರಂಭದಲ್ಲಿ ಅಲ್ಲಿ ಆಟ ಆಡುತ್ತಿದ್ದ ಮಕ್ಕಳು ಮರದಿಂದ ಕಿತ್ತು ಬೀಜಗಳನ್ನು ಸೇವಿಸಿದ್ದಾರೆ. ನಂತರ ಅಲ್ಲಿದ್ದ ಮಹಿಳೆಯರಿಗೆ ಸೇವಿಸುವಂತೆ ತಿಳಿಸಿದ್ದಾರೆ ಎನ್ನಲಾಗಿದೆ.
ಇದರಿಂದ ಮದುವೆಗೆ ಬಂದಿದ್ದ ಅನೇಕರು ಅಸ್ವಸ್ಥರಾಗಿದ್ದು, ಕೂಡಲೇ ಅವರನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗಳಿಗೆ ದಾಖಲು ಮಾಡಲಾಯಿತು.
ಹೊಟ್ಟೆನೋವು, ವಾಂತಿ ಹಾಗೂ ನಿರ್ಜಲೀಕರಣದಿಂದ ಮಂಗಳವಾರ ರಾತ್ರಿ 63 ಮಕ್ಕಳು ಹಾಗೂ 25 ಮಹಿಳೆಯರು ಆಸ್ಪತ್ರೆಗೆ ದಾಖಲಾಗಿದ್ದಾರೆ ಎಂದು ಕೋಟಾ ವೈದ್ಯಕೀಯ ಕಾಲೇಜಿನ ಮುಖ್ಯಸ್ಥ ಆರ್‌.ಕೆ. ಅಸೇರಿ ತಿಳಿಸಿದ್ದಾರೆ.
